မြန်မာနိုင်ငံ အစိုးရသစ် ကာလအတွင်း နိုင်ငံတော် သမ္မတ ဦးထင်ကျော်က အထူးစီးပွားရေးဇုန်ဆိုင်ရာ ဗဟိုအဖွဲ့နှင့် ဗဟိုလုပ်ငန်းအဖွဲ့တို့ကို ဖွဲ့စည်းခဲ့ပြီး ဒုတိယ သမ္မတ ဦးဟင်နရီဗန်ထီးယူနှင့် စီးပွားရေးနှင့်ကူးသန်းရောင်းဝယ်ရေး ၀န်ကြီး ဦးသန်းမြင့် တို့ကအသီးသီး ဦးဆောင်ကြမည်ဖြစ်သည်။
နိုင်ငံတော် သမ္မတရုံးက ယင်းအဖွဲ့များ ဖွဲ့စည်းခြင်းကို သြဂုဏ်လ ၁၅ ရက်နေ့က ထုတ်ပြန်ကြေငြာခဲ့သည်။ မြန်မာအထူးစီးပွားရေးဇုန်ဆိုင်ရာ ဗဟိုအဖွဲ့တွင် ပြည်ထောင်စု ၀န်ကြီးအဆင့် ၁၅ ဦး ပါဝင်ပြီး ၎င်းတို့က အထူးစီးပွားရေးဇုန် တည်ထောင်ခြင်းအတွက် အဆိုပြုချက်၊ သင့်လျော်သည့် နေရာ၊ လိုအပ်သည့် နယ်မြေ ဧရိယာ၊ အကျယ်အဝန်းနှင့် နယ်နိမိတ် ပိုင်းခြား သတ်မှတ်ချက်တို့ကို သက်ဆိုင်ရာ အစိုးရဌာန၊ အဖွဲ့အစည်းများ၏ သဘောထား ရယူ စိစစ်ပြီး ပြည်ထောင်စု အစိုးရအဖွဲ့သို့ တင်ပြရမည်ဖြစ်သည်။
ထိုဗဟိုအဖွဲ့က ဗဟို လုပ်ငန်းအဖွဲ့များနှင့် စီမံခန့်ခွဲမှု ကော်မတီများ ဖွဲ့စည်းပြီး စီမံကိန်းများ ချမှတ်ခြင်းနှင့် စီးပွားရေးဇုန်အလိုက် ရင်းနှီးမြှုပ်နှံမှု လုပ်ငန်းအမျိုးအစားများသတ်မှတ်ခြင်းနှင့် ရင်းနှီးမြှုပ်နှံသူအား သင့်တော်သော လုပ်ငန်းအဖြစ် သတ်မှတ်ပြီး လုပ်ကိုင်ဆောင်ရွက်ခွင့်ပြုခြင်းတို့ကို ပြုလုပ်ပေးရပါမည်။ ထို့ပြင် ငွေကြေးအမျိုးအစား သတ်မှတ်ခြင်း၊ အခွန်အခများ၊ မြေငှားရမ်းခနှင့် မြေအသုံးပြုခများကို ကင်းလွတ်ခွင့်နှင့် သက်သာခွင့်များ ပေးခြင်းတို့ကို ဆောင်ရွက်ပေးရမည် ဖြစ်သည်။
နိုင်ငံခြားရင်းနှီးမြှုပ်နှံမှုနှင့် ကုမ္ပဏီများ မှတ်ပုံတင်ရေးဌာန (DICA) ၏ညွှန်ကြားရေးမှူးချုပ် မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ဝင် တဦးဖြစ်သော ဦးအောင်နိုင်ဦးက ထိုဗဟို အဖွဲ့သစ် ဖွဲ့စည်းရခြင်းမှာ လုပ်ငန်းသစ်များအတွက် အထူးအလေးပေးဆောင်ရွက်ရန် ဖြစ်ကြောင်းပြောသည်။
“အထူးစီးပွားရေးဇုန် ဥပဒေအရ အဖွဲ့ဝင်ဟောင်းတွေက သူတို့ရဲ့ သက်တမ်းကျော်သွားပါပြီ။ အဲဒါကြောင့် သမ္မတက အဖွဲဝင်အသစ်တွေနဲ့ ဖွဲ့စည်းခဲ့တာပါ။ သူတို့က စီးပွားရေးဇုန်တွေ အသစ်ရော အဟောင်းရော အကုန်လုံးကို ပြန်သုံးသပ်ပါလိမ့်မယ်” ဟု ဦးအောင်နိုင်ဦးက ပြောသည်။
ဗဟိုလုပ်ငန်းအဖွဲ့တွင် ၀န်ကြီးဌာနများမှ အမြဲတမ်းအတွင်းဝန် အပါအ၀င် စုစုပေါင်း အဖွဲ့ဝင် ၁၅ဦး ပါဝင်ပါသည်။
“ဗဟိုအဖွဲ့က မူဝါဒတွေ ရေးဆွဲရမှာဖြစ်ပြီးတော့ ကျနော်တို့ ဗဟိုလုပ်ငန်းအဖွဲ့က လက်တွေ့ကွင်းဆင်းလုပ်ရမှာပါ။ ကျနောတို့ ၂ဖွဲ့ အတူတူဆောင်ရွက်သွားမှာပါ”ဟု ဦးအောင်နိုင်ဦးက ပြောသည်။
သမ္မတဟောင်း ဦးသိန်းစိန်က ယခင်ဗဟိုအဖွဲ့ ဥက္ကဌနှင့် လုပ်ငန်းအဖွဲ့တွင် ဒုတိယ သမ္မတဟောင်း ဦးဥာဏ်ထွန်းက ဥက္ကဌ အဖြစ် တာဝန်ယူခဲ့သော်လည်း လက်ရှိတွင် သမ္မတ ဦးထင်ကျော်က ဗဟိုအဖွဲ့၏ ဥက္ကဌ ရာထူးကိုမူ ယူထားခြင်းမရှိချေ။
လက်ရှိ မြန်မာနိုင်ငံ၏ အကြီးဆုံး စာရင်းဝင်သော အထူးစီးပွားရေးဇုန် အချို့ဖြစ်သည့် ကျောက်ဖြူ၊ ထားဝယ်နှင့် သီလ၀ါ အထူးစီးပွားရေးဇုန်တို့မှာ အခြေခံအဆောက်အအုံအားနည်းခြင်း၊ မြေသိမ်းယူမှုများ၊ လျော်ကြေးပေးမှု ပြဿနာများနှင့် ရင်ဆိုင်ခဲ့ရသည်။
မြန်မာ၊ ထိုင်းနှင့် ဂျပန်အစိုးရတို့က ငွေကြေးထောက်ပံ့ပေးပြီး တနင်္သာရီတိုင်းတွင် တည်ရှိသည့် ရေနက်ဆိပ်ကမ်း ထားဝယ် အထူးစီးပွားရေးဇုန်သည် လူမှုနှင့် သဘာဝပတ်ဝန်းကျင် စိုးရိမ်ပူပန်မှုများကြောင့် ဒေသခံများ၏ အတိုက်အခံပြုဆန့်ကျင်ခြင်းနှင့် နှစ်ပေါင်းများစွာ ရင်ဆိုင်ခဲ့ရပြီး ရင်းနှီးငွေမှာလည်း မကြာသေးမီကမှ ရရှိခဲ့ခြင်းဖြစ်သည်။
တရုတ် ကုမ္ပဏီဖြစ်သော CITIC Group of Companiesက တင်ဒါအောင်မြင်ခဲ့သော ရခိုင်ပြည်နယ်ရှိ ကျောက်ဖြူ အထူးစီးပွားရေးဇုန်သည် နှစ်များစွာကြာအောင် ဆောင်ရွက်ခဲ့သော်လည်း မြေသိမ်းရာတွင် လျော်ကြေးပေးမှု မမျှတခြင်းနှင့် စပ်လျဉ်း၍ ဒေသခံများ၏ တိုင်ကြားမှုများကို ဖြေရှင်းရန် ကျန်ရှိနေပါသေးသည်။
ကျောက်ဖြူ အထူးစီးပွားရေးဇုန်တွင် စက်မှုဇုန်တခု၊ အိမ်ရာတခုနှင့် ရေနက်ဆိပ်ကမ်း၂ခု ပါဝင်ပါသည်။ ရေနံနှင့် သဘာဝဓာတ်ငွေ့ကို တရုတ်နိုင်ငံ၏ သီးခြားတည်ရှိသော အနောက်တောင် ခရိုင်များသို့ တင်ပို့နိုင်သည့် တရုတ်- မြန်မာ ပိုက်လိုင်း စီမံကိန်းမှာ အဓိကသော့ချက်တခုဖြစ်သည်။
ရန်ကုန် လှိုင်သာယာ စက်မှုဇုန် ဥက္ကဌ ဦးမြတ်သင်းအောင်က အထူးစီးပွားရေး ဗဟိုအဖွဲ့သည် အခြေခံအဆောက်အအုံများ ဖွံ့ဖြိုးတိုးတက်ရန် ဦးစားပေးဆောင်ရွက်သင့်ပြီး သဘာဝပတ်ဝန်းကျင် ထိခိုက်ပျက်စီးမှုများကို ထည့်သွင်း စဉ်းစားသင့် ကြောင်း ပြောသည်။
“အခြေခံ အဆောက်အအုံ အားနည်းတာကို ဖွံ့ဖြိုးတိုးတက်အောင် လုပ်တဲ့နေရာမှာ ကျနော်တို့ တိုင်းပြည်အတွက်ရော ရင်းနှီးမြှုပ်နှံသူတွေအတွက်ရော သဘာဝပတ်ဝန်းကျင် ထိခိုက်ပျက်စီးမှုတွေ လေထုညစ်ညမ်းမှုတွေက အကြီးအကျယ် စိုးရိမ်စရာတွေ ဖြစ်လာပါတယ်” ဟုဦးမြတ်သင်းအောင်ကပြောသည်။
Credit : Irrawaddy
