ပြင်သစ်နိုင်ငံတွင် အိမ်ငှားက အိမ်လခ မပေးသောကြောင့် အိမ်ရှင်က တံခါးနှင့် ပြတင်းပေါက်များ ဖြုတ်ပစ်

ပြင်သစ်နိုင်ငံမြောက်ပိုင်းတွင် အိမ်ငှားဖြစ်သူက အိမ်လခ မပေးသောကြောင့် အိမ်ရှင်က တံခါးနှင့် ပြတင်းပေါက်များ ဖြုတ်ပစ်ခဲ့သည်။

ရာသီဥတု အလွန်အေးသော ပြင်သစ် ဆောင်းတွင်းတွင် တံခါးများ ဖြုတ်ထားသောကြောင့် အိမ်ငှားများ နေမရဘဲ ထွက်သွားစေရန် အိမ်ရှင်က ကြိုးပမ်းခြင်းလည်း ဖြစ်သည်။

ပြင်သစ်အပါအဝင် ဥရောပ နိုင်ငံများစွာတွင် အိမ်ငှားများ အိမ်လခ မပေးသည့်တိုင် ဆောင်းတွင်း ကာလများတွင် အိမ်ရှင်က နှင်ထုတ်ခွင့် မရှိချေ။

သို့သော် ပြင်သစ်နိုင်ငံမြောက်ပိုင်း Pas-de-Calais ဒေသတွင် နေထိုင်သော အိမ်ရှင်က ဥပဒေကို လက်တစ်လုံးခြားလုပ်ရန် ကြိုးစားနေသည်။

အိမ်ငှားတို့ကို နေအိမ်မှ ထွက်ခွာသွားရန် ပြောစရာမလိုဘဲ ၎င်းတို့ဘာသာ ထွက်သွားစေရန် ကြိုးပမ်းခြင်းလည်း ဖြစ်သည်။

ပြီးခဲ့သော ဒီဇင်ဘာ ၂၀ ရက်က အငှားချထားသည့် နေအိမ်ရှိရာသို့ အလုပ်သမားအဖွဲ့ ရောက်ရှိလာပြီး အိမ်တံခါးနှင့် ပြတင်းပေါက်များ ဖြုတ်ပစ်ခဲ့သည်။

အသစ်ပြန်တပ်မည်ဟု အကြောင်းပြကာ တံခါးများ ဖြုတ်ပစ်ခဲ့ခြင်း ဖြစ်သည်။

အိမ်ငှားတို့က ပြောသည်မှာမူ အလုပ်သမားအဖွဲ့သည် တံခါးများနှင့် ပြတင်းပေါက်များကို ဖြုတ်ရုံသာဖြုတ်ကာ တံခါးသစ် ပြန်မတပ်ကြောင်း၊ တံခါးဟောင်းများကို ကားပေါ်တင်ပြီး မောင်းထွက်သွားကြောင်း ပြောသည်။

ကြောက်မက်ဖွယ် အေးစက်လှသော ဥရောပဆောင်း၏ အအေးဓာတ်ကို နေ့ရောညပါ ရင်ဆိုင်ခဲ့ရသည်။

အိမ်ငှားအမျိုးသမီးက မိမိရင်ဆိုင်နေရသည့် အအေးဒဏ်မှာ အလွန်ဆိုးရွားကြောင်း TF1 Info သတင်းဌာနသို့ ပြောသည်။

အိမ်ရှင်ထံ အကြိမ်ကြိမ် ဆက်သွယ်ခဲ့သော်လည်း အဆက်အသွယ် မရသောကြောင့် အိမ်ငှားအမျိုးသမီးမှာ ထိုအပေါက်များကို ကတ္ထူပြားများဖြင့် လိုက်ပိတ်ခဲ့ရသည်။

ပြင်သစ် သတင်းမီဒီယာတို့က အိမ်ရှင်ထံ ဆက်သွယ် မေးမြန်းရာတွင် အိမ်ရှင်က ၎င်း၏ လုပ်ဆောင်မှုကို ဝန်ခံပြောကြားသည်။

အိမ်ရှင်က ပြောသည်မှာ အိမ်ငှားသည် အိမ်လခများ မပေးသည့်အပြင် စာချုပ်ပါ သဘောတူညီချက်တို့ကို ချိုးဖောက်သောကြောင့် မိမိအနေဖြင့် ယခုကဲ့သို့ လုပ်ဆောင်ခြင်းဖြစ်ကြောင်း ပြောသည်။

“အိမ်ငှား အမျိုးသမီးက ကျွန်တော့်ကို အိမ်လခ ၅ လစာ ပေးစရာရှိပါတယ်။ ပြီးတော့ အိမ်ငှားစာချုပ်မှာ အိမ်အာမခံကြေး ပေးသွင်းဖို့ သဘောတူထားပေမယ့် အိမ်ငှားဘက်က ပျက်ကွက်ခဲ့ပါတယ်” ဟု အိမ်ရှင်က France Info သို့ ပြောသည်။

ထိုသို့ အိမ်ရှင်အတွက် နစ်နာမှုများ ရှိသော်လည်း ၎င်း၏ လုပ်ဆောင်မှုမှာ ပြင်သစ်အိမ်ခြံမြေ ဥပဒေအရ ဥပဒေကို ချိုးဖောက်မှု ဖြစ်နေသည်။

ပြင်သစ် အိမ်ရှင်များအသင်းက အိမ်ရှင်များ အိမ်လခမရသည့် စိတ်ပျက်ဖွယ် အခြေအနေ ရင်ဆိုင်ရမှု များစွာရှိနေကြောင်း၊ သို့သော် အိမ်ငှားများ ထွက်သွားစေရန် တံခါးနှင့် ပြတင်းပေါက်များ ဖြုတ်ပြစ်ခြင်းမှာ ဥပဒေနှင့် ငြိစွန်းနေကြောင်း ပြောသည်။

ယခုအခါ အဆိုပါ အိမ်ငှားခ ဘေးကင်းလုံခြုံမှုရှိသော နေရာချထားပေးရန် တရားရုံးတွင် တင်ပြထားသည်။

ပြင်သစ်နိုင်ငံတွင် ဆောင်းရာသီအတွင်း နှင်ထုတ်မှု တင်းတင်းကျပ်ကျပ် တားမြစ်ထားသည့်ကြားမှ အိမ်ရှင်နှင့် အိမ်ငှားတို့ကြား ဖြစ်ပေါ်နေသည့် စိန်ခေါ်မှုများကို ယခုဖြစ်ရပ်က ပြသနေသည်။

အာဏာပိုင်တို့က ယခုဖြစ်ရပ်ကို စုံစမ်းစစ်ဆေးနေပြီး ဥပဒေပညာရှင်တို့က အိမ်ရှင်တို့အနေဖြင့် ဥပဒေနှင့် ငြိစွန်းသော နည်းလမ်းများ မသုံးရန် သတိပေးထားသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Homeowner Removes Doors and Windows After Tenants Stop Paying Rent