တရုတ်ပြည်တွင် ကုမ္ပဏီတစ်ခုက ဝန်ထမ်းများ အလုပ်တွင် သတ်မှတ်ထားချိန်မဟုတ်ဘဲ အပေါ့သွားလိုပါက ၂ မိနစ်သာ အိမ်သာအသုံးပြုရမည်ဟူသော စည်းမျဉ်းချမှတ်

တရုတ်ပြည်တွင် ကုမ္ပဏီတစ်ခုက အချိန်အတိအကျသတ်မှတ်ကာ ယင်းအချိန်ကာလအတွင်းတွင်သာ အိမ်သာတက်ရမည်ဟူသော စည်းကမ်းချမှတ်လာသည့်အကြောင်းရပ်မှာ တရုတ်ပြည်မကြီး လူမှုကွန်ရက်သုံးစွဲသူတို့အကြား နာမည်ကြီးနေသည်။

ယခုစည်းကမ်းထုတ်ခဲ့ခြင်းမှာ တရုတ်ရိုးရာ ရှေးဟောင်းဆေးကျမ်းများနှင့်အညီဖြစ်ကြောင်း အဆိုပါကုမ္ပဏီက ထုတ်ပြန်သည်။

တရုတ်ပြည်၊ ကွမ်တုံပြည်နယ်၊ ဖိုရှန်မြို့တွင် ညီနောင်သုံးဖော် (Three Brothers) အမည်ရှိ စက်ယန္တရား ထုတ်လုပ်ရေးကုမ္ပဏီက စည်းကမ်းထိန်းသိမ်းရန်၊ စွမ်းဆောင်ရည်မြှင့်တင်ရန်နှင့် မှန်ကန်သော လုပ်ငန်းခွင်စိတ်ထားရှိစေရန်ဟုဆိုကာ ဖေဖော်ဝါရီ ၁၁ ရက်တွင် အိမ်သာအသုံးပြုမှု စီမံခန့်ခွဲရေးစည်းမျဉ်းကို ထုတ်ပြန်ခဲ့သည်။

“အဝါရောင်ဧကရာဇ်၏ ခန္ဓာဗေဒကျမ်း” (တရုတ်ဘာသာအားဖြင့် ဟွမ်တိ နိကျီန်) ဟုခေါ်သည့် ရှေးဟောင်းဆေးကျမ်းတစ်ခုကို ကုမ္ပဏီက ရည်ညွှန်း ပြောဆိုသည်။

(မှတ်ချက်။ iMyanmarHouse.com ၏ လေ့လာချက်အရ ဟွမ်တိ နိကျီန်သည် တရုတ်ရိုးရာ တိုင်းရင်းဆေး၏ မူလဘူတဟုဆိုနိုင်ပြီး စာပေဖြင့် ရေးသားဖော်ပြသည့် ဆေးကျမ်းများတွင် အစောဆုံးဖြစ်သည်ဟု ယူဆရသည်။ ခရစ်တော်မပေါ်မီ ၄၇၅ နှစ်မှ ၂၂၁ နှစ်အကြား ပေါ်ပေါက်ခဲ့ခြင်း ဖြစ်သည်။ထိုဆေးကျမ်းတွင် ဆုဝမ်နှင့် လင်ရှုဟူ၍ အခန်း ၂ ခန်းခွဲထားသည်။ ချီဓာတ်၊ ယင်ယန်သဘောတရား၊ ဓာတ်ကြီး ၅ ပါး၊ ကျန်းဖူ အင်္ဂါ ၆ ပါးတည်းဟူသော နှလုံး၊ အသည်း၊ သရက်ရွက် ၊ အဆုတ်၊ ကျောက်ကပ်နှင့် အစာအိမ်တို့အကြောင်း ဖော်ပြထားသည်။ထို့အပြင် ကျန်းမာရေးအတွက် အရေးကြီးသော လမ်းညွှန်ချက်များလည်း ဆေးကျမ်းတွင် ပါဝင်ရာ အသီးအရွက် များများစားရန်၊ အိပ်ရေးဝဝအိပ်ရန်နှင့် လေ့ကျင့်ခန်းပုံမှန်လုပ်ရန်ဟူသော အကြံပြုချက်များ ပါဝင်သည်))

ကုမ္ပဏီတွင် ယခုစည်းမျဉ်းချမှတ်ရခြင်းမှာ ဝန်ထမ်းများ၏ ကျန်းမာရေးအတွက်ဖြစ်ကြောင်း ညီနောင်သုံးဖော်က ထုတ်ပြန်သည်။

ကုမ္ပဏီ၏ မူဝါဒအရ ဝန်ထမ်းများအနေဖြင့် အိမ်သာကို မနက် ၈ နာရီမတိုင်မီ၊ မနက် ၁၀း ၃၀ မှ ၁၀း၄၀ ၊ မွန်းတည့် ၁၂ နာရီမှ ၁း၃၀ ကြား၊ နေ့လယ် ၃း၃၀ မှ ၃း၄၀၊ ညနေ ၅း၃၀ မှ ၆ နာရီကြား အသုံးပြုနိုင်သည်ဟု ဆိုသည်။ အချိန်ပိုဆင်းရသည့် ဝန်ထမ်းများအနေဖြင့် ည ၉ နာရီနောက်ပိုင်း အိမ်သာကို အသုံးပြုနိုင်သည်ဟု ဆိုသည်။

အထက်ပါ သတ်မှတ်ချိန်များတွင်မဟုတ်ဘဲ အရေးပေါ် အပေါ့သွားလိုပါက သွားနိုင်သော်လည်း အိမ်သာကို ၂ မိနစ်သာ အသုံးပြုရမည်ဖြစ်ကြောင်း သတ်မှတ်ထားသည်။

(ဝန်ထမ်းများအနေဖြင့် သတ်မှတ်အချိန် အပိုင်းအခြား၏ ပြင်ပတွင် အိမ်သာကို အသုံးပြုနိုင်သော်လည်း ၂ မိနစ်သာ အသုံးပြုရန် သတ်မှတ်ထားသည်။ ဓာတ်ပုံ-Shutterstock)

ကန့်သတ်ထားသော အချိန်ကာလအတွင်း အိမ်သာအသုံးပြုရန် ခန္ဓာကိုယ်လိုအပ်ချက် အထူးရှိသော ဝန်ထမ်းများအနေဖြင့် HR ဌာနတွင် ခွင့်ပြုချက်တောင်းခံကာ အသုံးပြုနိုင်သော်လည်း အိမ်သာသုံးစွဲသည့်ကာလအတွက် လစာဖြတ်တောက်ခံရမည် ဖြစ်သည်။

အထက်ပါ စည်းမျဉ်းအတွက် စောင့်ကြည်ကင်မရာများဖြင့် စောင့်ကြည့်ထားမည်ဖြစ်ပြီး စည်းကမ်းချိုးဖောက်သူများကို ယွမ်ငွေ ၁၀၀ ဒဏ်ငွေချမှတ်မည်ဟု ဆိုသည်။

ဖေဖော်ဝါရီလကုန်အထိ အစမ်းကာလအဖြစ် အဆိုပါစည်းမျဉ်းကို စမ်းသပ်ထားပြီး မတ်လ ၁ ရက်မှ စတင်ကာ တရားဝင်အကောင်အထည်ဖော်မည်ဟုဆိုသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: China firm enforces 2-minute toilet breaks and specific time slots based on ancient text

Photo Credit-Shutterstock