ကြက်သွန်နီဖြင့် ရက်သတ္တ ၆ ပတ်အတွင်း ဆံပင်ပြန်ပေါက်စေနိုင်ကြောင်း သိပ္ပံပညာရှင်များတွေ့ရှိ

((မှတ်ချက်။ ကြက်သွန်နီဖြင့် ဆံပင်ပြန်ပေါက်နိုင်ကြောင်း လေ့လာချက်ကို အီရတ်နိုင်ငံမှ သိပ္ပံပညာရှင် Khalifa E Sharquie က ၂၀၀၂ ခုနှစ်တွင်လည်းကောင်း၊ အီရန်နိုင်ငံမှ သိပ္ပံပညာရှင် Sobhan Yousefi က ၂၀၂၅ ခုနှစ်၊ ဇူလိုင်လ ၂၂ ရက်တွင်လည်းကောင်း ဆေးသုတေသန စာတမ်းများ တင်သွင်းထားကြသည်။ ယခုဖော်ပြမည့် အကြောင်းရပ်များမှာ အင်္ဂလန်အခြေစိုက် The Sun သတင်းဌာနက ဖော်ပြသော သတင်းဖြစ်ပါသည်။))

အကယ်၍ သင်သည် ဆံပင်ကျွတ်ကာ ထိပ်ပြောင်နေသည့် ပြဿနာနှင့် ရင်ဆိုင်နေရပါက စိတ်မပူပါနှင့်။ သင့်အတွက် အထူးသင့်တော်သည့် သတင်းဆောင်းပါးကို တွေ့လိုက်ရပြီ ဖြစ်သည်။

အထူးသဖြင့် တန်ဖိုးကြီး ခေါင်းလျှော်ရည်များ၊ ငွေကုန်ကြေးကျများသည့် ဆံပင်ကုသမှုများ မတတ်နိုင်ပါက စိတ်မပူပါနှင့်။ သင့်အတွက် နည်းလမ်းတစ်ခု ရှိနေပါသည်။

(ဆံပင်ကျွတ်ကာ ခေါင်းပြောင်နေသူများအနေဖြင့် ကြက်သွန်နီကို အသုံးပြုသင့်ကြောင်း သိပ္ပံပညာရှင်တစ်ဦးက တင်ပြလာသည်။ ဓာတ်ပုံ-Getty)

ကြက်သွန်နီသည် ဆံပင်ပြန်ပေါက်စေနိုင်ရုံမျှမက မှိုနှင့် ဘောက်များကိုလည်း ကာကွယ်ပေးနိုင်သည်။

YouTube တွင် ဒေါက်တာ Eric Berg DC မကြာသေးမီက တင်ခဲ့သော ဗွီဒီယိုဖိုင်တစ်ခု၌ ပြောကြားထားမှုအရ ကြက်သွန်နီတွင် ဆာလ်ဖာ ပါဝင်ကြောင်း၊ ဆာလ်ဖာသည် ခန္ဓာကိုယ်က keratin ဓာတ် ထုတ်လုပ်မှုအတွက် အထောက်အကူဖြစ်စေကြောင်း၊ keratin သည် ဆံပင်တွင် တွေ့ရသော အဓိက ပရိုတိန်းဖြစ်ကြောင်း ပြောကြားထားသည်။

ကြက်သွန်နီတွင် quercetin ဓာတ် ပါဝင်မှုလည်း မြင့်မားသည်။

Quercetin သည် ဆံပင်ကျွတ်ခြင်းကို ဖြစ်စေသည့် အခြေခံအကြောင်းရင်းအချို့ကို ဖြေရှင်းပေးနိုင်သည်။

“Quercetin ဟာ ဆံပင်မွေးညင်းပေါက်တွေမှာ ကြီးထွားမှု ဟော်မုန်းကို မြှင့်တင်ပေးပါတယ်” ဟု ဒေါက်တာ Eric က ပြောသည်။

“ဒါက အစွမ်းထက်တဲ့ အနုဇီဝ တိုက်ဖျက်သူလည်းဖြစ်ပြီး ဦးရေမှာ တဆေး၊ မှိုနဲ့ ဘောက်တွေ စွဲတာလည်း ကာကွယ်ပေးပါတယ်”

((အသုံးပြုရမည့် နည်းလမ်း))

Quercetin ပေါကြွယ်ဝသော ကြက်သွန်နီဖြင့် ကြက်သွန်နီခေါင်းလျှော်ရည် ပြုလုပ်ကာ အသုံးပြုပါက မယုံနိုင်အောင် အစွမ်းထက်လှကြောင်း ဒေါက်တာ Eric က ပြောသည်။

ဦးစွာအားဖြင့် ကြက်သွန်နီကို အခွံခွာ ပါးပါးလှီးကာ သစ်သီးဖျော်စက်ဖြင့် ကြိတ်ချေပါ။

ထို့နောက် အဝတ်ပါး သန့်သန့်ဖြင့် အရည်စစ်ထုတ် ရယူပါ။

ထိုသို့ လုပ်ဆောင်ပြီးပါက ဦးခေါင်းကို ရေစွတ်ပြီးနောက် ကြက်သွန်နီအရည်ဖြင့် လိမ်းကျံ နှိပ်နယ်ပေးပါ။ မွေးညင်းပေါက်များထဲသို့ စိမ့်ဝင်သွားစေရန် မိနစ်အနည်းငယ် နှိပ်နယ်ပေးပါ။

ဒေါက်တာ Eric က အကြံပြုသည်မှာ ချက်ချင်း ရေဆေးမပစ်ဘဲ တစ်နာရီခန့် ထားလိုက်ပါက အံ့ဖွယ်အစွမ်းပြမည်ဖြစ်ကြောင်း ပြောသည်။

တစ်နာရီခန့် ကြာလျှင် ကြက်သွန်နံ့များ ပျောက်စေရန် ခေါင်းလျှော်ရည်ဖြင့် ခေါင်းလျှော်ပေးပါ။

အကယ်၍ အနံ့စွဲနေသေးပါက သံပုရာရည်အနည်းငယ် လိမ်းပေးနိုင်ပါသည်။

((သိပ္ပံ အထောက်အထား))

ယခုအကြောင်းရပ်မှာ အွန်လိုင်းတွင် တွေ့ရတတ်သည့် ပေါ်ပင် ဗွီဒီယိုတစ်ခုသဖွယ် မှတ်ထင်ရသော်လည်း သိပ္ပံစမ်းသပ်ထားမှု အထောက်အထားများ ခိုင်ခိုင်လုံလုံ ရှိပါသည်။

Journal of Dermatology တွင် ဖော်ပြခဲ့သော သိပ္ပံလေ့လာချက်တစ်ရပ်တွင် ဦးရေပြားသို့ ကြက်သွန်နီရည်ဖြင့် လိမ်းပေးပါက အချို့သူများတွင် ဆံပင်ပြန်ပေါက်လာကြောင်း ဖော်ပြထားသည်။

(မှတ်ချက်။ အဆိုပါ လေ့လာချက်ကို အီရတ်နိုင်ငံမှ သိပ္ပံပညာရှင်က ပြုလုပ်ခဲ့ခြင်းဖြစ်သည်)

ထိုသုတေသနတွင် ဆံပင်ကျွတ်သည့် ရောဂါ (alopecia areata) ခံစားနေရသူများ ပါဝင်စမ်းသပ်ခံခဲ့ကြသည်။

ကြက်သွန်နီရည်ကို တစ်ရက် ၂ ကြိမ် နေ့စဉ်လိမ်းပေးရာ အချို့မှာ ရက်သတ္တ ၂ ပတ်အကြာတွင် ဆံပင်ပြန်ပေါက်လာသည်ဟု ဆိုသည်။

ပါဝင်စမ်းသပ်ခံသူ ၇၄ ရာခိုင်နှုန်းမှာ ရက်သတ္တ ၄ ပတ်အကြာတွင် ဆံပင်ပြန်ပေါက်လာပြီး ရက်သတ္တ ၆ ပတ်အကြာတွင် ဆံပင်ပြန်ပေါက်သူ ၈၇ ရာခိုင်နှုန်း ရှိသည်။

ထိုစမ်းသပ်ချက်တွင် အမျိုးသားများသာမက အမျိုးသမီးများလည်း ပါဝင်ခဲ့သည်။ သို့သော် အမျိုးသားများမှာ အမျိုးသမီးများထက် ဆံပင်ပြန်ပေါက်နှုန်း မြင့်မားသည်ကို တွေ့ရသည်။

((ကြက်သွန်နီက ဆံပင် ပြန်ပေါက်စေနိုင်ကြောင်း လေ့လာခဲ့သော သိပ္ပံပညာရှင်များ))

၁။ Khalifa E Sharquie ။ အီရတ်နိုင်ငံ၊ ဘဂ္ဂဒက်မြို့ သင်ကြားရေးဆေးရုံ၊ အရေပြားနှင့် ကာလသား ရောဂါဌာန ။ ၎င်း၏ သုတေသနစာတမ်းကို ရှာဖွေနိုင်သည့် ကုဒ်နံပါတ်= PMID: 12126069

၂။ Sobhan Yousefi ၊ အီရန်နိုင်ငံ သိပ္ပံဝန်ကြီးဌာန ၊ စာတမ်းတင်သွင်းသည့်နေ့စွဲ= ၂၀၂၅ ခုနှစ်၊ ဇူလိုင်လ ၂၂ ရက်။ စာတမ်းအမည်=The Effect of Onion Juice on

Strengthening Hair and Preventing Hair Loss ၊ ဆက်သွယ်နိုင်သည့် အီးမေးလ်လိပ်စာ = sobhan.yousefi.daroo@gmail.com

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Forget rosemary oil, RED ONION’s the secret to stopping hair loss, Dr claims – how to use it for new growth in 6 weeks