ဒုတိယကမ္ဘာစစ်ကြီးအတွင်း မြန်မာပြည်မှာ ဂျပန်တွေက ကိုယ့်ကျင်းကိုယ်တူးခိုင်းပြီး ကွပ်မျက်တာခံခဲ့ရတဲ့ အဂ်လိပ်ဗိုလ်မှူးအကြောင်း

ရော်ဘင်ဟုသည် အင်္ဂလန် ရာဇဝင်တွင် တောအုပ်ထဲတွင် နေထိုင်ရင်း ရန်သူကို အဆက်မပြတ် ဒုက္ခပေးခဲ့သူ၊ မိမိကိုယ်ကိုစတေးကာ မှန်သည့်ဘက်မှ ရပ်တည်သော သူရဲကောင်း ဖြစ်၏။

ဒုတိယကမ္ဘာစစ်ကြီးအတွင်းက ဗိုလ်မှူး ဟုချ် ပေါလ် ဆီးဂရင်းသည်လည်း ရော်ဘင်ဟုကဲ့သို့ တောအုပ်ထဲတွင် နေရင်း ရန်သူကို အဆက်မပြတ် ဒုက္ခပေးခဲ့သူဖြစ်သည်။ ၎င်းကျင်လည်သော အခြေချရာနေရာကား မြန်မာပြည်မှ တောကြီးမျက်မည်းထဲတွင် ဖြစ်သည်။

(ဗိုလ်မှူး ဟုချ် ဆီးဂရင်းကို ဒုတိယကမ္ဘာစစ်ကြီးမတိုင်မီက မင်္ဂလာပွဲတစ်ခုတွင် တွေ့ရပုံ။ ထိုစဉ်က အသက် ၂၇ နှစ်အရွယ်သာ ရှိသေးသည်။ ဆီးဂရင်းသည် မြန်မာပြည်တွင် တိုင်းရင်းသားမျိုးနွှယ်စုတစ်ခုကို ကိုယ်ပိုင်တပ်အသွင်ဖွဲ့စည်းကာ ဂျပန်တို့အား ၂ နှစ်ခန့် ဆန့်ကျင်အံတုခဲ့သည်)

လူသိနည်းသော ၎င်း၏အကြောင်းမှာ Lost Warriors အမည်ရှိ စာအုပ်တွင် ပေါ်ပေါက်လာခဲ့ခြင်း ဖြစ်သည်။

၎င်းစုစည်းထားသော ကရင်တပ်ဖွဲ့က ၎င်းကို “ခြေတံရှည်ဘိုးတော်” ဟုခေါ်ကြသည်။

ဆီးဂရင်းမှာ လွန်စွာအရပ်ရှည်သောကြောင့် ဖြစ်၏။

အရပ် ၆ ပေ ၄ လက်မရှိပြီး ခြေဆံလက်ဆံ ရှည်လျားသည်။ အင်္ဂလန်တွင် လူငယ်ဘဝက အပျော်တမ်း ဂိုးသမားအဖြစ် ကစားခဲ့ဖူးသည်။

မြန်မာပြည်တွင်မူ တောကြီးမျက်မည်းထဲမှ ခြံတံရှည် ဝါးတဲလေးတစ်ခုတွင် အခြေစိုက် လှုပ်ရှားနေသည်။

သူ၏ ပုံပန်းကို ပြောရလျှင် ဆံပင်ဖွာလန်ကြဲ၊ မုတ်ဆိတ်ရှည်တို့ဖြင့်ဖြစ်ပြီး နေလောင်သောကြောင့် ညိုမှောင်နေသော အသားအရေ၊ ကွမ်းစားသောကြောင့် နီရဲနေသော သွားတို့မှာ လူဖြူတစ်ဦးဟု ပြောလျှင် ယုံရန်ခက်ခက်ပင်။

သူ၏ ဗြိတိသျှစစ်ယူနီဖောင်းမှာမူ စုတ်ပြဲပျက်စီးသွားသည်မှာ ကြာခဲ့ပြီ။ သူဝတ်ဆင်ထားသည်မှာ ကရင်တိုင်းရင်းသားတို့၏ အဖြူအနီစပ် အင်္ကျီကို ဘောင်းဘီပွပွနှင့် တွဲဖက် ဝတ်ဆင်ထားသည်။

လက်တစ်ဖက်တွင် တော်မီဂန်း ကိုင်ထားပြီး အခြားတစ်ဖက်တွင် သမ္မာကျမ်းစာကို ကိုင်ထားကာ ခါးပတ်တွင်မူ ပစ္စတိုတစ်လက် ချိတ်ထားသည်။ ခြေတွင် ဖိနပ်မရှိ။ အဝတ်အပိုမရှိ။ ခြင်ထောင်မရှိ။ စောင်ဟောင်းတစ်ထည်မှလွဲပြီး မည်သည့်ပိုင်ဆိုင်မှုမှ မရှိ။

မြန်မာပြည်တွင် ဂျပန်တို့ရန်မှ ထွက်ပြေးနေရသော ဗြိတိသျှစစ်တပ်မှ တပ်ကြပ် ရွိုင် ပါဂါနီမှာ ဗိုလ်မှူး ဆီးဂရင်းနှင့် သူ၏ ကိုယ်ပိုင်တပ်အကြောင်း သတင်းကြားကာ တောကြီးမျက်မည်းထဲသို့ ဆီးဂရင်းနှင့် တွေ့ရန် သွားခဲ့သည်။ ဆီးဂရင်းကို စတင်တွေ့လိုက်ချိန်တွင် ဗိုလ်မှူး ဆီးဂရင်းမဟုတ်ဘဲ ဒေသခံ ကရင်လူမျိုးတစ်ဦးဖြစ်သည်ဟုသာ ထင်နေခဲ့သည်။

(မျက်လုံးတွင် အဝတ်စည်းထားသော အကျဉ်းသားများကို ဂျပန်စစ်သည်တို့က ကွပ်မျက်နေပုံ။ ဆီးဂရင်းသည် အိန္ဒိယစစ်တပ်တွင် စတင်တာဝန်ထမ်းဆောင်ခဲ့ပြီး ယင်းနောက်တွင် ဘားမားရိုင်ဖယ်တပ်သို့ စေလွှတ်ခံရသည်။ ဘားမားရိုင်ဖယ်တွင် ကရင်စစ်သည်တို့နှင့် ခင်မင်ရင်းနှီးခဲ့ကာ နောင်အခါတွင် ကရင်လူမျိုးများနှင့် တသားတည်း ဖြစ်သွားသည်)

တပ်ကြပ် ပါဂါနီသည် ရဲရင့်သော စစ်သည်တော်တစ်ဦးဖြစ်ပြီး သေဘေးမှ အကြိမ်ကြိမ်လွတ်မြောက်ခဲ့သူဖြစ်၏။

ကမ္ဘာကျော် Dunkirk စစ်သည်ရွှေ့ပြောင်းမှုကြီး (ထိုဖြစ်ရပ်ကို ရုပ်ရှင်ရိုက်ကူးခဲ့ရာ အော်စကာ ၈ ဆု ဇကာတင်စာရင်းဝင်ခဲ့ပြီး ၃ ဆုရရှိခဲ့သည်)၊ စင်္ကာပူခံတပ်နှင့် ထိုင်း-မြန်မာ သေမင်းတမန် ရထားလမ်း အလုပ်စခန်းတို့မှ မသေမပျောက် လွတ်မြောက်ခဲ့သူ ဖြစ်သည်။

သို့သော် ပါဂါနီက ဆီးဂရင်းကို လေးစားအပ်သော သူရဲကောင်းအဖြစ် ဦးညွှတ်သည်။

သို့စေကာမူ ဆီးဂရင်းသည် ထက်မြက်သော စစ်သည်တော်တစ်ဦး မဟုတ်ခဲ့ချေ။ဆင်းဟတ်စစ်တက္ကသိုလ်တွင် ၎င်းတက်ခဲ့သော အပတ်စဉ်က ၁၅၄ ဦး တက်ခဲ့ရာတွင် အဆင့် ၁၃၇ သာ ရှိခဲ့သည်။

ဂျပန်တို့ မြန်မာပြည်ကို ဝင်ရောက်လာချိန်တွင် ဆီးဂရင်းမှာ ကရင်ပြည်နယ်တွင် ရှိနေပြီး သူ၏ အကြံမှာ ကရင်လူမျိုးတို့ကို စုစည်းကာ ဂျပန်တို့ကို ခုခံတော်လှန်ရန် ဖြစ်သည်။

ဗြိတိသျှစစ်သည် ၃၀၀၀၀၀ သည် မြန်မာပြည်မှ အိန္ဒိယသို့ ကုန်းကြောင်းမှ ဆုတ်ခွာချိန်တွင် လမ်းခရီးတလျှောက် စစ်သည် ထောင်သောင်းချီ သေဆုံးခဲ့သည်။

ဗိုလ်မှူး ဆီးဂရင်းမှာမူ မြန်မာပြည်တွင် ကျန်နေခဲ့ကာ ရက်စက်ကြမ်းကြုတ်သော ဂျပန်တို့ကို ခုခံတော်လှန်မည့် စစ်သည်တော်တို့ လေ့ကျင့်စုဖွဲ့ပေးရန် ကြိုးစားခဲ့သည်။

သို့သော် မကြာမီတွင်ပင် သူ၏ တပ်ဖွဲ့မှာ ဂျပန်ထောက်ခံသည့် ဗမာ့လွတ်လပ်ရေးတပ်မတော် (BIA) က ရက်ရက်စက်စက် ချေမှုန်းလာမှုနှင့် ရင်ဆိုင်ရသည်။

ဗိုလ်မှူးဆီးဂရင်းနှင့် ရဲရင့်သော ကရင်စစ်သည်တို့ ကြံ့ကြံ့ခံ ခုခံသော်လည်း ၎င်းတို့ချည်းသက်သက် အင်အားဖြင့် မလုံလောက်နိုင်ချေ။

ဗိုလ်မှူးဆီးဂရင်းက အင်္ဂလန်ရှိ သူ၏ မိခင်ကြီးထံသို့ ရေးသားပေးပို့ခဲ့သည့် နောက်ဆုံးစာတွင် “ကျွန်တော်တို့ ဘယ်လောက် ရှင်သန်နိုင်ဦးမလဲဆိုတာကတော့ လက်နက်ခဲယမ်း ဘယ်လောက် သိမ်းဆည်းရရှိနိုင်မလဲ ဆိုတာအပေါ် မူတည်နေပါပြီ” ဟု ဖော်ပြထားသည်။

(ဂျပန်တို့ရန်မှ ထွက်ပြေးနေရသော တပ်ကြပ် ရွိုင် ပါဂါနီသည် ဗိုလ်မှူး ဆီးဂရင်းကို တွေ့မြင်လိုသောကြောင့် တောတောင်များရှိရာသို့ လာရောက်ခဲ့သည်။)

(ပါဂါနီက ဗိုလ်မှူးဆီးဂရင်းကို တွေ့လိုက်ချိန်တွင် ကရင်လူမျိုးတစ်ဦးဟု မှတ်ထင်ခဲ့သည်)

လက်နက်နှင့်ဆေးဝါး မလုံလောက်မှုကြောင့် ဗိုလ်မှူးဆီးဂရင်းနှင့် သူ၏အဖွဲ့မှာ ပိုမိုနက်ရှိုင်းသော တောနက်ထဲသို့ ရွှေ့ပြောင်းခဲ့ရသည်။

သူ၏ တပ်ဖွဲ့ဝင်များ တစထက်တစ နည်းလာနေပြီး ယာယီဝါးတဲတစ်လုံးမှ အခြားတစ်လုံးသို့ အမြဲရွှေ့ပြောင်းနေထိုင်ကာ ဂျပန်တို့နှင့် ဝေးရာသို့ ထွက်ပြေးနေရသည်။

ထိုသို့ ရုန်းကန်နေရသည့်အခြေအနေကြောင့် ဂျပန်တို့ကို ပျောက်ကြားတိုက်ခိုက်မှုများ မလုပ်နိုင်တော့ဘဲ ဂျပန်တပ်များ၏ သတင်းများရယူကာ စစ်ဌာနချုပ်သို့ ပေးပို့မှုများသာ လုပ်နိုင်တော့သည်။

ရိက္ခာလည်း ရှားပါးလာသောကြောင့် ကြွက်များကို ရှာဖွေစားသောက်လာရသည်။

မိုးကျလာချိန်တွင်ကား ငှက်ဖျားရောဂါဖြစ်စေသည့်ခြင်များ၊ မျှော့များနှင့် ရင်ဆိုင်ရသည်။

နေ့စဉ် ညဘက်သို့ရောက်လျှင် ဗိုလ်မှူး ဆီးဂရင်းနှင့် သူ၏ ရဲဘော်များက ပိန်းပိတ်အောင် သိပ်သည်းထူထပ် လှသော တောနက်ကြီးအလယ်တွင် Christian Soldiers သီချင်းကို ကရင်ဘာသာဖြင့် သီဆိုကြသည်။

အချို့ကဆိုလျှင် ဆီးဂရင်းကို ကယ်တင်ရှင် သူတော်စင်တစ်ပါးသဖွယ် ထင်မြင်လာကြသည်။

((ဗိုလ်မှူး ဆီးဂရင်း- Major Hugh Paul Seagrim ၏ အချက်အလက်များ))

မွေးနေ့- ၁၉၀၉ ခုနှစ်၊ မတ်လ ၂၄ ရက်

ကိုယ်ပိုင်အမှတ်- ၄၉၃၅၉

တပ်ရင်း- ဟိုက်ဒရာဘက် တပ်ရင်း ၁၉

ကျဆုံးသည့်နေ့- ၁၉၄၄ ခုနှစ်၊ စက်တင်ဘာ ၁၄ ရက် (အသက် ၃၅ နှစ်)

မြှုပ်နှံသည့်နေရာ- ရန်ကုန်စစ်သင်္ချိုင်း- အုတ်ဂူအမှတ် 4.A 13-20

ရရှိခဲ့သည့်ဆုတံဆိပ်များ- George Cross, Distinguished Service Order, Member of the Order of the British Empire

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: The forgotten story of 'Grandfather Longlegs': How a terribly English army hero sacrificed himself for his comrades and sang hymns as the Japanese made him dig his own grave (dailymail)