သင်္ကြန်မဏ္ဍပ်ဆောက်လုပ်ခွင့် လျှောက်ထားရာတွင် သက်ဆိုင်ရာ အိမ်ရှင်၊ မြေရှင်၊ ဌာနဆိုင်ရာများနှင့် ညှိနှိုင်းတည်ဆောက်ရမည်ဟူသော တိုင်းအစိုးရ၏ မူဝါဒကြောင့် ကိုယ်ပိုင်နေအိမ်၊ ခြံရှေ့နေရာများတွင် မဏ္ဍပ်ဆောက်လုပ်နိုင်ရေးအတွက် မြေနေရာငှားရမ်းခမှာ ကျပ်သိန်း ၈၀၀ ခန့်အထိ ပေါက်ဈေးရှိနေ၍ ခြံပိုင်ရှင်များကို တနှစ်တခါလုပ်ကျွေးနေရသလိုဖြစ်နေကြောင်း မဏ္ဍပ်ဆောက်လုပ်သူများထံက ဆိုသည်။
''ခြံတခြံကို အခုလက်ရှိပေါက်ဈေးက သိန်း ၄၀၀၊ ၆၀၀၊ ၈၀၀ တွေ ခေါ်ကြတာကိုး။ မြေရှင်ရဲ့ခွင့်ပြုချက် ရဖို့အတွက်ပေါ့။ အရင်အစိုးရလက်ထက်က ကန်တော်ကြီးပတ်လမ်း၊ ကမ္ဘာအေးဘုရားလမ်းဘက်တွေပေး တယ်။ အဲလိုနေရာမျိုးမှာ အကုန်အကျမများဘူး။ မဏ္ဍပ်မှာ facility အများကြီးပြည့်အောင် ဖြည့်နိုင်တယ်။ အခုနောက်ပိုင်းပြောင်းလဲသွားတဲ့မူဝါဒအရ ကိုယ့်ခြံရှေ့ ကိုထိုးမယ်ဆိုတော့ အဲဒီပြည်လမ်းပေါ်မှာ ခြံပိုင်တာ လည်း သူဌေးတွေပဲပိုင်တာလေ။ သူတို့တတွေကို တနှစ်တခါ ရှာကျွေးနေသလို ဖြစ်နေတယ်။ ခြံသမားတွေက ဈေးတွေတင်ပြီးတောင်း၊ သူတို့ခြံရှေ့တွေမှာ ကြိုပြီးတော့ ပါမစ်တွေလျှောက်ပြီးတော့ ဖေ့စ်ဘုတ်ပေါ် တင်ပြီးတော့ကို ပေါ်တင်ရောင်းစားနေကြတာ။ ပြီးတော့ ခြံဆိုရင် ပါမစ်က အလိုလိုကိုကျပြီးသား။ အရင် တုန်းကလို မဲနှိုက်တာမျိုးတွေမဟုတ်ဘူး။ အော်တိုကိုကျသွားတာ။ ကိုယ့်ခြံရှေ့မှာကို ထိုးတာဖြစ်တဲ့အတွက် ပါမစ်အလိုလိုကျနေတယ်''ဟု မဏ္ဍပ်ပိုင်ရှင်ဦးစည်သူဖြိုးက ပြောသည်။
လက်ရှိအချိန်တွင် ပြည်လမ်းမရှိ ခြံနေရာများတွင် မဏ္ဍပ်နေရာလျှောက်ထားသူ များပြားနေပြီး အစိုးရချထား ပေးသည့် နေရာ၊ စည်ပင်ပိုင်မြေနေရာ ၃၊ ၄ ခုသာရှိနေသည့်အတွက် ဝေဇန္တာလမ်းမဘက်သို့ မဏ္ဍပ်ဆောက်လုပ်ခွင့် လျှောက်ထားခဲ့ကြောင်း မဏ္ဍပ်ဆောက်လုပ်ခွင့်လျှောက်ထားသူ ကိုသော်ဇင်မောင်က ပြောသည်။ ''ကျွန်တော်က စည်ပင်နယ်နိမိတ်ကို လျှောက်လိုက်တာကိုး။ စည်ပင်နယ်နိမိတ်ထဲမှာ မဟုတ်ဘူးဆိုရင် ခြံထဲကဆောက်ခွင့် ပါမစ်တာပေးတာလေ''ဟု ၎င်းက ပြောသည်။
တချိန်က တိုးမပေါက်အောင် စည်ကားသည့် ကန်တော်ကြီးပတ်လမ်း၊ ကမ္ဘာအေးပတ်လမ်းများတွင် မဏ္ဍပ် ဆောက်လုပ်ခွင့်ပိတ်ထားသဖြင့် မဏ္ဍပ်ဆောက်လုပ်လိုသူများအနေနှင့် မြေနေရာ ငှားရမ်းခကြီးမြင့်နေခြင်းမှာ အဓိကအခက်အခဲဖြစ်ကြောင်း သိရသည်။
''အခုကျတော့ ကိုယ့်ခြံရှေ့မှာပဲ ဆောက်ဆိုတဲ့ ပုံစံမျိုးကျတော့လည်း သိပ်ပြီး အဆင်မပြေဘူးပေါ့။ အဲဒီလိုဆိုတော့ ခြံသမားတွေ ပိုပြီးအလုပ်ဖြစ်သွားတာပေါ့။ အရင်တုန်းကဆိုရင် ကမ္ဘာအေးပတ်လမ်းမှာ ၇ ကွက်၊ ၈ ကွက်ချပေးတယ်။ ကန်တော်ကြီးပတ်လမ်းမှာဆိုရင် ၁၀ ကွက်၊ ၁၅ ကွက်လောက်ချပေးတယ်။ အဲဒီမှာမှ ကိုယ်ကမဏ္ဍပ်ပါမစ်တင်၊ မဲပေါက်တဲ့ဟာ မျိုးဆိုထိုးပေါ့။ မဲမပေါက်ရင် ပါမစ်ကျပြီးသားလူက မဏ္ဍပ်မထိုးချင်လို့ ပြန်ရောင်းရင် သိန်း ၁၀၀ လောက်နဲ့ပြီးတယ်။ ဒါက လွန်ခဲ့တဲ့ ၃ နှစ်လောက်ကပေါ့။ အခုကျ တော့ ၃၊ ၄ ဆလောက်ကို တက်သွားတာ။ ခြံပိုင်တဲ့လူတွေ အလုပ်ဖြစ်သွားတာပေါ့''ဟု မဏ္ဍပ်ပိုင်ရှင်တဦးက ပြောသည်။
သင်္ကြန်မဏ္ဍပ်ဆောက်လုပ်ခွင့် လျှောက်ထားသူများလိုက်နာရန် စည်းကမ်းချက်များကို လေးစားလိုက်နာရန် လိုအပ်ပြီး အမှန်တကယ်မဏ္ဍပ်ဆောက်မည့်သူများသာ ပါမစ်လျှောက်ထားသင့်ကြောင်းနှင့် နေအိမ်၊ ခြံပိုင်ရှင်များအနေ ဖြင့် အတာသင်္ကြန်ကို ဈေးကွက်တခုသဖွယ် အခကြေးငွေဖြင့် ငှားရမ်းခြင်းများ မပြုလုပ်သင့်ကြောင်း ရန်ကုန်မြို့နေသူတဦးက မှတ်ချက်ပြုသည်။
Credit: News Watch
