တံတားဦး ဟိုတယ် စီမံကိန်း မြေယာ နစ်နာကြေး တိုးပေးမည်

မြေယာ နစ်နာကြေး မယူသည့် တောင်သူများ ရှိသဖြင့် တံတားဦး ဟိုတယ် စီမံကိန်း စတင်ရန် နှောင့်နှေးနေရာ တောင်သူများ အားလုံး မြေယာ နစ်နာကြေး ရယူကာ လယ်ယာမြေများ ပေးအပ်လျှင် မြေယာ နစ်နာကြေး တိုးပေးမည်ဖြစ်ကြောင်း Myanmar Tourism Development Public Company မှ ဒါရိုက်တာ ဦးမြင့်အောင်က ပြောကြားသည်။

စီမံကိန်း နယ်မြေတွင် ပါဝင်နေသည့် လယ်ယာမြေ တစ်ဧကလျှင် ကျပ် သိန်းတစ်ရာ၊ သုံးဧက အပ်နှံပါက မြေကွက် ပေ ၄ဝ၊ ၆ဝ တစ်ကွက် ပေးအပ်သော်လည်း တောင်သူအချို့ လယ်ယာမြေများ လာရောက် အပ်နှံခြင်း မရှိသေးသဖြင့် ယင်းသို့ တိုးမြှင့်ပေးရန် စီစဉ်ခြင်းဖြစ်ကြောင်း ၎င်းကဆိုသည်။

“တောင်သူတွေ အကုန် သဘောတူတယ်ဆိုရင် လယ်ယာမြေ တစ်ဧက ကျပ်သိန်း တစ်ရာ၊ တစ်ဧက အပ်နှံတိုင်း စီမံကိန်းမှာ မြေကွက် ပေ ၄ဝ၊ ပေ ၆ဝ တစ်ကွက် စီပေးအပ်မှာပါ။ မြေယာ လျော်ကြေး အရင်က ယူထားသူတွေကိုလည်း အဲဒီအတိုင်း ပြန်ပေးအပ်မှာပါ”ဟု ၎င်းက ထပ်မံ ပြောကြားသည်။

ဟိုတယ်စီမံကိန်းကို ဧက ငါးထောင်ကျော်တွင် အကောင်အထည် ဖော်မည်ဖြစ်ပြီး လက်ရှိ အချိန်အထိ မြေယာ လျော်ကြေး ရယူထားသည့်ဧက ၂ဝဝဝကျော် ရှိသော်လည်း တစ်ဆက် တစ်စပ်တည်း မဟုတ်သည့်အတွက် စီမံကိန်း အကောင်အထည် မဖော်နိုင်ခြင်းဖြစ်ကြောင်း အဆိုပါ ကုမ္ပဏီထံမှ သိရသည်။

မန္တလေးတိုင်းဒေသကြီး တံတားဦးမြို့နယ်တွင် ဧကငါးထောင်ကျော် ဧရိယာ အကျယ်ရှိ ဟိုတယ် စီမံကိန်းအတွက် Myanmar Tourism Development Public Company က ၂ဝ၁၄ ခုနှစ်တွင် တစ်ဧကလျှင် ကနဦး မြေယာ လျော်ကြေး ကျပ်သိန်း ငါးဆယ်ဖြင့်ပေးနေရာ တောင်သူများ လက်မခံသဖြင့် တစ်ဧက ကျပ်သိန်း တစ်ရာဖြင့် တိုးမြှင့်ပေးခဲ့ဖူးသည်။

မြေယာ လျော်ကြေးများမှာ ကာလတန်ဖိုး ပေါက်ဈေး မဟုတ်သည့်အပြင် ထိုက်သင့်သည့် ငွေ မဟုတ်သဖြင့် တောင်သူအချို့ လျော်ကြေးငွေ ရယူခြင်း မရှိကြောင်း အဆိုပါ တောင်သူများထံမှ သိရှိရသည်။


Credit: The Voice