ကမ္ဘာကျော်တင်းနစ်ကြယ်ပွင့် ဗီးနပ်စ်ဝီလျံက တောင်ဖလော်ရီဒါရှိ နေအိမ်ကို ဒေါ်လာ ၂ သန်းခွဲဝန်းကျင်ဖြင့် ရောင်းချ

ကမ္ဘာကျော်တင်းနစ်ကြယ်ပွင့် ဗီးနပ်စ်ဝီလျံသည် အမေရိကန်ပြည်ထောင်စု၊ တောင်ဖလော်ရီဒါရှိ နေအိမ်ကို ဒေါ်လာ ၂ သန်းခွဲဝန်းကျင်ဖြင့် ရောင်းချလာသည်။

ဗီးနပ်စ်ဝီလျံသည် အဆိုပါနေအိမ်ကို လွန်ခဲ့သော နှစ်ပေါင်း ၂၀ ခန့်က ဝယ်ယူခဲ့ခြင်းဖြစ်ပြီး အမေရိကန်သမ္မတ ဒေါ်နယ်ထရမ့်၏ နာမည်ကျော် မာရာလာဂိုစံအိမ်ကြီးတည်ရှိရာ ပန်မ်ဘိခ်ျအရပ်တွင် တည်ရှိပြီး စတုရန်းပေ ၈၀၀၀ ခန့် အကျယ်အဝန်းရှိသည်။

အိပ်ခန်း ၆ ခန်းပါ နေအိမ်တွင် တောင်ဖလော်ရီဒါရှိ ဂန္ထဝင်စံအိမ်တစ်လုံးတွင် ရှိသင့်သည့် အရာများအားလုံး ပါဝင်သည်ဟု ဆိုသည်။

ပန်မ်ဘိခ်ျရှိ ဂေါက်ကွင်းဇုန်းအတွင်းတည်ရှိခြင်းဖြစ်ရာ BallenIsles Country Club တွင် အကျယ်ဝန်းဆုံးမြေနေရာဖြစ်ပြီး တစ်ဧကခန့် အကျယ်အဝန်းရှိသည်။ ညီမဖြစ်သူ ဆရီနာ ဝီလျံသည်လည်း ယခုနေအိမ်အနီးတွင်ပင် နေအိမ်တစ်လုံးပိုင်ဆိုင်ထားသည်။

မစ္စက် ဝီလျံသည် အသက် ၃၈ နှစ်ရှိပြီဖြစ်ပြီး ယခုနေအိမ်ကို ပိုင်ဆိုင်ထားသည်မှာ ဆယ်စုနှစ် ၂ ခုကျော်ရှိခဲ့ပြီဖြစ်သည်။

၁၉၉၈ ခုနှစ်တွင် ကန်ဒေါ်လာ ၅၂၅၀၀၀ ဖြင့် ဝယ်ယူခဲ့ခြင်းဖြစ်ပြီး ဝယ်ယူပြီး ၂ နှစ်ခန့်အကြာတွင် စတုရန်းပေ ၈၅၀၀ ကျယ်ဝန်းသော စံအိမ်ကြီးကို ဆောက်လုပ်ခဲ့ခြင်းဖြစ်သည်ဟု အိမ်ခြံမြေမှတ်တမ်းများတွင် ဖော်ပြသည်။

ခြံဝန်းအတွင်း အပန်းဖြေစခန်းဟန် ဆောက်လုပ်ထားသည့် ရေကူးကန်နှင့် spa တို့နှင့်အတူ ရှုခင်းကြည့်ရန်နေရာတစ်ခုနှင့် ရေကန်ကို စီးမိုးရှုမြင်ရမည့် စတုရန်းပေ ၅၀၀၀ ကျယ်ဝန်းသော patio တို့ ပါဝင်သည်။

နှစ်ထပ်အဆောက်အအုံအတွင်း ကြမ်းပြင်မှ မျက်နှာကြက်ထိ မြင့်မားသည့် ပြတင်းပေါက်များတွေ့ရပြီး ပင်မဧည့်ခန်းများတွင် စကျင်ကျောက် ကြမ်းပြင်များ ခင်းကျင်းထားကာ အိပ်ခန်းများတွင်မူ သစ်မာသားကြမ်းခင်းများခင်းထားသည်။

ထို့အပြင် အိမ်တွင်းရုပ်ရှင်ရုံ၊ စာဖတ်ခန်း၊ အားကစားလေ့ကျင့်ရေးခန်းမတို့လည်း ပါဝင်ပြီး ဒုတိယထပ်တွင်မူ ဧည့်သည်များ တည်းခိုရန် အခန်းများထည့်သွင်းပေးထားသည်။ အရောင်းဈေးကွက်တင်ခဲ့သည်မှာ Leibowitz Realty Group မှ အကျိုးဆောင်များဖြစ်ကြသော အင်ဒရူးနှင့် မိုက်ကယ် လိုင်ဘိုဝစ်ဇ်တို့ ဖြစ်ကြသည်။

Credit: iMyanmarHouse.com (iMyanmarHouse.com Team မှ ရေးသား ဖော်ပြသည်။)