တရုတ်ပြည်မှာ စိတ်ဖိစီးမှု လျှော့ချဖို့နဲ့ ညဘက်အိပ်ပျော်စေဖို့အတွက် လူကြီးတွေ ချိုလိမ်စို့တာ ခေတ်စားနေ

တရုတ်ပြည်တွင် အရွယ်ရောက်ပြီးသူတို့သည် စိတ်ဖိစီးမှု လျှော့ချရန်နှင့် နှစ်ခြိုက်စွာ အိပ်ပျော်စေရန်အတွက် ချိုလိမ်စို့ခြင်းများ ခေတ်စားလာနေရာ ဆရာဝန်တို့က ကျန်းမာရေးအတွက် ဘေးထွက်ဆိုးကျိုးများရှိကြောင်း သတိပေးလာကြသည်။

အချို့သော အွန်လိုင်းအရောင်းဆိုင်တို့၏ ပြောကြားချက်အရ တစ်လလျှင် ချိုလိမ် ၂၀၀၀ ကျော် ရောင်းနေရသည်ဟု ဆိုသည်။

လူကြီးစို့သည့် ချိုလိမ်မှာ ကလေးချိုလိမ်ထက် ပိုမိုကြီးမားပြီး ဈေးနှုန်းမှာ ၁၀ ယွမ်မှ ယွမ် ၅၀၀ ကြား (၁ ဒသမ ၄ ဒေါ်လာမှ ဒေါ်လာ ၇၀ ကြား) အစားစားရှိကြောင်း The Cover သတင်းဌာနက ဖော်ပြသည်။

(လူကြီးများ ချိုလိမ်စို့ခြင်းမှာ စိတ်ဖိစီးမှု လျော့ပါးစေပြီး နှစ်ခြိုက်စွာ အိပ်ပျော်စေကြောင်း အွန်လိုင်း အရောင်းဆိုင်တို့က ပြောသည်။ ဓာတ်ပုံ-Handout)

အချို့က ပြောသည်မှာ လူကြီးများ ချိုလိမ်စို့ခြင်းသည် ဆေးလိပ်ဖြတ်ရာတွင် အထောက်အကူဖြစ်ပြီး အသက်ကောင်းစွာရှူနိုင်ရေးအတွက်လည်း အကျိုးရှိကြောင်း ပြောကြသည်။

ချိုလိမ်နို့သီးခေါင်းမှာ အကြည်သားဖြစ်ပြီး အရောင်မျိုးစုံလာသည်။

“အရည်အသွေး တော်တော်ကောင်းပါတယ်။ ချိုလိမ်စို့ရတာ နူးညံ့ပြီး သက်သောင့်သက်သာရှိပါတယ်။” ဟု ချိုလိမ်ဝယ်သူတစ်ဦးက ပြောသည်။

“ချိုလိမ်စို့တာဟာ ဆေးလိပ်ဖြတ်တာမှာ တော်တော်အထောက်အကူဖြစ်တာ အံ့သြစရာ တွေ့ရပါတယ်။ ဆေးလိပ်မသောက်ဘဲနေတဲ့ ကာလတွေမှာ စိတ်သက်သာရာ ရစေပါတယ်” ဟု ချိုလိမ်သုံးသူ အခြားတစ်ဦးက ပြောပြသည်။

(ချိုလိမ်စို့ခြင်းသည် ဆေးလိပ်ဖြတ်သူများအတွက် အထောက်အကူဖြစ်ကြောင်း ရောင်းချသူအချို့က ပြောသည်။ ဓာတ်ပုံ-Handout)

“အလုပ်မှာ ဖိအားတွေရှိနေပြီဆိုရင် ချိုလိမ်စို့ဖြစ်ပါတယ်။ ကလေးဘဝက လုံခြုံမှုမျိုး ပြန်ပြီး ခံစားရတယ်” ဟုလည်း အသုံးပြုသူတစ်ဦးက ပြောသည်။

ဆရာဝန်တို့ကမူ ကျန်းမာရေးအတွက် အခြားသော ဘေးထွက်ဆိုးကျိုးများရှိကြောင်း သတိပေးသည်။

“ဒါက အသုံးပြုသူတွေရဲ့ ပါးစပ်ကို ထိခိုက်စေနိုင်ပါတယ်” ဟု စီချွမ်ပြည်နယ်၊ ချန်ဒူးမြို့မှ သွားဆရာဝန် Tang Caomin က ပြောသည်။

“ချိုလိမ်ကို တစ်ရက် ၃ နာရီထက် ပိုစို့မယ်ဆိုရင် တစ်နှစ်ကြာတဲ့အခါ သွားအနေအထားတွေ ပြောင်းသွားနိုင်ပါတယ်” ဟု ဒေါက်တာ Tang က ပြောသည်။

(လူကြီးများအတွက် ထုတ်လုပ်ပေးထားသော ချိုလိမ်တို့မှာ ကလေးများသုံးသည့် ချိုလိမ်ထက် များစွာကြီးမားသည်။ ဓာတ်ပုံ-Shutterstock)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Adult pacifiers trending in China for stress relief and sleep; doctors warn of health risks