စင်္ကာပူရောက်နေသော ဘီလ်ဂိတ်က စားသောက်ဆိုင်တွင် ဒူးရင်းသီး အနံ့ခံနေစဉ် လူအများရောက်လာကာ ဝိုင်းဝန်းဓာတ်ပုံရိုက်၊ သက်တော်စောင့် စောင့်ကြပ်နေကာ လူအများဝိုင်းဝန်းဓာတ်ပုံရိုက်နေသော ဘီလ်ဂိတ်မှာ မည်သူဖြစ်သည်ကို မသိသော မိန်းကလေးတစ်ဦးက “ဒီအဘိုးကြီးက ဘယ်သူလဲ”ဟု လူမှုကွန်ရက်တွင် မေးမြန်း

ကမ္ဘာ့ပဉ္စမမြောက်အချမ်းသာဆုံးပုဂ္ဂိုလ် ဘီလ်ဂိတ်ကို မေလ ၆ ရက်က စင်္ကာပူရှိ စားသောက်တန်းမှ ဆိုင်တစ်ခုတွင် ဒူးရင်းသီးအား အနံ့ခံကြည့်နေပုံ တွေ့လိုက်ကြရသည်။

ဘီလ်ဂိတ်သည် Newton Food Centre မှ ဆိုင်တစ်ဆိုင်တွင် ဒူးရင်းသီးကို စားကြည့်ရန် ကြိုးစားနေပုံ တွေ့ခဲ့ကြခြင်း ဖြစ်သည်။

Xiaohongshu (RedNote) လူမှုကွန်ရက်တွင် တင်ခဲ့သော ဗွီဒီယိုဖိုင်တစ်ခုအရ ဘီလ်ဂိတ်သည် ဒူးရင်းသီးကို မ, ယူကာ နှာခေါင်းအနီးသို့ ကပ်ပြီး ခေတ္တအနံ့ခံကြည့်လိုက်ပြီးနောက် စားပွဲပေါ်တွင် ပြန်တင်လိုက်သည်။ ထို့နောက် အနည်းငယ် ကိုက်စားကြည့်လိုက်၏။

ဘီလ်ဂိတ်ကို အမှတ်မထင်တွေ့လိုက်ရသောကြောင့် အံ့အားသင့်သွားသူများ ဝိုင်းဝန်းလာကာ ဓာတ်ပုံများ၊ ဗွီဒီယိုများ ရိုက်ကူးကြသည်။

ဘီလ်ဂိတ်သည် ဒူးရင်းသီးအပြင် စင်္ကာပူတွင် နာမည်ကြီးသော ကြက်ဆီထမင်း၊ ဆာတေး၊ ငါးဆုပ် ဟင်းချို၊ မုန်လာဥကိတ်၊ ပလာတာ၊ သံပုရာရည်နှင့် ကြံရည်တို့ စားသောက်ခဲ့သည်။

ကမ္ဘာ့အချမ်းသာဆုံးပုဂ္ဂိုလ်အဖြစ် ၁၈ နှစ်ခန့် ရပ်တည်ခဲ့သူ ဘီလ်ဂိတ်ကို ကမ္ဘာပေါ်တွင် လူတိုင်းသိသည်ဟု ဆိုနိုင်သည်။

သို့သော် TikTok မှ content creator တစ်ဦးဖြစ်သူ Rebecca ကမူ ဘီလ်ဂိတ်ကို မသိချေ။

စားသောက်ဆိုင်တန်းတွင် ဘီလ်ဂိတ်ရောက်နေချိန်နှင့် ကြုံကြိုက်တွေ့မိခဲ့ခြင်း ဖြစ်ပြီး ဗွီဒီယိုရိုက်ထားကာ လူမှုကွန်ရက်တွင် တင်ခဲ့သည်။

Rebecca ၏ ဗွီဒီယိုတွင် တွေ့ရသည်မှာ အသက် ၆၉ နှစ်အရွယ် ဘီလျံနာကြီးကို ဓာတ်ပုံ၊ ဗွီဒီယိုရိုက်သူများနှင့် ဘေးတွင် ရပ်ကာ ဝိုင်းအုံကြည့်သူများရှိနေပြီး ဘီလ်ဂိတ်က ဒူးရင်းသီးအား မြည်းစမ်းကြည့်ခဲ့ပုံ တွေ့ရသည်။

Rebecca သည် သက်တော်စောင့်ပါလာသော သက်ကြီးပိုင်းအမျိုးသားကြီးတစ်ဦးကို လူအများ ဓာတ်ပုံ၊ ဗွီဒီယိုဝိုင်းအုံ ရိုက်နေသောကြောင့်သာ ရောယောင်ကာ ဗွီဒီယိုရိုက်ခဲ့ပြီး မည်သည့်ပုဂ္ဂိုလ်ဖြစ်သည်ကို အမှန်တကယ် မသိခဲ့ချေ။

“ဒီ လူကြီးက ဘယ်သူလဲ။ လူတွေအများကြီး သူ့ကို ဓာတ်ပုံလာရိုက်နေကြပါတယ်” ဟု Rebecca က caption ရေးသား မေးမြန်းခဲ့သည်။

“ဘီလ်ဂိတ် …ဘယ်သူလဲဆိုတာ ဘာကိုပြောတာလဲ” ဟု လူမှုကွန်ရက်သုံးစွဲသူတစ်ဦးက Rebecca ၏ ဗွီဒီယိုတွင် မှတ်ချက်ပေးသည်။

ဘီလ်ဂိတ်သည် အသက် ၃၂ နှစ်အရွယ် ၁၉၈၇ ခုနှစ်တွင် ဘီလျံနာဖြစ်လာခဲ့ပြီး ထိုခေတ်ထိုကာလက ကမ္ဘာ့အသက်အငယ်ဆုံး ကိုယ့်ထူးကိုယ်ချွန် ဘီလျံနာတစ်ဦး ဖြစ်ခဲ့သည်။

(ဒူးရင်းသီးကို ဘီလ်ဂိတ် ကြိုက်၊ မကြိုက် စင်္ကာပူသားတို့ သိလိုနေကြသည်။)

(ဘီလ်ဂိတ်၏ ဘေးတွင် ရပ်နေသူမှာ သူ၏ သက်တော်စောင့်ဖြစ်သည်။ ဓာတ်ပုံ-Rebecca/ TikTok)

ဘီလ်ဂိတ်သည် စင်္ကာပူသို့ ၂ ရက်တာ အလည်အပတ်ခရီးစဉ်ရောက်ရှိနေခြင်းဖြစ်ပြီး စင်္ကာပူဝန်ကြီးချုပ် လောရင့်စ်ဝေါင် အပါအဝင် စင်္ကာပူမှ အကြီးအကဲများနှင့် တွေ့ဆုံခဲ့သည်။

ဘီလ်ဂိတ်သည် မေလ ၅ ရက်မှ ၇ ရက်အထိ ကျင်းပခဲ့သော ၂၀၂၅ ခုနှစ် Philanthropy Asia Summit သို့လည်း တက်ရောက်ခဲ့သည်။

သတင်းများအရ ကမ္ဘာ့အကြီးမားဆုံး ပရဟိတအဖွဲ့ကြီးများတွင် တစ်ခုအပါအဝင်ဖြစ်သော Bill & Melinda Gates Foundation သည် စင်္ကာပူတွင် ရုံးခွဲဖွင့်ရန် စီစဉ်နေသည်ဟု ဆိုသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Bill Gates Tries Durian In S’pore Hawker Centre; “Who’s This Old Man?” Asks Netizen