မိန်းမများကို ကြောက်သောကြောင့် ၁၅ ပေမြင့်သော ခြံစည်းရိုး ကာရံကာ ၅၅ နှစ်လုံး တစ်ဦးတည်းသီးခြားနေထိုင်ခဲ့သော အသက် ၇၁ နှစ်အရွယ် အဘိုး

ရဝမ်ဒါနိုင်ငံတွင် ကာလစ္စတီ ဇမ်ဝီတာ (Callixte Nzamwita) အမည်ရှိ အသက် ၇၁ နှစ်အရွယ် အဘိုးသည် မိန်းမများကို အလွန်တရာကြောက်ရွံ့သောကြောင့် ပြီးခဲ့သော ၅၅ နှစ်တာလုံး တစ်ဦးတည်း နေထိုင်ခဲ့သူ ဖြစ်သည်။

အဘိုး ဇမ်ဝီတာသည် ၁၆ နှစ်သားအရွယ်ကတည်းက မိမိကိုယ်ကို အကျဉ်းချထားသည့်သဖွယ် တစ်ဦးတည်း အထီးကျန်နေထိုင်ခဲ့သူဖြစ်သည်။

မိန်းမများကို အလွန်ကြောက်ရွံ့သည့် ရောဂါကို gynophobia ဟုခေါ်သည်။ သို့သော် gynophobia ကို စိတ်ကျန်းမာရေး မကောင်းသည့်အခြေအနေဟု ဆေးပညာအရ တရားဝင် သတ်မှတ်ထားခြင်းမရှိဘဲ တစုံတရာကို ကြောက်ရွံ့မှုတစ်ခုအဖြစ်သာ သတ်မှတ်ထားသည်။

တွေ့ဆုံမေးမြန်းခန်းတစ်ခုတွင် ဇမ်ဝီတာက “ခြံစည်းတန်းအမြင့်ကြီးကာထားပြီး အိမ်ထဲမှာ ကိုယ့်ကိုယ်ကို သော့ခတ်ပိတ်ထားပါတယ်။ မိန်းမတွေ ကျွန်တော့်နား မလာနိုင်အောင် ဖြစ်ပါတယ်” ဟု ပြောဖူးသည်။

၎င်းကို အိမ်နီးချင်း အမျိုးသမီးများက ကူညီ ဈေးဝယ်ပေးသည့်အခါမျိုးတွင် ပစ္စည်းပစ္စယများကို အဝေးမှသာ လှမ်းပေးရပြီး အနားသို့ အကပ်မခံချေ။

 “သူက မိန်းမတွေကို ကြောက်တယ်ဆိုပေမယ့် သူ့ကို စားသောက်စရာနဲ့ တခြားပစ္စည်းတွေ ကူညီဝယ်ယူပေးနေတာက ကျွန်မတို့ အမျိုးသမီးတွေပါ” ဟု အိမ်နီးချင်း အမျိုးသမီးတစ်ဦးက ပြောသည်။

ထိုသို့ အထီးကျန်နေထိုင်ရသော်လည်း ဇမ်ဝီတာသည် မိမိဘဝကို မိမိကျေနပ်ရောင့်ရဲနေသည့်ဟန်ရှိနေသည်။

မိန်းမကြောက်ရောဂါ (gynophobia) နည်းတူ အခြားသော phobia တို့မှာ ကလေးဘဝ (သို့မဟုတ်) ဆယ်ကျော်သက်အရွယ်တွင် စတင်အစပျိုးလေ့ရှိပြီး အရွယ်ရလာသည်နှင့်အမျှ လျော့ပါးသွားလေ့ရှိတတ်သည်။

အခြား အမျိုးသမီးတစ်ဦးက ပြောပြသည်မှာ “ကျွန်မတို့က သူ့ကို အကူအညီပေးဖိုု့ ကြိုးစားတဲ့အခါ သူက အနားကပ်တာ၊ စကားပြောတာ မလုပ်ဖို့ တားမြစ်လေ့ရှိပါတယ်။ သူ့အိမ်ကို ပစ္စည်းပစ္စယတွေ ပို့ပေးတဲ့အခါ သူ့နားကို ကပ်လို့မရပါဘူး။ အဝေးကနေပဲ လှမ်းယူပါတယ်။” ဟု ဆိုသည်။

Gynophobia ၏ ရောဂါလက္ခဏာများမှာ မိန်းမများကို ကြောက်ရွံ့စိတ် ကြီးစိုးနေခြင်းဖြစ်ပြီး မိန်းမများအကြောင်း တွေးမိလျှင်ပင် စိတ်သောကများလာလေ့ရှိသည်။

ထို့အပြင် အလွန်တုန်လှုပ်ခြောက်ခြားခြင်း၊ ရင်ဘတ်ထဲတွင် တင်းကြပ်ကြပ်ဖြစ်လာခြင်း၊ ချွေးစီးပြန်လာခြင်း၊ ချက်ချင်း နှလုံးခုန်မြန်လာခြင်း၊ အသက်ရှူရခက်ခဲခြင်းတို့လည်း ဖြစ်ပေါ်တတ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: 71 Year Old Man Lives 55 Years In Isolation For Fear Of Women