ဂျပန်တွင် ကလေးမွေးဖွားနှုန်း ကျဆင်းနေသောကြောင့် လာမည့် ဧပြီလမှ စတင်ပြီး တိုကျိုတွင် ရက်သတ္တပတ်လျှင် ၄ ရက်သာ ရုံးတက်ရက်အဖြစ် စတင်သတ်မှတ်ကျင့်သုံးရန် စီစဉ်

ဂျပန်နိုင်ငံသည် သက်ကြီးရွယ်အိုများပြားလာခြင်း၊ ကလေးမွေးဖွားနှုန်း ကျဆင်းခြင်း အကျပ်အတည်းနှင့် ရင်ဆိုင်ရလျက်ရှိသည်။

ထိုပြဿနာကို ဖြေရှင်းနိုင်ရန် ခြေလှမ်းတစ်ရပ်အနေဖြင့် ယခုအခါ တိုကျိုမြို့တွင် ရက်သတ္တပတ်တွင် ရုံးရက် ၄ ရက်သို့ လျှော့ချသတ်မှတ်ရန် စီစဉ်လာသည်။

ဂျပန်၏ အကြီးမားဆုံး အလုပ်ရှင်များတွင် တစ်ခုအပါအဝင်ဖြစ်သော တိုကျိုမြို့တော် အုပ်ချုပ်ရေးအစိုးရအဖွဲ့ သည် ၎င်း၏ ဝန်ထမ်းများကို လာမည့် ဧပြီလမှ စတင်ပြီး တစ်ပတ်လျှင် ရုံးရက် ၄ ရက်သာ သတ်မှတ်ပေးရန် စီစဉ်နေသည်။

ထို့အပြင် ကလေးစောင့်ရှောက်မှုအတွက် ‘တစိတ်တပိုင်းခွင့်’ မူဝါဒကိုလည်း ကျင့်သုံးရန် စီစဉ်ထားသည်။

အဆိုပါမူဝါဒအရ အချို့သောဝန်ထမ်းများအနေဖြင့် တစ်ရက်လျှင် အလုပ်ချိန် ၂ နာရီ ပိုမိုနည်းပါးသွားမည် ဖြစ်သည်။

ထိုမူဝါဒ၏ ရည်ရွယ်ချက်မှာ ဝန်ထမ်းများအနေဖြင့် ကလေးစောင့်ရှောက်ရမည့် တာဝန်နှင့် လုပ်ငန်းခွင်အကြား ချိန်ညှိနိုင်စေရန် ဖြစ်ကြောင်း တိုကျိုမြို့တော် အုပ်ချုပ်ရေးမှူး ယုရီကို ကိုအိကဲ့က ပြောသည်။

“အမျိုးသမီးတွေအနေနဲ့ သားဖွားတာ (ဒါမှမဟုတ်) ပြုစုစောင့်ရှောက်ရတာတွေလို ကိစ္စတွေကြောင့် အလုပ်ကနေ နှုတ်ထွက်ရတာမျိုး မရှိစေဖို့အတွက် လုပ်ငန်းခွင် ပြုလွယ်ပြောင်းလွယ်ရှိစေဖို့ ကျွန်မတို့ ဆက်လက်သုံးသပ်နေပါတယ်” ဟု မြို့တော်ဝန်က ပြောကြောင်း Japan Times သတင်းဌာနက ဖော်ပြသည်။

ပြီးခဲ့သော ၂၀၂၄ ခုနှစ်တွင် ဂျပန်၌ ကလေးမွေးဖွားနှုန်း စံချိန်တင်ကျဆင်းခဲ့ပြီးနောက် ယခုမူဝါဒများ အကောင်အထည်ဖော်လာခဲ့ခြင်းလည်း ဖြစ်သည်။

၂၀၂၄ ခုနှစ် ဇန်နဝါရီမှ ဇွန်လအထိ ဂျပန်တွင် ကလေးမွေးဖွားမှု ၃၅၀၀၇၄ ဦးသာ ရှိခဲ့ရာ ၂၀၂၃ ခုနှစ် အလားတူ ကာလနှင့် နှိုင်းယှဉ်လျှင် ၅ ဒသမ ၇ ရာခိုင်နှုန်း ကျဆင်းသွားကြောင်း ကျန်းမာရေး၊ အလုပ်သမား ရေးရာနှင့် လူမှုဖူလုံရေး ဝန်ကြီးဌာနက ထုတ်ပြန်သည်။

သို့သော် ကလေးမွေးဖွားနှုန်း ကျဆင်းနေသည်မှာ ဂျပန်တစ်နိုင်ငံတည်း မဟုတ်ချေ။ New Yorker ၏ ဖော်ပြချက်အရ ၂၁၀၀ ပြည့်နှစ်သို့ ရောက်လျှင် ကမ္ဘာ့နိုင်ငံများ၏ ၉၇ ရာခိုင်နှုန်းမှာ replacement မွေးဖွားနှုန်းအောက်သို့ ကျဆင်းမည်ဟု ဟောကိန်းထုတ်ထားသည်။

Replacement ဖွားနှုန်းမှာ ပုံမှန်လူဦးရေရှိရေးအတွက် လိုအပ်သော မွေးဖွားနှုန်းဖြစ်သည်။

တောင်ကိုရီးယားသည် ကမ္ဘာပေါ်တွင် ကလေးမွေးဖွားနှုန်း အနည်းပါးဆုံးနိုင်ငံဖြစ်သည်။ ၂၀၂၄ ခုနှစ်အတွင်း တောင်ကိုရီးယားတွင် ကလေးတွန်းလှည်းထက် ခွေးတွန်းလှည်းများက ရောင်းအားပိုကောင်းခဲ့သည်ဟု ဆိုသည်။

ယခုရာစုနှစ်အတွင်း ကမ္ဘာ့လူဦးရေ ဆက်လက်တိုးတက်များပြားလာမည်ဟု ကုလသမဂ္ဂက ခန့်မှန်းထားသော်လည်း ကလေး ၁၃ ယောက်အဖေ Elon Musk အပါအဝင် ကလေးယူရန် တိုက်တွန်းဆော်သြသူတို့ကမူ ကလေးမွေးဖွားနှုန်းကျဆင်းနေမှုမှာ ကမ္ဘာ့အကြီးမားဆုံး ပြဿနာဖြစ်ကြောင်း ပြောဆိုလာနေကြသည်။

(ဆက်စပ်သတင်း)

Elon Musk က သူ့ရဲ့ Neuralink ကုမ္ပဏီက ဝန်ထမ်းနဲ့ လက်မထပ်ဘဲ အတူနေခဲ့ဖွယ်ရှိသော တက္ကဆပ် ပြည်နယ်က ဒေါ်လာ ၄ ဒသမ ၃ သန်းတန် စံအိမ်ကြီး၊ လူဦးရေကျဆင်းနေမှု ပြဿနာကို ကူညီပေးနိုင်ဖို့ အကောင်းဆုံးကြိုးစားနေကြောင်း ကလေး ၉ ယောက်ရဲ့ ဖခင် Elon Musk ပြောကြား

https://www.imyanmarhouse.com/news/read/1116245

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Tokyo is turning to a 4-day workweek in a desperate attempt to help Japan shed its unwanted title of ‘world’s oldest population’