အိန္ဒိယတွင် ဗာရာဏသီမှ ၆၀ ကီလိုမီတာခန့်တွင်ရှိသော စားသောက်ဆိုင်တစ်ခုအနီး ရူပီးငွေ စက္ကူ သိန်းပေါင်းများစွာ လမ်းပေါ် ပြန့်ကျဲနေရာ အုတ်အော်သောင်းတင်းဖြစ်ကာ အနီးဝန်းကျင်ရှိ လူအုပ်ကြီးက ဝိုင်းဝန်းလုယက်ခဲ့ကြ

အိန္ဒိယလူမှုကွန်ရက်သုံးစွဲသူတို့အကြား ဗွီဒီယိုဖိုင်တစ်ခု ပျံ့နှံ့ဂယက်ရိုက်နေပြီး ဥတာ ပရာဒက်ရှ်ပြည်နယ်၊ ကောသမ္ဘီ ခရိုင်ရှိ Kokhraj ရဲစခန်းအနီးတွင် လုယက်မှုဖြစ်ပွားခဲ့ကြောင်း သိရသည်။

အဝေးပြေးကားပေါ်မှ ဆင်းလာသော ကုန်သည်တစ်ဦးထံမှ ပိုက်ဆံအိတ်များကို လူ ၂ ဦးက လုယက်ခဲ့သည်။

ငွေထုတ်များနှင့် ထွက်ပြေးစဉ်တွင် တစ်ထုတ်မှာ အဝေးပြေးလမ်းမပေါ်သို့ ပြုတ်ကျသွားခဲ့ပြီး ငွေစက္ကူများ ပြန့်ကျဲသွားခဲ့ရာ အနီးတွင်ရှိသူများနှင့် လမ်းသွားလမ်းလာများ အုတ်အော်သောင်းတင်းဖြစ်ကာ ငွေစက္ကူများကို ဝိုင်းဝန်းလုယက်ခဲ့ကြသည်။

(ငွေထုတ်များအတွင်း ရူပီး သိန်းပေါင်းများစွာ ပါဝင်သော်လည်း လူအုပ်ကြီးက ဝိုင်းဝန်းလုယက်သွားခဲ့ပြီးနောက် ရူပီး ၄ သိန်း၊ ၅ သိန်းခန့်သာ ပြန်လည်ရရှိခဲ့သည်။ ဓာတ်ပုံ-X/@moliticsindia)

ဗာရာဏသီမှ ဒေလီမြို့သို့သွားသည့် luxury အဝေးပြေးဘတ်စ်ကားသည် ဗာရာဏသီမှ မိုင် ၆၀ ခန့်အကွာ အဝေးပြေးကားများ ရပ်နားလေ့ရှိသော Jaiswal Dhaba အမည်ရှိ စားသောက်ဆိုင်တွင် ည ၉း၃၀ ခန့်၌ ရပ်နားစဉ် ဖြစ်ပွားခဲ့ခြင်း ဖြစ်သည်။

ဂူဂျာရတ်ပြည်နယ် ၊ Patan ခရိုင်တွင် နေထိုင်သော ဘာဗက်ရှ်အမည်ရှိ ဇီယာကုန်သည်ကြီးက ဘတ်စ်ကားပေါ်မှ ဆင်းလာချိန်တွင် လူ ၂ ဦးက ပိုက်ဆံထုတ်များ ဝိုင်းဝန်းလုယက်ခဲ့ကြခြင်း ဖြစ်သည်။

မျက်မြင်တွေ့ရှိသူတို့၏ ပြောပြချက်များအရ လုယက်သူတို့သည် ငွေထုတ်များကို လုယူပြီး ဆိုင်ကယ်တစ်စီးဖြင့် ထွက်ပြေးသွားကြောင်း၊ လမ်းတွင် ငွေထုတ်တစ်ခု ပြုတ်ကျခဲ့ခြင်းဖြစ်ကြောင်း ပြောသည်။

ပြန့်ကျဲသွားသော ငွေစက္ကူများကို အနီးရှိ လူအုပ်ကြီးက ဝိုင်းဝန်းလုယက်ကြရာ အခြေအနေများ ပိုမိုရှုပ်ထွေးသွားပြီး ငွေထုတ်လုသူများမှာ အနှောင့်အယှက်မရှိ လွတ်မြောက်သွားကြသည်။

ဘာဗက်ရှ်၏ ပြောပြချက်အရ ငွေအိတ်များထဲတွင် ရူပီးသိန်းပေါင်းများစွာ ပါဝင်သော်လည်း ၄ သိန်း၊ ၅ သိန်းခန့်သာ ပြန်ရကြောင်း ပြောသည်။

Kikhraj ရဲတပ်ဖွဲ့က အခင်းဖြစ်ရာနေရာသို့ ရောက်ရှိလာပြီး စစ်ဆေးမေးမြန်းမှုများ ပြုလုပ်ခဲ့သည်။

ရဲအရာရှိ CB Maurya က ပြောသည်မှာ လုယက်ခံရသော ငွေပမာဏ အတိအကျကို သိနိုင်ရန် စစ်ဆေးလျက်ရှိဆဲဖြစ်ကြောင်း၊ တရားခံများကို ဖော်ထုတ်နိုင်ရန် စီစီတီဗွီ မှတ်တမ်းများကို စစ်ဆေးလျက်ရှိကြောင်း ပြောသည်။

ရဲတပ်ဖွဲ့က ထိုဒေသတဝိုက် ပိတ်ဆို့ ရှာဖွေမှုများ ပြုလုပ်နေသော်လည်း လက်ရှိအချိန်ထိ တရားခံများ မမိသေးချေ။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Bundles Of Cash Scattered On UP Highway, Crowd Rushes To Grab Notes Photo Credit- X/@moliticsindia