မလာနီယာ ထရမ့် (ဒေါ်နယ်ထရမ့်၏ ဇနီး) ၏ ကြေးရုပ်တုကြီး အခိုးခံရမှု

((မလာနီယာ ထရမ့် ဘယ်သူလဲ))

မလာနီယာ ခနော့စ် ထရမ့် (မွေး-၁၉၇၀) (Melania Knauss Trump) (ငယ်နာမည်- မလာနီဂျာ နော့စ် ၊ Melanija Knavs) သည် ဆလိုဗေးနီးယားနိုင်ငံသူ၊ အမေရိကန်မော်ဒယ်တစ်ဦးဖြစ်ပြီး ၂၀၂၅ ခုနှစ်မှ စတင်ကာ အမေရိကန်ပြည်ထောင်စု၏ First Lady ဖြစ်လာခဲ့သည်။

မလာနီယာ ထရမ့်သည် ၂၀၁၇ ခုနှစ်မှ ၂၀၂၁ ခုနှစ်အထိ ဒေါ်နယ်ထရမ့်၏ ပထမ သမ္မတသက်တမ်းကာလ တွင်လည်း First Lady ဖြစ်ခဲ့သည်။

မလာနီယာ ထရမ့်သည် အမေရိကန်သမ္မတ ဂျွန် ကွင်စီ အဒမ် (John Quincy Adams) ၏ ဇနီးဖြစ်သူ လူဝီဆာ အဒမ် (Louisa Adams) နောက်ပိုင်း naturalized citizen အဖြစ်မှ First Lady ဖြစ်လာသော ဒုတိယမြောက် အမျိုးသမီးလည်း ဖြစ်သည်။

(မှတ်ချက်။ Naturalized Citizen ဟူသည်မှာ နိုင်ငံတစ်နိုင်ငံတွင် ကာလကြာရှည် နေထိုင်ခဲ့ပြီးနောက် Naturalization လုပ်ငန်းစဉ်ဖြင့် နိုင်ငံသားဖြစ်လာခဲ့ခြင်း ဖြစ်သည်။ သို့သော် နိုင်ငံတစ်နိုင်ငံတွင် နေထိုင်နေရုံမျှဖြင့် အလိုအလျောက်ကား နိုင်ငံသားဖြစ်မလာနိုင်ချေ။ Naturalization ၏ စည်းမျဉ်းဥပဒေ ဘောင်အတွင်းမှ လျှောက်ထားမှု ပြုလုပ်ခြင်းဖြင့်သာ ရရှိနိုင်သည်။ သတ်မှတ်ထားသောကာလအတွင်း ဥပဒေနှင့်အညီ - ဥပမာအားဖြင့် အမြဲတမ်းအခြေချနေထိုင်သူ၊ အလုပ်ဗီဇာကိုင်ဆောင်ထားသူ အစရှိသဖြင့် သတ်မှတ်ကာလတစ်ခု နေထိုင်ထားသူ ဖြစ်ရမည် ဖြစ်သည်။ အမေရိကန်တွင်ဆိုလျှင် Green Card ကိုင်ဆောင်ထားပြီး ၅ နှစ်ကြာနေထိုင်ထားသူများ လျှောက်ထားနိုင်သည်။ ထို့အပြင် အခြားသော အရည်အချင်း လိုအပ်ချက်များလည်း ပြည့်မီရမည်ဖြစ်သည်။ နိုင်ငံသမိုင်း၊ ဥပဒေ အစရှိသော ဘာသာရပ်များ အပါအဝင် နိုင်ငံသား အရည်အချင်းစစ် စာမေးပွဲ ဖြေဆိုရခြင်း၊ ကိုယ်ကျင့်တရား ကောင်းမွန်ရခြင်း (ကြီးလေးသော ရာဇဝတ်မှု ကျူးလွန်ထားမှု မရှိခြင်း)၊ သက်ဆိုင်ရာနိုင်ငံ၏ ဘာသာစကားကို ကျွမ်းကျင်စွာ ပြောဆိုနိုင်ခြင်း အစရှိသည်တို့ ဖြစ်သည်။ ထို့အပြင် နိုင်ငံသားအဖြစ် ခွင့်ပြုခံရပါက ကျမ်းသစ္စာကျိန်ဆိုပွဲ အခမ်းအနားသို့ တက်ရောက်ကာ ကျမ်းသစ္စာကျိန်ဆိုရမည် ဖြစ်သည်။)

(ဆက်စပ်သတင်း)

Mark Zuckerberg က နေအိမ်အနောက်ဘက် ခြံဝန်းအတွင်း ဇနီးဖြစ်သူ ပရစ်ဆီလာ၏ ရုပ်တုကြီး စိုက်ထူထားရှိ

ဆလိုဗေးနီးယားနိုင်ငံတွင် မလာနီယာ ထရမ့်၏ ဇာတိမြို့၌ ၎င်း၏ ကြေးရုပ်တုကြီးတစ်ခု ရှိသည်။

မူလက ကြေးရုပ်တုမဟုတ်ဘဲ သစ်သားရုပ်တုဖြစ်ခဲ့ပြီး နောက်ပိုင်းတွင် မီးရှို့ဖျက်ဆီးသူများကြောင့် ကြေးရုပ်တုဖြင့် အစားထိုးခဲ့ပြီး ၅ နှစ်အကြာတွင် ယခုကဲ့သို့ ခိုးယူခံလိုက်ရခြင်းဖြစ်သည်။

ဆလိုဗေးနီးယား ရဲတပ်ဖွဲ့က CNN သတင်းဌာနသို့ ပြောသည်မှာ ကြေးရုပ်တုကြီး တည်ရှိရာ ရော့ဇ်နို (Rozno) ကျေးရွာတွင် ကြေးရုပ်ခိုးယူခံရမှု ဖြစ်ပွားကြောင်း သတင်းပေးတိုင်တန်းလာမှုရှိသည်ဟု ပြောသည်။

အာဏာပိုင်တို့က အခင်းဖြစ်ရာအရပ်သို့ သွားရောက်စစ်ဆေးခဲ့ကြပြီး သတင်းစုံစမ်းလျက်ရှိကြောင်း ရဲတပ်ဖွဲ့ ပြောရေးဆိုခွင့်ရပုဂ္ဂိုလ် အလန်ကာ ဒရီနစ်ခ် (Alenka Drenik Rangus) က ပြောသည်။

“ရဲတပ်ဖွဲ့နဲ့ ခရိုင်ရှေ့နေတို့ကို ဒီခိုးမှုနဲ့ ပတ်သက်ပြီး သတင်းပေးလာကြတာ ဖြစ်ပါတယ်။ ”

ကြေးရုပ်တုကြီး ခိုးယူခံရမှုနှင့် ပတ်သက်သည့် အခြားသော အချက်အလက်များကိုမူ အာဏာပိုင်တို့က ထုတ်ဖော်ပြောကြားခြင်း မရှိသေးချေ။

ဆလိုဗေးနီးယား သတင်းမီဒီယာတို့၏ ဖော်ပြသော ဓာတ်ပုံများအရ ကြေးရုပ်တုကြီးမှာ လွှဖြင့် ဖြတ်တောက်ခိုးယူ ခံထားရပြီး ရုပ်တု၏ ခြေချင်းဝတ်နေရာသာ ကျန်ရစ်ခဲ့သည်ကို တွေ့ရသည်။

ရုပ်တုတည်ရှိသောနေရာမှာ ဆလိုဗေးနီးယားနိုင်ငံ၏ မြို့တော် လုဘ်ယားနား (Ljubljana ) ၏ အရှေ့ဘက် ၉၀ ကီလိုမီတာ (၅၆ မိုင်) အကွာတွင်ရှိသော သာယာလှပသည့် Sevnica မြို့လေးမှ မြစ်ကမ်းနံဘေးတွင် ဖြစ်သည်။

အဆိုပါနေရာတွင် မူလက မလာနီယာ ထရမ့်၏ သစ်သားရုပ်တု ရှိခဲ့ဖူးပြီး ၂၀၂၀ ပြည့်နှစ်၊ ဇူလိုင်လတွင် လက်သရမ်းသူတို့က မီးရှို့ဖျက်ဆီးခဲ့ကြသည်။

(▲ ၂၀၂၀ ပြည့်နှစ်၊ စက်တင်ဘာလအတွင်း ရိုက်ကူးထားသော ဓာတ်ပုံတွင် မူရင်းသစ်သားရုပ်တုကို တွေ့ရပုံ။ ဓာတ်ပုံ-Jure Makovec/ AFP/ Getty Images)

(▲ သစ်သားရုပ်တုကို အနုပညာရှင် Ales Maxi Zupevc က ပြုလုပ်ပေးခဲ့ခြင်းဖြစ်ပြီး ၂၀၁၉ ခုနှစ်၊ ဇူလိုင်လတွင် ယခုနေရာ၌ ထားရှိခဲ့သည်။ ဓာတ်ပုံ- Jure Makovec/ AFP/ Getty Images)

ရုပ်တုတွင် First Lady မလာနီယာ ထရမ့်သည် ကောင်းကင်ပြာရောင်ဝတ်စုံ ဝတ်ဆင်ထားပြီး ၂၀၁၇ ခုနှစ်အတွင်း ဒေါ်နယ်ထရမ့်၏ ပထမအကြိမ် သမ္မတသက်တမ်း ကျမ်းသစ္စာ ကျိန်ဆိုပွဲတွင် ဝတ်ဆင်ခဲ့သည့်ပုံကို သွန်းလုပ်ထားခြင်းဖြစ်ပြီး ဒေသခံတို့အကြား ရုပ်တုထားရှိမှုအပေါ် သဘောထားအမျိုးမျိုး ကွဲပြားနေသည်။

Sevnica သည် တိတ်ဆိတ်သောမြို့လေးဖြစ်ပြီး လူဦးရေ ၅၀၀၀ ခန့်သာ နေထိုင်သည်။

မလာနီယာထရမ့်ကြောင့် မြို့လေးမှာ များစွာအကျိုးရှိခဲ့ပြီး ကမ္ဘာလှည့်ခရီးသည်များစွာ ရောက်ရှိလာကြသည်။

Sevnica တွင် Melania Theme ထုတ်ကုန်များစွာကို အမှတ်တရပစ္စည်းအနေဖြင့် ထုတ်လုပ်ရောင်းချကြရာ ပျားရည်၊ ချောကလက်နှင့် ကိတ်မုန့်တို့ အပါအဝင် ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref:CNN STYLE (The wooden statue, made by conceptual artist Ales 'Maxi' Zupevc, was installed in July 2019.) Photo Credit- Jure Makovec/ AFP/ Getty Images