တရုတ်ပြည်တွင် တိုက်ခန်းငှားရမ်းနေထိုင်သူတစ်ဦးက ကြက်ခြံအဖြစ် ပြောင်းလဲကာ ကြက်များ မွေးမြူထားရာ အိမ်ရှင်မှာ များစွာ တုန်လှုပ်ခဲ့ရ

တရုတ်ပြည်တွင် တိုက်ခန်းငှားရမ်းနေထိုင်သူတစ်ဦးက ကြက်ခြံအဖြစ် ပြောင်းလဲကာ ကြက်များ မွေးမြူထားရာ အိမ်ရှင်မှာ များစွာ တုန်လှုပ်ခဲ့ရ

တရုတ်ပြည် ရှန်ဟိုင်းမြို့တွင် နေထိုင်သော အိမ်ရှင်တစ်ဦးက သူ၏ တိုက်ခန်းအကြောင်း လူမှုကွန်ရက်တွင် မျှဝေခဲ့ရာ ပြည်မကြီး လူမှုကွန်ရက်သုံးစွဲသူတို့အကြား ဂယက်ရိုက် ပျံ့နှံ့လျက် ရှိသည်။

တိုက်ခန်းငှားရမ်းနေထိုင်သော အိမ်ငှားခ ကြက်အကောင်ရေ များစွာ မွေးမြူခဲ့ပြီး ကြက်ခြံအဖြစ် ပြောင်းလဲခဲ့ခြင်း ဖြစ်သည်။

အမည်မဖော်သော အိမ်ရှင်သည် ၎င်းအငှားချထားသော တိုက်ခန်းသို့ မရောက်ဖြစ်ခဲ့သည်မှာ ၂ နှစ်ရှိခဲ့ပြီ ဖြစ်သည်။

ယခုလအစောပိုင်းတွင် ထိုအခန်းသို့ ရောက်ရှိခဲ့ပြီး တံခါးဖွင့်လိုက်ချိန်၌ တွေ့လိုက်ရသော မြင်ကွင်းမှာ အိမ်ရှင်ဖြစ်သူအား ကြက်သေ သေသွားစေခဲ့ကြောင်း Dianshi News သတင်းဌာနက ဖော်ပြသည်။

ဧည့်ခန်းတွင် ကြက်လှောင်အိမ်များဖြင့် အပြည့်ဖြစ်နေပြီး တခန်းလုံး ကြက်များလှည့်လည်သွားလာခြင်း၊ အတောင်တဖျပ်ဖျပ်ရိုက်ကာ မြူးတူးခုန်ပေါက်ပျံသန်းနေခြင်းများ တွေ့လိုက်ရကြောင်း အိမ်ရှင်က ပြောသည်။

“နံဟောင်နေတာပါ။ ကြမ်းပြင်တွေရော..နံရံတွေရော ဆိုးဆိုးရွားရွား ပျက်စီးနေပါတယ်။ တစ်ခန်းလုံးကို အလုံးစုံ ပြန်ပြင်မှ ရတော့မှာပါ။ အဲ့လိုမှ မလုပ်ရင် လူနေလို့ မရနိုင်တော့ပါဘူး” ဟု အိမ်ရှင်က ပြောသည်။

“ကျွန်တော် တော်တော်ဒေါသထွက်ပါတယ်။”

(သားနားသော ဧည့်ခန်းတွင် အိမ်ငှားခ ကြက်လှောင်အိမ်များ အပြည့်ထားရှိကာ နံစော်သော ကြက်ခြံအဖြစ် ပြောင်းလဲခဲ့သည်။ ဓာတ်ပုံ-Sohu )

အိမ်ရှင်က ဆက်လက်ပြောပြသည်မှာ ပြီးခဲ့သော ၂ နှစ်တာအတွင်း မိမိရရှိခဲ့သော စုစုပေါင်း အိမ်လခထက် အဆပေါင်းများစွာ သုံးစွဲကာ ပြန်လည်ပြုပြင်ရတော့မည်ဖြစ်ကြောင်း ပြောသည်။

အိမ်ငှား၏ အမည်နှင့် အချက်အလက်များကိုမူ မသိရချေ။

အိမ်နီးချင်းအနီးဝန်းကျင်တွင် နေထိုင်သော မျိုးရိုးအမည် ဝူဟုခေါ်သည့် အမျိုးသမီးတစ်ဦးက ပြောသည်မှာ မိမိနှင့် အနီးဝန်းကျင်ရှိ အခြားသူတို့က အဆိုပါအခန်း၏ အနံ့ဆိုးများနှင့် ပတ်သက်ပြီး အိမ်ရာ အုပ်ချုပ်ရေးအဖွဲ့ထံ တိုင်တန်းခဲ့ကြောင်း ပြောသည်။

“အဲလို တိုင်တန်းခဲ့ပေမဲ့ ပြောင်းလဲသွားတာဆိုလို့ အဲဒီအိမ်ငှားက ပြတင်းပေါက်တွေ အကုန်လုံး ပိတ်ထားခဲ့တာ ပဲ ရှိပါတယ်။ အိမ်ရှင်ရောက်လာတဲ့ အချိန်မှာ အခန်းက ဆိုးဆိုးရွားရွား ပျက်စီးနေပါပြီ”ဟု ဝူက ပြောသည်။

အိမ်ရှင်က အဆိုပါ အိမ်ငှားကို မည်သို့ ဖြေရှင်းရမည့်အကြောင်း လူမှုကွန်ရက်တွင် အကြံဉာဏ်တောင်းခဲ့သည်။

Jilin Subang ဥပဒေအဖွဲ့မှ ရှေ့နေတစ်ဦးဖြစ်သူ ကျန်းယင်က ပြောသည်မှာ တရုတ်ပြည်၏ တရားမ ဥပဒေအရ အိမ်ငှားသည် နေအိမ်အသုံးပြုပုံ ပြောင်းလဲခဲ့ပါက အိမ်ရှင်အနေဖြင့် အငှားစာချုပ်ကို ဖျက်သိမ်းနိုင်ကြောင်း ပြောသည်။

“အိမ်ငှားစာချုပ်မှာ နေအိမ်ကို ဘယ်လို အသုံးပြုရမယ်ဆိုတဲ့အချက် ထည့်မရေးထားရင်တောင်မှ အိမ်ရှင်အနေနဲ့ အိမ်ငှားကို အလျော်တောင်းလို့ ရပါတယ်။ ဘာကြောင့်လဲဆိုတော့ အိမ်ငှားကြောင့် နေအိမ် ပျက်စီးသွားလို့ ဖြစ်ပါတယ်”ဟု ကျန်းယင်က Jilin TV သို့ ပြောသည်။

အဆိုပါ ဖြစ်ရပ်မှာ တရုတ် ပြည်မကြီး လူမှုကွန်ရက် သုံးစွဲသူတို့အကြား အလွန်ပျံ့နှံ့ခဲ့သည်။

(ကြက်လှောင်အိမ်များဖြင့် မပျက်စီးသေးမီက ဧည့်ခန်း၏ မြင်ကွင်းကို တွေ့ရပုံ။ ဓာတ်ပုံ-Sohu)

“အိမ်ငှားက တကိုယ်ကောင်းဆန်လွန်းပါတယ်။ ကိုယ့်အိမ်မဟုတ်ဘူးလို့ သိထားရင် ဆင်ဆင်ခြင်ခြင် နေထိုင်ပြုမူသင့်ပါတယ်။ သူ့လုပ်ရပ်အတွက် သူပြန်ပေးဆပ်သင့်တယ်” ဟု လူမှုကွန်ရက်သုံးစွဲသူတစ်ဦးက မှတ်ချက်ပြုသည်။

အခြားတစ်ဦးကမူ “ဒီလိုအနေအထားမျိုးမှာ အဲ့လူ ဘယ်လိုနေနိုင်လဲမသိဘူး။ ဒီလောက် အနံ့ဆိုးတွေကို သူဘယ်လို ခံနိုင်လဲ” ဟု ဆိုသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: China renter converts flat into chicken farm, causing foul odor, damage to property Photo Credit-Sohu