ပြည်ပ အိမ်ခြံမြေ သတင်း | Posted by နှင်းအိခင်
မြို့ပြလူနေမှုတွင် အသက်ပင် ဝဝရှူမရသည့် အခန်းကျဉ်းကလေးများဖြင့် နေထိုင်ဖြတ်သန်းရသော်လည်း ဈေးနှုန်းမှာ ခေါင်ခိုက်နေပြီး အိမ်ငှားဈေးကွက်မှာ ရက်စက်လွန်းလှသည်။
ထိုအခြေအနေထက် ပိုမိုကျပ်တည်းစွာ လှေကားခွင်အောက်တွင် နေထိုင်ရမည်ဆိုလျှင် မည်သို့ရှိမည်နည်း။
အမေရိကန်ပြည်၊ San Jose သည် ကမ္ဘာ့နည်းပညာဗဟိုချက်ဟုဆိုနိုင်သော Silicon Valley တည်ရှိသည့်နေရာဖြစ်ကာ အိမ်ခြံမြေအလွန်ဈေးကြီးသည်။
ယခုအခါ San Jose မှ အမျိုးသားတစ်ဦးက သူ၏ အိမ်ခန်းမှ လှေကားခွင်နေရာကို တစ်လလျှင် ဒေါ်လာ ၂၅၀ ဖြင့် CraigsList အိမ်ခြံမြေဝက်ဘ်ဆိုက်မှတဆင့် အငှားဈေးကွက်တင်လာသည်။
အကျယ်အဝန်းမှာ ၃ ပေ×၁၀ ပေသာရှိပြီး လက်ရှိအားဖြင့် အကာအရံ တံခါးမျိုး မရှိ။
ဈေးကွက်တင်ကြော်ငြာတွင် ဖော်ပြသည်မှာ ယာယီအကာအရံတစ်ခုခုဖြင့် ကာနိုင်ကြောင်းဖော်ပြထားရာ privacy အပြည့်အဝ ရရှိမည်ကား မဟုတ်ချေ။
ငှားရမ်းမည့် လှေကားခွင်အောက်နေရာမှာ အိပ်ခန်း ၁ ခန်း၊ ရေချိုးခန်း ၁ ခန်းပါ တိုက်ခန်းတွင် တည်ရှိသည်။
ယခုအငှားချမည့်သူမှာလည်း အိမ်ငှားတစ်ဦးသာဖြစ်ပြီး အိမ်ငှားခ ဈေးနှုန်းမြင့်တက်မှုကြောင့် အိမ်လခ သက်သာစေရန် လှေကားခွင်နေရာကို ပြန်လည်အငှားချလာခြင်း ဖြစ်သည်။
Bay Area News Group သတင်းဌာနက အဆိုပါအငှားကြော်ငြာကို စုံစမ်းလေ့လာခဲ့ရာ မှန်ကန်ကြောင်း သိရှိရသည်။
ကြော်ငြာတင်သူ အမျိုးသားက သူ၏အမည်ကို Jason ဟုသာ ဖော်ပြခွင့်ပြုခဲ့သည်။ အကြောင်းမှာ သူ၏ အခန်းကို ပြန်လည်အငှားချထားခွင့် မရှိသောကြောင့် ဖြစ်၏။
ထိုလှေကားခွင်နေရာတွင် ငှားရမ်းနေထိုင်မည့်သူမှာ အမျိုးသမီးဖြစ်စေ၊ အမျိုးသားဖြစ်စေ အဆင်ပြေကြောင်း ၎င်းက ပြောသည်။
သို့သော် ရာဇဝတ်မှု မှတ်တမ်းရှိသူ၊ မူးယစ်ဆေးတစ်ခုခု စွဲလမ်းသူ၊ အိမ်မွေးတိရ စ္ဆာန်ရှိသူများကို ငှားမည်မဟုတ်ကြောင်း ၎င်းက ပြောသည်။
အကယ်၍ သင့်အနေဖြင့် မိတ်ဆွေသူငယ်ချင်းများကို အလည်အပတ်ခေါ်လိုသည်ဆိုပါကလည်း ယခုနေရာကို မငှားသင့်ချေ။
Jason က ဧည့်သည်များ လာရောက်ခြင်းကို ခွင့်မပြုဟု ဆိုသည်။
“အဲဒီကိစ္စအတွက်တော့ စိတ်မကောင်းပါဘူး။ ဒါပေမယ့် ဒီလိုနေရာကိုလည်း ဘယ်သူက အလည်လာချင်မှာလဲ” ဟု Jason က ပြောသည်။
မီးဖိုဆောင်နှင့် ရေချိူးခန်းကိုမူ မျှဝေသုံးစွဲရမည် ဖြစ်သည်။
(ဟယ်ရီပေါ်တာကဲ့သို့ လှေကားခွင်အောက်တွင် နေထိုင်ရမည် ဖြစ်သည်။ ဓာတ်ပုံ-Warner Bros)
“ကျွန်တော့် အသုံးအဆောင်ပစ္စည်းတွေက ခင်ဗျားရဲ့ အသုံးအဆောင်ပစ္စည်းပါပဲ။ ကျွန်တော့်ရဲ့ ဇွန်း၊ ပန်းကန်တွေ သုံးနိုင်ပါတယ်။ ကျွန်တော့်ရဲ့ TV နဲ့ Xbox တွေ အသုံးပြုနိုင်ပါတယ်။ Warhammer 40000 ဂိမ်းရုပ်တွေကို ကျွန်တော့်ဆေးတွေယူပြီး ဆေးခြယ်နိုင်ပါတယ်။ ဒါပေမယ့် စုတ်တံတော့ မပါပါဘူး”
ထိုလှေကားခွင်နေရာကို ငှားရမ်းရန် စိတ်ဝင်စားသူအနေဖြင့် email ၏ subject နေရာတွင် သင့်အကြိုက်ဆုံး ဗွီဒီယိုဂိမ်းနာမည်ကို ရေးသားရမည်ဖြစ်ပြီး ထိုသို့ မရေးပါက သင့်ထံ အကြောင်းပြန်မည်မဟုတ်ဟု ဆိုသည်။
လှေကားခွင်နေရာ ငှားရမ်းခွင့်ရရှိသူသည် အိမ်သန့်ရှင်းရေးကို တစ်ပတ်လျှင် ၂ ကြိမ်လုပ်ရမည်ဟုလည်း ဆိုသည်။
သို့သော် အောက်ထပ်ကိုသာ သန့်ရှင်းရေးလုပ်ရမည်ဖြစ်ပြီး မိနစ် ၃၀ ခန့်သာကြာကြောင်း Jason က ပြောသည်။
Jason ရွေးချယ်ခံရသော ငှားရမ်းမည့်သူသည် Dungeons and Dragons ဂိမ်းကို ကစားကြည့်ရန် Jason က ကမ်းလှမ်းထားသည်။
San Jose တွင် ပျမ်းမျှ အိမ်လခမှာ ဒေါ်လာ ၃၃၂၃ ဖြစ်သည်။
ဆန်ဖရန်စစ္စကိုသည် အမေရိကတွင် အခြားဒေသများထက် အိမ်လခ ဈေးကြီးသည်။
Forbes မဂ္ဂဇင်းကြီး၏ ဖော်ပြချက်အရ အမေရိကန်ပြည်တစ်ခုလုံးတွင် ပျမ်းမျှအိမ်လခမှာ တစ်လလျှင် ၁၃၇၂ ဒေါ်လာ ဖြစ်သည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: A man is renting the nook under his stairs for £192 a month (metro) Photo Credit-Warner Bros
