တရုတ်ပြည်တွင် လူငယ်တစ်ဦးမှာ ချစ်သူမိန်းကလေးဟောင်းကို မေ့နိုင်ရန်အတွက် တောင်တန်းများဆီသို့ ထွက်သွားရာ ရဲတပ်ဖွဲ့ဝင် ၁၀၀ ဦး၊ ခွေးများ၊ ဒရုန်းများ ၊ အသံလှိုင်းဖြင့် ခြေရာခံသည့် စက်များဖြင့် ရှာဖွေခဲ့ရ

တရုတ်ပြည်တွင် အချစ်ကြောင့် အသည်းကွဲနေသည့် လူငယ်တစ်ဦးသည် ချစ်သူမိန်းကလေးဟောင်းကို မေ့ပျောက်နိုင်ရန်အတွက် တောကြီးမျက်မည်းထဲသို့ အစာရေစာမပါ၊ ဖုန်းယူမသွားဘဲ ထွက်ခွာသွားမှုမှာ ပြည်မကြီး လူမှုကွန်ရက်သုံးစွဲသူတို့ကြား ဟိုးလေးတကြော် ဖြစ်နေသည်။

တရုတ်ပြည် အရှေ့တောင်ပိုင်း ကျဲ့ကျန်းပြည်နယ်၊ ဟန်ကျိုးမြို့၊ ယုဟန်ခရိုင်ရှိ ရဲတပ်ဖွဲ့သို့ ဟူနန်ပြည်နယ်၊ ချန်ရှားမြို့တွင် နေထိုင်သော အမျိုးသားတစ်ဦးက ဖုန်းဆက် တိုင်တန်းလာသည်မှာ မိမိ၏ ညီငယ် ရှောင်လင်း (Xiaolin) ကို အဆက်အသွယ်မရသည်မှာ ၃ ရက်ရှိပြီဖြစ်ကြောင်း သတင်းပေးတိုင်တန်းသည်။

ရှောင်လင်းသည် ဟန်ကျိုးမြို့သို့ တစ်ဦးတည်းသွားရောက်နေထိုင် အလုပ်လုပ်နေခြင်း ဖြစ်သည်။

ရှောင်လင်းထံမှ နောက်ဆုံးအဆက်အသွယ်ရခဲ့သည်မှာ ဇွန်လ ၁၉ ရက်ကဖြစ်ကြောင်း ၎င်းက ရဲတပ်ဖွဲ့သို့ ပြောသည်။

ထို့ကြောင့် ရဲအရာရှိများမှာ ရှောင်လင်းနေထိုင်သည့် တိုက်ခန်းသို့ သွားရောက်ရှာဖွေခဲ့ကြသည်။

တိုက်ခန်းတွင် လူတစ်ဦးမှာ မတွေ့ရ။ ရှောင်လင်းက သူ၏ဖုန်းကို တိုက်ခန်းထဲတွင် ထားခဲ့သည်ကိုလည်း တွေ့ရသည်။

စီစီတီဗွီ မှတ်တမ်းများအရ ရှောင်လင်းသည် ၎င်းငှားရမ်းနေထိုင်သော တိုက်ခန်းမှ ဇွန်လ ၂၀ ရက် မွန်းလွဲပိုင်းတွင် ခြေလျင်ထွက်ခွာသွားသည်ကို သိရသည်။

၎င်းနောက်ဆုံးရှိနေခဲ့သည့်နေရာမှာ နောက်တနေ့မနက် ၁ နာရီခန့်တွင် စီချွမ်ပြည်နယ်၊ တလျန်တောင်တန်း ဒေသဝန်းကျင်သို့ ရောက်ရှိခဲ့ကြောင်း သိရသည်။

(▲ ရဲတပ်ဖွဲ့သည် စောင့်ကြည့်ရေးကင်မရာ မှတ်တမ်းများဖြင့် ၆ ရက်အကြာတွင် ရှောင်လင်းကို ရှာဖွေတွေ့ရှိခဲ့သည်။ ဓာတ်ပုံ-Handout)

ယုဟန်ရဲတပ်ဖွဲ့သည် ရှောင်လင်းနောက်ဆုံးရှိနေခဲ့သောဒေသတွင် ရဲတပ်ဖွဲ့ဝင်နှင့် ဒေသခံပေါင်း ၁၀၀ ကျော်ဖြင့် ရှာဖွေခဲ့ကြသည်။

ရဲတပ်ဖွဲ့က လေ့ကျင့်ပေးထားသော ခွေးများ၊ ဒရုန်းများ၊ အသံလှိုင်းထုတ်လွှတ်ရှာဖွေသည့် sonar များဖြင့် ရှာဖွေခဲ့သည့်တိုင် ရှာမတွေ့ခဲ့။

ဇွန်လ ၂၆ ရက်တွင်ကား ဟန်ကျိုးမြို့၊ လီနန်ခရိုင်ရှိ ပန်းခြံတစ်ခုထဲတွင် တပ်ဆင်ထားသော စောင့်ကြည့်ကင်မရာမှတ်တမ်းများမှတဆင့် ရှောင်လင်းကို တွေ့ရှိခဲ့သည်။

ထို့ကြောင့် ဒေသတွင်း အာဏာပိုင်တို့က လိုက်လံရှာဖွေရာ ရှောင်လင်းကို တွေ့ရှိသွားသည်။

ယုဟန်ရဲတပ်ဖွဲ့မှ ဒုရဲမှူး ကျူးလိလျန်းက HTV-1 သတင်းဌာနသို့ပြောသည်မှာ ရှောင်လင်းကို ပေတိပေစုတ် အနေအထားဖြင့် တွေ့ရသည်ဟု ဆိုသည်။

ဒုရဲမှူး ကျူးလိလျန်း၏ ပြောကြားချက်အရ ရှောင်လင်းသည် ချစ်သူနှင့် လမ်းခွဲလိုက်ရပြီးနောက် မေ့ပျောက်နိုင်ရန် တောင်တန်းများဆီသို့ ထွက်ခဲ့ခြင်းဖြစ်ကြောင်း ပြောသည်။

ရှောင်လင်းသည် ဟန်ကျိုးမြို့ ရှန်လင်ခရိုင်ရှိ တောင်ပေါ်ဒေသ၊ ထိုမှတဆင့် ဖုယန်ခရိုင်၊ ကျုံထိုင်းခရိုင် များကို ဖြတ်သန်းလမ်းလျှောက်ကာ နောက်ဆုံးတွင် လိနန်သို့ ရောက်လာခဲ့ခြင်းဖြစ်ပြီး ခရီးအားဖြင့် ၄၀ ကီလိုမီတာခန့် ရှိသည်။ ကျုံထိုင်းသည် ဝါးတောများဖြင့် နာမည်ကြီးသည့်နေရာတစ်ခု ဖြစ်သည်။

ရှောင်လင်းသည် တောင်တန်းများဆီသို့ ထွက်လာခဲ့သည့် ပထမ ၃ ရက်အတွင်း အစားမစား၊ ရေမသောက်ခဲ့ရ။

နောက်ဆုံးတွင် ဆာလောင်မှုကို မခံနိုင်တော့သောကြောင့် လမ်းတလျှောက်တွေ့ရသည့် တောရိုင်းသစ်သီးများစားပြီး စမ်းချောင်းမှ ရေများ သောက်ခဲ့ရသည်။

(▲ ရှောင်လင်းကို ရှာတွေ့ချိန်တွင် အဝတ်အစားများ စုတ်ပြတ်နေကြောင်း ရဲတပ်ဖွဲ့က ပြောသည်။ ဓာတ်ပုံ-Shutterstock)

ရဲတပ်ဖွဲ့သို့ ရှောင်လင်းက ပြောသည်မှာ မိမိကြောင့် မိသားစုနှင့် အခြားသူများ စိတ်ပူခဲ့ရသည်ကို ဆင်ခြင်သုံးသပ်မိပြီဖြစ်ကြောင်း၊ စိတ်လိုက်မာန်ပါ ထပ်မလုပ်ပါဟု ကတိပေးကြောင်း ပြောခဲ့သည်။

ရှောင်လင်း၏ ဖြစ်ရပ်မှာ ပြည်မကြီး လူမှုကွန်ရက်သုံးစွဲသူတို့ကြား ဟိုးလေးတကြော်ဖြစ်နေပြီး အမျိုးမျိုးအဖုံဖုံ မှတ်ချက်ပေးလျက်ရှိကြသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: ‘Missing’ Chinese man walks for 6 days in mountains to forget ex, triggers huge search Photo Credit-Shutterstock, Handout