ဂါနာတွင် အရက်သမားများအသင်းက ရက်သတ္တ ၃ ပတ်အတွင်း အရက်ဈေးများ လျှော့ချပေးရန် အစိုးရကို ရာဇသံပေးထားမှု သတင်းကြီးနေ

ဂါနာနိုင်ငံ၏ ငွေကြေးဖြစ်သော စီဒီ (Cedi) တန်ဖိုးတက်လာသည့် အခြေအနေကောင်းရှိလာမှုကြောင့် အရက်နှင့် အဖျော်ယမကာ ဈေးနှုန်းများ လျှော့ချပေးရန် ယမကာလုလင်များအသင်းက အစိုးရအား ရက်သတ္တ ၃ ပတ် ရာဇသံပေးထားမှု နာမည်ကြီးနေသည်။

ယမကာလုလင်များအဖွဲ့ ဥက္ကဌဖြစ်သူ မိုးဆက်စ် ဒရိုင်းဘုန်းစ် (Moses Drybones) က X လူမှုကွန်ရက်တွင် တင်ခဲ့သော ဗွီဒီယိုဖိုင်ထဲ၌ ပြောကြားထားသည်မှာ ဂါနာ၏ ငွေကြေးမှာ နိုင်ငံခြားငွေလဲလှယ်နှုန်းအရ တန်ဖိုးတက်လာသော်လည်း အရက်ဈေးမကျဖြစ်နေကြောင်း ဝေဖန်ထားသည်။

“အခုချိန်ထိ အရက်တွေ ဈေးကြီးနေတုန်းပါ။ အရက်ဝယ်မယ်ဆိုရင် ၁၅ ရာခိုင်နှုန်းလောက် ဈေးကြီးနေပါတယ်။ ဒါက အရက်ဆိုင်တွေကို ထိခိုက်ပါတယ်” ဟု မိုးဆက်စ်က ပြောသည်။

စီဒီငွေ တန်ဖိုးတက်လာသောကြောင့် ကုန်စည်အချို့ ဈေးကျသွားသည့်တိုင် အရက်ဈေး မြင့်မားနေဆဲ ဖြစ်နေခြင်းအပေါ် စိတ်ပျက်မိကြောင်း ယမကာလုလင်များအသင်းက ပြောသည်။

“စီဒီငွေ ခိုင်မာအားကောင်းလာပြီး ကုန်စည်တချို့ ဈေးကျသွားတာ ကျွန်တော်တို့ တွေ့ရပါတယ်။ ဒါပေမယ့် အရက်ဈေးက မြင့်မားနေဆဲပါ” ဟု ယမကာလုလင်များအသင်း၏ ကိုယ်စားလှယ်တစ်ဦးက ဗွီဒီယိုဖိုင်ထဲတွင် ပြောကြားထားသည်။

အရက်များ ဈေးကြီးနေခြင်းမှာ နိုင်ငံတဝန်းရှိ အရက်ဘားများ၊ အရက်ဆိုင်များနှင့် သောက်သုံးသူများကို ထိခိုက်နစ်နာစေကြောင်း ယမကာလုလင်များအသင်းက ပြောကြားပြီး ဂါနာသမ္မတ ဂျွန် ဒရာမားနီ မဟားမား (John Dramani Mahama) နှင့် ကုန်သွယ်စက်မှု ဝန်ကြီးတို့အား ယခုကိစ္စကို ကိုင်တွယ်ဖြေရှင်းပေးရန် တောင်းဆိုထားသည်။

“ဒါကြောင့် ကျွန်တော်တို့က သမ္မတ ဂျွန် ဒရာမားနီ မဟားမားနဲ့ ကုန်သွယ်စက်မှုဝန်ကြီးကို ဈေးနှုန်းနဲ့ ပတ်သက်ပြီး တစ်ခုခုလုပ်ဆောင်ပေးဖို့ တောင်းဆိုနေတာ ဖြစ်ပါတယ်။ အရက်ဈေးနှုန်း လျှော့ချရေး ကိုင်တွယ်ဖြေရှင်းပေးဖို့ သူတို့ကို ၃ ပတ်အချိန်ပေးထားပါတယ်” ဟု ယမကာလုလင်များအသင်းက ပြောသည်။

မဖြေရှင်းပေးပါက အဖွဲ့ဝင်ပေါင်း ၁၆ ဒသမ ၆ သန်းရှိသော ယမကလုလင်များ အသင်းအနေဖြင့် နိုင်ငံတဝန်း ဆန္ဒပြမည်ဖြစ်ကြောင်း သတိပေးထားသည်။

ဂါနာနိုင်ငံ၏ စီဒီငွေသည် ၂၀၂၅ ခုနှစ်အတွင်း အလွန်ခိုင်မာအားကောင်းလာခဲ့ပြီး ၅၀ ရာခိုင်နှုန်းအထိ ဈေးတက်လာခဲ့ရာ ယခုနှစ်အတွင်း ကမ္ဘာပေါ်တွင် စွမ်းဆောင်ရည်အကောင်းဆုံး ငွေကြေးအဖြစ် ရပ်တည်နေကြောင်း Bloomberg သတင်းဌာနက ဖော်ပြသည်။

ယခုနှစ်စပိုင်းက အမေရိကန် ၁ ဒေါ်လာလျှင် ၁၅ စီဒီဖြစ်ခဲ့ရာမှ ယခုအခါ အမေရိကန် ၁ ဒေါ်လာလျှင် ၁၀ စီဒီအထိ ဈေးတက်သွားခြင်း ဖြစ်သည်။

ယခုအချိန်အထိမူ ယမကာလုလင်များအဖွဲ့၏ တောင်းဆိုချက်အပေါ် ဂါနာအစိုးရက မည်သို့တုံ့ပြန်ထားသည်ဆိုခြင်းနှင့် ဆန္ဒပြဖြစ်ခြင်း ရှိ၊ မရှိကိုမူ မသိရသေးချေ။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Ghana drunkards group threatens protest over high alcohol prices