နှလုံးမရှိဘဲ ရက်ပေါင်း ၅၅၅ ရက် အသက်ရှင်သန်နေထိုင်ခဲ့သော အမေရိကန်နိုင်ငံသားအကြောင်း

အမေရိကန်နိုင်ငံသား စတန် လာကင် (Stan Larkin) သည် လူ့နှလုံးမရှိဘဲ ရက်ပေါင်း ၅၅၅ ရက် အသက်ရှင်သန် နေထိုင်နိုင်ခဲ့သည်မှာ အံ့ဖွယ်ဖြစ်ရပ်တစ်ခုဖြစ်ပြီး ဆေးလောက၏ အောင်ပွဲတစ်ခုလည်း ဖြစ်သည်။

စတန် လာကင်သည် အမေရိကန်ပြည်၊ မီချီဂန်ပြည်နယ်၊ ယစ်ဆလန်းတီ (Ypsilanti) မြို့တွင် နေထိုင်သူတစ်ဦးဖြစ်ပြီး ကလေး ၃ ဦးနှင့်အတူ ပန်းခြံသို့ သွားလေ့ရှိကာ ညီငယ် ဒေါမနစ်နှင့်အတူလည်း မကြာခဏ သွားလာလည်ပတ်ခြင်းဖြင့် အချိန်ကုန်ဆုံးလေ့ရှိသည်။

စတန် လာကင်သည် မီးခိုးရောင် ကျောပိုးအိတ်တစ်လုံး အမြဲလွယ်ထားလေ့ရှိသည်။

ထို ကျောပိုးအိတ်သည် ၎င်းကို အသက်ရှင်သန်နေစေသည့်အရာ ဖြစ်၏။ ထို ကျောပိုးအိတ်မရှိလျှင် စတန် လာကင် အသက်ရှင်သန်နိုင်ဖွယ် မရှိချေ။

ကျောပိုးအိတ်ထဲတွင် နှလုံးတုအတွက် ပါဝါပေးမည့် ဘက်ထရီထည့်ထားသည်။

စတန်လာကင်၏ နှလုံးမှာ ၂၀၁၄ ခုနှစ်၊ နိုဝင်ဘာလက ခွဲထုတ်ဖယ်ရှားခဲ့ရသည်။

နှလုံးအစား စက်တစ်လုံးထည့်ထားပြီး အသက်ရှင်သန်နေသည်။ နှလုံးလှူဒါန်းမည့်သူကို ထိုစက်၏ အကူအညီဖြင့် ရှင်သန်နေထိုင်ရင်း စောင့်ဆိုင်းနေခြင်း ဖြစ်သည်။

ကမ္ဘာပေါ်တွင် နှလုံးအစားထိုး ကုသရန်လိုအပ်နေသော လူနာ ၄၀၀၀ ခန့် အမြဲရှိနေကြောင်း U.S. Organ Procurement and Transplantation Network ၏ အချက်အလက်များတွင် ဖော်ပြသည်။

စတန်လာကင်သည် သူ၏နှလုံး၌ ပြဿနာရှိနေကြောင်း ဆယ်စုနှစ်တစ်ခုခန့် မသိခဲ့။ မည်သည့်လက္ခဏာမှ မခံစားရသောကြောင့်လည်း နှလုံးရောဂါပြဿနာရှိနေကြောင်း မသိခဲ့ခြင်းဖြစ်သည်။

တစ်ရက်တွင်မူ ဘတ်စ်ကက်ဘော ကစားနေရင်း ခွေလဲကျသွားခဲ့သည်။

စစ်ဆေးချက်များအရ စတန်လာကင်တွင် မျိုးရိုးအမွေ နှလုံးရောဂါရှိနေသည်ကို တွေ့ခဲ့ရသည်။

သူ၏ ညီငယ် ဒေါမနစ်တွင်လည်း အလားတူ အခြေအနေဖြစ်နေသည်ကို မကြာမီတွင် တွေ့ခဲ့ရသည်။

စတန် လာကင်နှင့် ဒေါမနစ်တို့ ၂ ဦးလုံးတွင် နှလုံးစည်းချက်မမှန်သည့် arrhythmogenic dysplasia ရောဂါ ခံစားနေရကြောင်း ၎င်းတို့ ၂ ဦးလုံးကို ခွဲစိတ်ပေးခဲ့သည့် မီချီဂန်တက္ကသိုလ်မှ နှလုံးခွဲစိတ်အထူးကု သမားတော် ဒေါက်တာ Jonathan Haft က ပြောသည်။

ညီအစ်ကိုနှစ်ဦးလုံး နှလုံးရပ်သည့် အခြေအနေမျိုးနှင့် ရင်ဆိုင်လာရသောကြောင့် ၂၀၁၄ နှစ်ကုန်ပိုင်းတွင် နှလုံးတုစက်များ တပ်ဆင်ပေးခဲ့ရသည်။

ဒေါမနစ်မှာ နှလုံးတုစက်ဖြင့် ဆေးရုံတွင် ရက်သတ္တ ၆ ပတ်နေခဲ့ပြီးနောက် လူ့နှလုံးအစစ်ဖြင့် အစားထိုးခွဲစိတ် ကုသမှု ခံယူခဲ့သည်။

သို့သော် စတန်လာကင်မှာမူ နှလုံးတုစက်ဖြင့် ဆက်လက်နေထိုင်နေခဲ့ကြောင်း ဒေါက်တာ Haft က ပြောသည်။

စတန်လာကင်၏ ခန္ဓာကိုယ်ဘယ်ဘက်ခြမ်း နံရိုးအိမ်၏ အောက်ဘက်မှ ပြွန် ၂ ခုဖောက်ကာ ကိုယ်အပြင်ဘက်ရှိ ၁၃ ပေါင်လေးသော နှလုံးလည်ပတ်စက် Freedom Driver ကို ကိုယ်တွင်းရှိ နှလုံးတုနှင့် ဆက်သွယ်ပေးထားသည်။

စတန်လာကင်သည် ကျောပိုးအိတ်လွယ်ထားလျက်ဖြင့်ပင် ဘတ်စ်ကက်ဘော ကစားခြင်း၊ သားသမီးများနှင့် ဆော့ကစားခြင်း၊ သူငယ်ချင်းများနှင့် ကားပတ်စီးခြင်းတို့ လုပ်ဆောင်လေ့ရှိသည်။

ပြွန်ထွက်သော အပေါက်နေရာမှ ပတ်တီးစများကို စတန်လာကင်၏ မိခင်ကြီးက မကြာခဏလဲလှယ်ပေးသည်။

တစ်နှစ်ကျော်အကြာတွင်မူ စတန်လာကင်သည် မီချီဂန်တက္ကသိုလ် Frankel Cardiovascular Center တွင် လူ့နှလုံးအစစ်ဖြင့် ခွဲစိတ်ကုသမှု ခံယူခဲ့သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Man lives 555 days without a heart