လန်ခြားတစ်စီးဖြင့် တစ်ကမ္ဘာလုံးကို ခြေလျင်ခရီးသွားနေသော ဂျပန်နိုင်ငံသား၊ လက်ရှိအားဖြင့် အာဖရိကတိုက်သို့ ရောက်ရှိနေ

ကမ္ဘာ့တိုက်ကြီးတစ်ခုလုံးကို ခြေလျင်ခရီးဖြင့် သွားမည်ဟု တွေးတောကြည့်လိုက်ပါ။

အလုပ်အတွက်၊ လိုအပ်ချက်ကြောင့် မဟုတ်ဘဲ စိတ်လှုပ်ရှားမှုရရုံအတွက်ဖြင့် ထိုသို့ လမ်းလျှောက်သွားမည်ဟု စိတ်ကူးဖြင့်ပင် တွေးကြည့်ဖူးကြမည် မဟုတ်ချေ။

ဂျပန်နိုင်ငံသား စူးစမ်းလေ့လာသူ ဂမ့် ဆူဇူကီးကမူ ထိုသို့ လုပ်ဆောင်ခဲ့သည်။

ပြီးခဲ့သော ၆ လတာကာလအတွင်း ဆူဇူကီးသည် လန်ခြားတစ်စီးကို ဆွဲရင်း အာဖရိကတိုက်ကြီးတစ်ခုလုံးကို ခြေလျင်ဖြတ်သန်းသွားလာနေခဲ့သည်။

သူ၏ စိတ်ထဲတွင် ပန်းတိုင်တစ်ခုတည်းသာရှိသည်။

တောင်အာဖရိကနိုင်ငံ၊ ကိတ်ပ်တောင်းမြို့သို့ ရောက်ရှိရေးဟူသော ပန်းတိုင်ဖြစ်သည်။

ဂျပန်နိုင်ငံ၊ တိုကျိုမြို့တွင် ကမ္ဘာလှည့်ခရီးသွားလမ်းညွှန်အဖြစ်လုပ်ကိုင်ခဲ့သူ အသက် ၃၄ နှစ်အရွယ်ရှိ ဆူဇူကီးသည် အာရှ၊ ဥရောပ၊ သြစတေးလျနှင့် မြောက်အမေရိကဟူသော ကမ္ဘာ့တိုက်ကြီးများကို ဖြတ်သန်းသွားလာခဲ့ဖူးပြီး ဖြစ်သည်။

ယခုအခါ ဆူဇူကီးက အာဖရိကကို ခြေလျင်ဖြတ်သန်းရန် ကြိုးစားနေသည်။

ဆူဇူကီးသည် အာဖရိက ခရီးစဉ်ကို ၂၀၂၄ ခုနှစ်၊ ဇွန်လတွင် ကင်ညာနိုင်ငံမှ စတင်ခဲ့ခြင်းဖြစ်ပြီး တန်ဇန်းနီးယား၊ ဇမ်ဘီယာ၊ ဘော့စ်ဝါနာနှင့် နမီးဘီးယားနိုင်ငံတို့ကို ဖြတ်သန်းခဲ့ပြီး ဖြစ်သည်။

ဆူဇူကီး၏ ခြေလျင်ခရီးရှည်ကြီးများကို TikTok လူမှုကွန်ရက်ရှိ follower ၅၀၀,၀၀၀ ကျော်က စိတ်ဝင်တစား စောင့်ကြည့်နေကြသည်။

ဆူဇူကီးက သူ၏ ခရီးစဉ်အကြောင်းနှင့် လမ်းပေါ်မှ အတွေ့အကြုံများကို TikTok တွင် မျှဝေလေ့ရှိသည်။

“ကမ္ဘာ့တိုက်ကြီး ၅ ခုကို ကျွန်တော့်ရဲ့ လန်ချားနဲ့ ခရီးသွားချင်ပါတယ်။” ဟု ဆူဇူကီးက ပြောသည်။

“ကိတ်ပ်တောင်းဟာ ပြီးပြည့်စုံတဲ့နေရာတစ်ခုလို့ ခံစားရပါတယ်။ ဒါက ခရီးသွားနေရုံ သက်သက်မျှ မဟုတ်ပါဘူး။ လမ်းတလျှောက်မှာ တွေ့ရသူတိုင်းဆီကို မျှော်လင့်ချက်နဲ့ အပြုသဘောဆောင်မှုဆိုတဲ့ သတင်းစကား ပျံ့နှံ့စေဖို့လည်း ဖြစ်ပါတယ်”

ဆူဇူကီး၏ ခြေလျင်ခရီးရှည်ကြီးမှာ ပန်းခင်းသောလမ်းတစ်ခုကား မဟုတ်။

ဇမ်ဘီယာတွင် ထရပ်ကားတစ်စီးနှင့် တိုက်မိခဲ့ကြောင်း ဆူဇူကီးက ပြောပြသည်။

အဆိုပါ အက်ဆီးဒင့်ကြောင့် သူ၏ လန်ချားလေး ပျက်စီးသွားသည်။

ထိုသို့ အခက်အခဲများရှိသော်လည်း ဆူဇူကီးက ကြံ့ကြံ့ခံသည်။

အနီးဝန်းကျင်ရှိ စက်ဘီးပြင်ဆိုင်တစ်ခုတွင် သူ၏ လန်ချားကို ပြုပြင်သည်။

အက်ဆီးဒင့်ဖြစ်ခဲ့သော်လည်း မိမိမှာ ထိခိုက်မှုမရှိခဲ့ဘဲ အသက်ရှင်နေဆဲဖြစ်ကြောင်း ဆူဇူကီးက ပြုံးရွှင်စွာ ပြောပြသည်။

အာဖရိက အတွေ့အကြုံများအနက် တောရိုင်းတိရ စ္ဆာန်များနှင့် ရင်ဆိုင်ရသည့်ဖြစ်ရပ်တို့လည်း ရှိသည်။

ဘော့စ်ဝါနာသို့ ရောက်ရှိနေချိန်တွင် ဆူဇူကီးသည် လမ်းပေါ်တစ်နေရာ၌ ခြင်္သေ့တစ်ကောင်ကို တွေ့ခဲ့ရသည်။

“ကျွန်တော် တော်တော်လန့်သွားတယ်။ အဲဒါကြောင့် နောက်ကြောင်းပြန်လှည့်ပြီး အနီးဆုံးရွာကို သွားခဲ့ပါတယ်။ အဲဒီမှာ တဲထိုးပြီး ခေတ္တနေထိုင်ခဲ့ပါတယ်” ဟု ဆူဇူကီးက ရယ်မောရင်း ပြောသည်။

လမ်းတလျှောက် တွေ့ရသော ဒေသခံတို့၏ ကြင်နာမှု၊ ပျူငှာဧည့်ဝတ်ကျေမှုတို့မှာ ဆူဇူကီး၏ စိတ်နှလုံးကို လှုပ်ခတ်စေခဲ့သည်။

တောင်အာဖရိကသို့ ရောက်ရှိချိန်တွင် နိုင်ငံသားများစွာမှာ ဆူဇူကီးကို ၎င်းတို့အိမ်သို့ ဖိတ်ခေါ်ပြီး တည်းခိုနေထိုင်ရန် နေရာပေးကြသည်။

“ဒီကလူတွေဟာ ကျွန်တော့်ရဲ့ နှလုံးသားကို နွေးထွေးစေခဲ့ပါတယ်။ ကြင်နာတတ်တဲ့သူ အများကြီးတွေ့ရတာ မယုံနိုင်အောင်ပါပဲ” ဟု ဆူဇူကီးက ပြောသည်။

(ဓာတ်ပုံ-Gump Suzuki/ Facebook)

ဆူဇူကီးသည် ကိတ်ပ်တောင်းမြို့သို့ ရောက်ရှိရန် နီးကပ်လာနေသည်နှင့်အမျှ သူ၏ ခရီးရှည်ကြီးတစ်ခုကို အဆုံးသတ်နိုင်တော့မည် ဖြစ်သည်။

ကိတ်ပ်တောင်းတွင် ၅ ရက်ကြာနေထိုင်မည်ဖြစ်ပြီး ဇန်နဝါရီ ၃၁ ရက်တွင် ဂျပန်သို့ ပြန်မည် ဖြစ်သည်။

“ကျွန်တော့်ရဲ့ နောက်ထပ်ခရီးစဉ်ကတော့ တောင်အမေရိကကို လန်ချားနဲ့ ဖြတ်သန်းသွားလာဖို့ပါပဲ။ ပျော်ရွှင်ဖို့နဲ့ စူးစမ်းလေ့လာဖို့အတွက်ပဲ ဖြစ်ပါတယ်။ ဘဝက တိုတောင်းပါတယ်။ ရရှိတဲ့အချိန်ခဏတာအတွင်းမှာ ဘဝရဲ့အလှတရားတွေကို ခံစား၊ လေ့လာကြရမှာ ဖြစ်ပါတယ်။” ဟု ဆူဇူကီးက ပြောသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: 6000km later: Japanese rickshaw adventurer reaches Cape Town Photo Credit- Gump Suzuki/ Facebook ki/ Facebook