နယူးယောက်မှာ ဖောင်ဒေးရှင်း မခိုင်ဘဲ ဆောက်လုပ်ခဲ့တာကြောင့် ပေပေါင်း ၆၇၀ အမြင့်အထိ ဆောက်လုပ်ပြီးမှ စောင်းစောင်းကြီးဖြစ်သွားလို့ စွန့်ပစ်ခံထားရတဲ့ မိုးမျှော်တိုက်ကြီး

ကမ္ဘာပေါ်တွင် အိမ်ခြံမြေဈေးအကြီးဆုံးနေရာများ၌ တစ်ခုအပါအဝင်ဖြစ်သော နယူးယောက်မြို့လယ် မန်ဟက်တန်အရပ်တွင် ၆၇၀ ပေ မြင့်မားသော မိုးမျှော်တိုက်ကြီးကို luxury living အား အဓိပ္ပာယ်ဖွင့်ဆိုပေးမည့် အဆောက်အအုံကြီးတစ်ခုအဖြစ် မျှော်ရည်ကာ ဆောက်လုပ်ခဲ့သော်လည်း ဆောက်လက်စတန်းလန်းဖြင့် စွန့်ပစ်ခံလိုက်ရသည်။

နယူးယောက်မြို့လယ် ဘဏ္ဍာရေးရပ်ကွက်ကို စီးမိုးတွေ့မြင်ရမည့် မိုးမျှော်တိုက်ကြီးကို Tower 1 Seaport ဟု အမည်ပေးထားပြီး မှန်သားအတိပြီးသည့် လူနေ အထပ်မြင့်အဆောက်အအုံကြီးဖြစ်ကာ အထပ်ပေါင်း ၆၀ ပါဝင်သည်။

Tower 1 Seaport ၏ ပြဿနာကြီးမှာ စတင် တိမ်းစောင်းစပြုလာနေခြင်း ဖြစ်သည်။

အဆောက်အအုံကြီး ဆောက်လုပ်နေမှု အမြင့်ပေ ၆၇၀ သို့ အရောက်တွင် developer တို့မှာ ခြောက်ခြားဖွယ် လွဲချော်မှုကြီးကို စတင်သတိပြုမိခဲ့သည်။

အဆောက်အအုံ မြောက်ဘက်ရှိ ဆလပ်ပြားစွန်းမှာ ၈ လက်မခန့်အထိ စောင်းနေသည်ကို တွေ့ရှိခဲ့ခြင်း ဖြစ်သည်။

အဆိုပါတွေ့ရှိမှုကြောင့် Fortis Property Group ၏ high-profile စီမံကိန်းကြီး နိဂုံးချုပ်စေခဲ့သည်။

နယူးယောက်၏ နှလုံးသည်းပွတ်ဖြစ်လာစေရန် ရည်မှန်းခဲ့သည့် စီမံကိန်းကြီးမှာ အင်ဂျင်နီယာ ဖြတ်လမ်းလိုက်မှု၊ အတွက်အချက်မှားယွင်းမှုတို့ကြောင့် တန်ဖိုးကြီးကြီး ပေးဆပ်လိုက်ရသည့် ကြေကွဲဖွယ် ပြယုဂ်တစ်ခု ဖြစ်လာသည်။

((အထိနာစေခဲ့သည့် အားနည်းချက်- Tower 1 Seaport အဆောက်အအုံကြီးအောက်ခံ မြေသား))

မန်ဟက်တန်အရပ်မှ မိုးမျှော်တိုက်တို့သည် အထပ်မြင့် အဆောက်အအုံများအတွက် အထူးသင့်တော်သော အောက်ခံကျောက်သားအမာလွှာပေါ်တွင် ဆောက်လုပ်ထားကြခြင်း ဖြစ်သည်။

ပုံမှန်အားဖြင့် မိုးမျှော်တိုက်များကို အောက်ခံ အမာခံ ကျောက်လွှာသို့ ရောက်သည်အထိ pile နက်နက် စိုက်ထားပြီး သံမဏိချောင်းတို့၏ ထောက်မမှုဖြင့် ဖောင်ဒေးရှင်း အခိုင်အမာယူကာ ဆောက်လုပ်ကြသည်။

ပုံမှန်အားဖြင့် မြေအောက် ၁၅ မီတာအနက်အထိ pile ချလေ့ရှိသည်။

သို့သော် Maiden Lane တွင်ရှိသော Tower 1 Seaport အဆောက်အအုံကြီး ဆောက်လုပ်သည့် မြေကွက်နေရာမှာ ပုံမှန်မြေမျိုး မဟုတ်ချေ။

(Tower 1 Seaport အဆောက်အအုံကြီး။ ဓာတ်ပုံ-Wikimedia Commons)

အဆိုပါနေရာသည် ရှေးယခင် ၁၇ ရာစုခန့်က ဒတ်ချ်တို့ နယ်ချဲ့ကာ အခြေချခဲ့သော ဒေသတစ်ခု ဖြစ်၏။

ဒတ်ချ်တို့သည် မန်ဟက်တန်ရှိ ကမ်းခြေနေရာကို ကျောက်တုံးများ၊ သဲများဖို့ကာ မြေနေရာချဲ့ထွင်ခဲ့ကြသည်။

ရေထဲသို့ အမှိုက်များဖို့၍ပင် မြေချဲ့ကြသည်။

Tower 1 Seaport အဆောက်အအုံကြီး ဆောက်လုပ်ထားသည့်နေရာသည် ရှေးယခင်က ဒတ်ချ်တို့ လုပ်ဆောင်ခဲ့သော ဖို့ထားသော မြေများ၊ သင်္ဘောပျက်အစိတ်အပိုင်းများ၊ စိမ့်မြေရှိခဲ့သည့်နေရာဖြစ်ကာ အောက်ခံမှာ သဲပျော့အလွှာသာဖြစ်သည်။

အောက်ခံမြေအမာမှာ မြေအောက် မီတာ ၅၀ အနက်တွင်သာ ရှိသည်။

ထိုသို့ မြေအနေအထားမကောင်းသော်လည်း နည်းမှန်လမ်းမှန်သာ ဆောက်လုပ်မည်ဆိုပါက မိုးမျှော်တိုက်ကြီးတစ်လုံး ခိုင်ခိုင်မာမာ ဆောက်လုပ်ရန် ဖြစ်နိုင်သည်။

ရာစုနှစ်တစ်ခုခန့်အတွင်း နယူးယောက်တွင် ဆောက်လုပ်ခဲ့သော မိုးမျှော်တိုက်တို့မှာ အောက်ခံမြေမာအလွှာအထိ သံမဏိ pile များ နက်နက်သွင်းကာ ဆောက်လုပ်ခဲ့ကြခြင်း ဖြစ်သည်။

သို့သော် pile ရိုက်သွင်းခြင်းများမှာ ဥပဒေကြောင်း ရင်ဆိုင်နေရဆဲ ပြဿနာ အရှုပ်အထွေးများစွာ ရှိနေခြင်းကြောင့် Fortis Property Group က Tower 1 Seaport ကို ဆောက်လုပ်ရာတွင် အကုန်အကျသက်သာသော Soil improvement ဟုခေါ်သည့် နည်းစနစ်ကို သုံးခဲ့သည်။

အောက်ခံမြေမာအထိ pile မသွင်းဘဲ မြေပျော့လွှာအတွင်း ကွန်ကရစ်များ လောင်းထည့်ခဲ့ခြင်း ဖြစ်သည်။

ထိုနည်းလမ်းဖြင့် လုပ်ဆောင်သောကြောင့် ဒေါ်လာ ၅၆ သန်းခန့် အကုန်အကျ သက်သာခဲ့သည်။

ထိုသို့ ဖောင်ဒေးရှင်းမခိုင်ဘဲ ဆောက်လုပ်သောကြောင့် အဆောက်အအုံကြီးမှာ သိသိသာသာ စောင်းနေသည်ကို သတိပြုမိချိန်ရောက်သည့်တိုင် ဆောက်လုပ်မှု မရပ်တန့်ဘဲ ဆက်လုပ်အကောင်အထည်ဖော်ခဲ့သည်။

Developer တို့က အပေါ်တွင် ဆက်လက်ဆောက်လုပ်သည့်အထပ်များကို ဆန့်ကျင်ဘက် လားရာသို့ ပြန်တည့်မတ်ကာ ဆောက်လုပ်ခဲ့ကြသည်။

ထိုသို့လုပ်ဆောင်သော်လည်း အလုပ်မဖြစ်ခဲ့ဘဲ ၂၀၂၀ ပြည့်နှစ်၊ ဇူလိုင်လတွင် တရားစွဲခံရမှုများ ရင်ဆိုင်ခဲ့ရပြီး စီမံကိန်းကို အကန့်အသတ်မရှိ ရပ်ဆိုင်းလိုက်ကြသည်။

ယနေ့အခါတွင် Tower 1 Seaport အဆောက်အအုံကြီးမှာ ငှက်ပျောသီးတစ်လုံးအသွင် ကွေးကောက်ကောက်ဖြင့် ဆောက်လက်စတန်းလန်း အခြေအနေဖြင့် စွန့်ပစ်ခံထားရတော့သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Ref: New York’s ‘Tower of Pisa’: 200-meter skyscraper left twisted in the middle of Manhattan