တခါက မြူမှုန်တွေဆိုင်းတဲ့ တောင်ပေါ်မြို့လေးမှာ ကွာရှင်းချင်တဲ့ ဇနီးမောင်နှံတိုင်းကို ၄၅ ရက် ဖမ်းချုပ်ပြီး အတူထည့်ထားဖူးတဲ့ အိမ်တစ်လုံးရှိခဲ့ဖူးတယ်၊ နှစ် ၃၀၀ အတွင်း ကွာရှင်းမှု တစ်ခုထဲပဲရှိခဲ့

ရိုမေးနီးယားနိုင်ငံ၊ ထရန်ဆယ်လ်ဗေးနီးယားဒေသတွင် ဘီးယာတန် (Biertan) ဟူသော ရွာလေးတစ်ခု တည်ရှိပြီး ယူနက်စကိုက ကမ္ဘာ့အမွေအနှစ်အဖြစ် သတ်မှတ်ခံထားရသော သာယာလှပသည့်နေရာလေး ဖြစ်သည်။

မြင်းလှည်းများကို နေ့စဉ်အသုံးပြုနေကြဆဲဖြစ်ပြီး ကျောက်စရစ်ခင်း ရွာကွက်လပ်တွင် ကုန်စည်များ စုဝေး ရောင်းချကြသည်။

ရွာလယ် တောင်ကုန်းတစ်ခုပေါ်တွင် ၁၅ ရာစု ဘုရားကျောင်းတစ်ခုရှိနေပြီး တစ်ရွာလုံးကို စီးမိုးတွေ့မြင်ရသည်။

ဘုရားကျောင်းဝန်းအတွင်း စတိုခန်းအရွယ်မျှသာ ကျယ်ဝန်းသော အခန်းတစ်ခန်းပါ အဆောက်အအုံငယ်တစ်လုံး ရှိနေသည်။

ပြီးခဲ့သော နှစ်ပေါင်း ၃၀၀ ကာလအတွင်း အိမ်ထောင်ရေးအဆင်မပြေသော ဇနီးမောင်နှံများကို ဘုန်းတော်ကြီးက ယခုအိမ်တွင် ရက်သတ္တ ၆ ပတ်ကြာ သော့ခတ်ကာ ပိတ်ထားကာ မိမိတို့၏ ပြဿနာများကို အဖြေရှာစေခဲ့သည်။

(၁၅ ရာစုနှစ် ဘုရားကျောင်းဝန်းအတွင်း နှစ်ပေါင်း ၃၀၀ သက်တမ်းရှိ အိမ်ထောင်ရေးအကျဉ်းခန်းတစ်ခုရှိနေပြီး ကွာရှင်းမှုများ မဖြစ်စေရန် ရည်ရွယ်သည်ဟု ဆိုသည်။ ဓာတ်ပုံ-Stephen McGrath)

ရုတ်တရက်ကြည့်လျှင် မနှစ်မြို့စရာလုပ်ဆောင်မှုဟု ထင်ရသော်လည်း မှတ်တမ်းမှတ်ရာများအရ အိမ်ထောင်ရေး အကျဉ်းခန်းမှာ အလွန်ထိရောက်မှုရှိကြောင်း သိရသည်။

ယခုအကျဉ်းခန်းကြောင့် နှစ်ပေါင်း ၃၀၀ ကာလအတွင်း ကွာရှင်းပြတ်စဲမှု တစ်ကြိမ်သာ ရှိခဲ့ဖူးကြောင်း လက်ရှိဘုန်းတော်ကြီး Ulf Ziegler က ပြောသည်။

ကျဉ်းမြောင်းမှောင်မိုက်သော အကျဉ်းခန်းမှာ ယနေ့အခါတွင် ပြတိုက်တစ်ခုအဖြစ်သို့ ပြောင်းလဲထားသည်။

အခန်း၏ မျက်နှာကြက်မှာ အလွန်နိမ့်ပြီး နံရံများမှာ ထူထဲလှသည်။

အခန်းအတွင်း စားပွဲတစ်လုံး၊ ကုလားထိုင်တစ်လုံး၊ ပစ္စည်းထားသိုရန်နေရာတစ်ခုနှင့် ကျဉ်းမြောင်းလှသော ရှေးခေတ်ကုတင်တစ်လုံးတို့သာ ရှိသည်။

ထိုအခန်းထဲတွင် ပစ္စည်းများကို တစ်ခုသာ ထားရှိခွင့်ပေးပြီ ခေါင်းအုံး၊ စောင်တို့မှသည် အားလုံးကို အတူဝေမျှသုံးစွဲရမည်ဖြစ်သည်။

(အကျဉ်းခန်းအတွင်း စားပွဲတစ်လုံးနှင့် ကုတင်တစ်လုံးသာရှိသည်။ ဓာတ်ပုံ-Stephen McGrath)

ထရန်ဆယ်လ်ဗေးနီးယား ဆက်ဇွန်တို့ခေတ်က ကွာရှင်းပြတ်စဲခြင်းကို ခွင့်ပြုထားသော်လည်း အိမ်ထောင်ရေးဖောက်ပြန်မှုမျိုးကဲ့သို့ အကြောင်းရပ်မျိုးရှိမှသာ ကွာရှင်းခွင့်ပေးပြီး အများအားဖြင့် မခွဲမခွါ ပေါင်းသင်းကြရန်သာ အားပေးသည်။

ထိုခေတ်က ကွာရှင်းလိုသော ဇနီးမောင်နှံတို့သည် ဘုန်းတော်ကြီးထံ သွားရောက်ကာ လျှောက်ထားတင်ပြရသည်။

ထိုအခါတွင် ဘုန်းတော်ကြီးက ထိုစုံတွဲကို အိမ်ထောင်ရေးအကျဉ်းခန်းထဲသို့ ပို့လိုက်ပြီး ရက်သတ္တ ၆ ပတ် သော့ခတ်ပိတ်ထားလိုက်သည်။

အပြီးသတ် မကွာရှင်းမီတွင် စိတ်သဘောထား မတိုက်ဆိုင်သည်များကို ညှိနှိုင်းနိုင်ရန် ဖြစ်သည်။

(ကွာရှင်းလိုသော ဇနီးမောင်နှံတို့သည် ဘုန်းတော်ကြီးထံ သွားရောက်ကာ လျှောက်ထားတင်ပြရသည်။ ထိုအခါတွင် ဘုန်းတော်ကြီးက ထိုစုံတွဲကို အိမ်ထောင်ရေးအကျဉ်းခန်းထဲသို့ ပို့လိုက်ပြီး ရက်သတ္တ ၆ ပတ် သော့ခတ်ပိတ်ထားလိုက်သည်။ ဓာတ်ပုံ-Stephen McGrath)

(အကျဉ်းခန်း၏ မြင်ကွင်း။ ဓာတ်ပုံ-Stephen McGrath)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Tale of a sleepy town with a 300-year-old marital prison (bbc)