ဂန္ထဝင်ရော့ခ်အဖွဲ့ကြီး Led Zeppelin မှ အဆိုတော် ရောဘတ်ပလန့်၏ အင်္ဂလန်ရှိ စံအိမ် ကန်ဒေါ်လာ ၃ ဒသမ ၅ သန်းနီးပါးဖြင့် ရောင်းမည်

Led Zeppelin အဖွဲ့ကြီး၏ ရှေ့ထွက်အဆိုတော် ရောဘတ်ပလန့်၏ အင်္ဂလန်နိုင်ငံ၊ ဝေလပြည်နယ်ရှိ စံအိမ် အရောင်းဈေးကွက်ဝင်လာသည်။

(မှတ်ချက်။ ရောဘတ်ပလန့်အကြောင်းနှင့် ဝေလပြည်နယ်မှ စံအိမ်အကြောင်းကို iMyanmarHouse.com ဝက်ဘ်ဆိုက်ကြီးတွင် ရေးသားတင်ပြခဲ့ဖူးပါသည်။ ပြန်လည်ဖတ်ရှုလိုသော လူကြီးမင်းများအနေဖြင့် အောက်ဖော်ပြပါ လင့်ခ်မှတဆင့် ဖတ်ရှုနိုင်ပါသည်။)

(ဆက်စပ်သတင်း)

Led Zeppelin ၏ အဆိုတော် ရောဘတ်ပလန့်၏ စံအိမ်

https://www.imyanmarhouse.com/news/read/1017543

Led Zeppelin အဖွဲ့ကြီး၏ သီချင်းများနှင့် မြန်မာပရိသတ်တို့ ထိတွေ့ရင်းနှီးမှုရှိသည်။ Led Zeppelin ၏ ဂစ်တာသမား Jimmy Page သည် ၂၀၀၉ ခုနှစ်၊ ဇန်နဝါရီလ ၂၇ ရက်က မြန်မာနိုင်ငံသို့ ရောက်ရှိခဲ့ကာ ပုဂံနှင့် မန္တလေးမြို့များသို့ အလည်အပတ်သွားခဲ့ဖူးသည်။

Led Zeppelin ၏ သီချင်းများကို မြန်မာအဆိုတော်များ ပြန်လည်သီဆိုခဲ့ကြဖူးရာ ၎င်းတို့၏ အကျော်ကြားဆုံး သီချင်းဖြစ်သော Stairway to Heaven ကို ကျော်ဟိန်းက ကြိုက်သလိုလုပ်နိုင်တယ် (ဒွေးနှင့် ထွန်းအိန္ဒြာဗိုလ်တို့၏ မုန်းလို့မရတဲ့ချစ်သူတွေ စီးရီးတွင်လည်း ထိုအမည်ဖြင့်ပင် သီဆိုထား) ၊ Rock N’ Roll ကို ဖိုးကျော်က မိုးအကြောင်း လေအကြောင်း၊ Black dog ကို သျှီက တွေး…ဟူသော အမည်ဖြင့်လည်းကောင်း ပြန်လည်သီဆိုထားမှုများ ရှိသည်။ အခြားသီချင်းများလည်း ရှိပါသေးသည်။

ယခုရောင်းမည့်စံအိမ်မှာ ရော့ခ်ကြယ်ပွင့်တစ်ဦး၏ စံအိမ်ဆိုရုံလောက်သာ မကသေး။

စံအိမ်၏ ဂုဏ်သတင်းမှာ ရောဘတ်ပလန့်နည်းတူ ခမ်းနားသည့် သမိုင်းများရှိသည်။

Argoed ဟု အမည်ပေးထားသော စံအိမ်ကြီးတွင် သမိုင်းဝင် အထင်ကရပုဂ္ဂိုလ်များစွာ လာရောက်လည်ပတ် တည်းခိုခဲ့ကြဖူးသည်။

ဗြိတိန် အိမ်ခြံမြေဝက်ဘ်ဆိုက်တစ်ခုဖြစ်သော RightMove ၏ ဖော်ပြချက်အရ ခြံအကျယ် ၁၀ ဧကရှိသည့် Argoed စံအိမ်ကြီးသို့ ၁၆၀၀ ပြည့်လွန်ကာလများအတွင်း အင်္ဂလန်ပြည့်ရှင် ချားလ်စ် ၁ ဘုရင် လာရောက်လည်ပတ်ခဲ့ဖူးသည်။

ထို့အပြင် ကမ္ဘာကျော် ပြဇာတ်ဆရာ၊ စာရေးဆရာကြီး ဂျော့ချ် ဘားနတ်ရှောကလည်း သူ၏ ပြဇာတ် ၂ ခုဖြစ်သော The man of destiny နှင့် Mrs. Warren’s Profession တို့ကို ၁၈၉၀ ကာလများအတွင်း ဤစံအိမ်ကြီးတွင် ရေးသားခဲ့ခြင်း ဖြစ်သည်။

စံအိမ်တည်နေရာမှာ ဝေလပြည်နယ်၊ Pennalt မြို့တွင် ဖြစ်သည်။

ရောဘတ်ပလန့်က အိပ်ခန်း ၇ ခန်းနှင့် ရေချိုးခန်း ၄ ခန်းပါသော စံအိမ်သို့ ၁၉၈၅ ခုနှစ်တွင် စတင်အခြေချ နေထိုင်ခဲ့ခြင်းဖြစ်ကြောင်း နယူးယောက်ပို့စ် သတင်းဌာနက ဖော်ပြသည်။

ယင်းနောက် ၅ နှစ်အကြာတွင် ရောဘတ်ပလန့်က ဤစံအိမ်မှ ပြောင်းရွှေ့သွားသည်။ ရောဘတ်ပလန့်နှင့် ဇနီးဟောင်း မော်ရင် ဝီလ်ဆင် (Maureen Wilson) တို့တွင် သားသမီး ၄ ဦး ထွန်းကားခဲ့သည်။

ရောဘတ်ပလန့်သည် Live Aid ပရဟိတ ရန်ပုံငွေပွဲတွင် Led Zeppelin အဖွဲ့ကြီးနှင့် ပြန်လည်ပေါင်းထုပ်ခဲ့သေးသည်။ ဝေလပြည်နယ်ရှိ ယခုစံအိမ်ကို ဝယ်ယူလိုက်သောနှစ်အတွင်း ထိုသို့ ပေါင်းစည်းခဲ့ခြင်းလည်း ဖြစ်သည်။

ရောဘတ်ပလန့်က ဝေလပြည်နယ်ရှိ စံအိမ်ကို မဝယ်မီ ၅ နှစ်ခန့်က Led Zeppelin ၏ drummer ဖြစ်သူ John Bonham ကွယ်လွန်ခဲ့ပြီးနောက် Led Zeppelin အဖွဲ့ကြီး ပြိုကွဲသွားခဲ့သည်။

(▲ လူဝီစီယားနားပြည်နယ်၊ နယူးအော်လင်းမြို့၊ ၂၀၂၃ ခုနှစ် ဧပြီလ ၂၈ ရက်။ Robert Plant & Alison Krauss အဖွဲ့ကို ဖွဲ့စည်းထားသော ရောဘတ်ပလန့်က ၅၂ ကြိမ်မြောက် New Orleans Jazz & Heritage ပွဲတွင် ပါဝင် သီဆိုဖျော်ဖြေခဲ့သည်။ ဓာတ်ပုံ-Tim Mosenfelder/ WireImage)

ရောဘတ်ပလန့် နေထိုင်ခဲ့သော စံအိမ်အတွင်း ဧည့်ခန်း ၅ ခန်း၊ ပင်မ အိပ်ခန်း၊ သစ်သားနံရံများ ကာရံထားသော ဧည့်ဂေဟာခန်းနှင့် အခြား အိပ်ခန်း ၅ ခန်းတို့ ပါဝင်ကြောင်း ဈေးကွက်တင် မှတ်တမ်းတွင် ဖော်ပြသည်။

စံအိမ်အတွင်း ရေချိုးခန်း ၄ ခန်း ပါဝင်ပြီး မီးဖိုဆောင်၊ မနက်စာစားသည့်နေရာ၊ ဧည့်ခန်းမ၊ အသုံးအဆောင်ပစ္စည်းဂိုဒေါင်၊ ပန်းဥယျာဉ်မှူး၏ အလုပ်ရုံ၊ ပျိုးပင်စိုက်ပျိုးရာ မှန်လုံအိမ်တို့အပြင် ဒုတိယထပ် တစ်ခုလုံးကို ဖြန့်ကျက်ထားသော အခန်း ၅ ခန်းလည်း ပါဝင်သေးသည်။

ခြံဝန်းအကျယ် ၁၀ ဧကကျော်ရှိပြီး တောင်ကြားတလွှားရှိ ရင်သပ်ရှုမောဖွယ်ရှုခင်းများ ပိုင်ဆိုင်ထားကာ ဂျပန်ပန်းဥယျာဉ်တစ်ခုလည်း ပါဝင်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Legendary Rocker's 7-Bedroom Wales Mansion Is on the Market for Nearly $3.5 Million

Photo Credit- Tim Mosenfelder/ WireImage