အမေရိကန်ဒုသမ္မတ ဂျေဒီဗန့်စ်၏ ဝါရှင်တန်ဒီစီ စံအိမ်ကို ထရမ့်အစိုးရအဖွဲ့တွင် တာဝန်ထမ်းဆောင်ဖူးသော အရာရှိဟောင်းတစ်ဦးက ဝယ်ယူလိုက်ကြောင်း သတင်းများထွက်လာ

အမေရိကန်သမ္မတ ဒေါ်နယ်ထရမ့် အစိုးရအဖွဲ့တွင် တာဝန်ထမ်းဆောင်ခဲ့ဖူးသော သြဇာတိက္ကမရှိသည့် အရာရှိဟောင်းတစ်ဦးသည် အမေရိကန် ဒုတိယသမ္မတ ဂျေဒီဗန့်စ်၏ စံအိမ်ကို ဝယ်ယူလိုက်ကြောင်း သတင်းများထွက်လာသည်။

ဝယ်ယူလိုက်သည့် အရာရှိဟောင်း၏ အမည်မှာ ခရစ္စတိုဖာ ဂါစီယာဖြစ်ပြီး ဒေါ်နယ်ထရမ့်၏ ပထမ သမ္မတသက်တမ်းကာလအတွင်း ကူးသန်းရောင်းဝယ်ရေးဝန်ကြီးဌာန၌ ခေတ္တ တာဝန်ထမ်းဆောင်ခဲ့ဖူးသည်။

(Christopher Garcia)

ဂါစီယာသည် အမေရိကန်ပြည်၊ ဗာဂျီးနီးယားပြည်နယ်၊ အလက်ဇန္ဒြီးယားမြို့ရှိ နေအိမ်ကို LLC တစ်ခုမှတဆင့် ဝယ်ယူလိုက်ခြင်းဖြစ်ကြောင်း Forbes မဂ္ဂဇင်းကြီးက ဖော်ပြသည်။

နယူးယောက်ပို့စ် သတင်းဌာနက ကြည့်ရှုခွင့်ရခဲ့သော အိမ်ခြံမြေမှတ်တမ်းများအရ ခေါ်ဈေးထက် ဒေါ်လာ ၁၇၂၀၀၀ ပိုမိုမြင့်မားသော ဈေးနှုန်းဖြင့် အရောင်းအဝယ်ဖြစ်ခဲ့ခြင်းဖြစ်ကာ ကန်ဒေါ်လာ ၁ ဒသမ ၈၇ သန်းဖြင့် ရောင်းထွက်သွားခြင်း ဖြစ်သည်။

စံအိမ်မှာ ၁၉၂၅ ခုနှစ်တွင် ဆောက်လုပ်ခဲ့ခြင်းဖြစ်ပြီး အကျယ်အဝန်း ၂၅၃၀ စတုရန်းပေရှိကာ အိပ်ခန်း ၅ ခန်းပါဝင်သော ယာတောအိမ်ဖြစ်သည်။

အပြင်ဘက်ကို အပြာရောင်ဆေးသုတ်ထားသည်။

ဂျေဒီဗန့်စ်သည် ထရမ့်အစိုးရအဖွဲ့တွင် ဒုသမ္မတဖြစ်လာကာ US Naval Observatory ဝန်းရှိ ဒုသမ္မတ အိမ်တော်သို့ ပြောင်းရွှေ့ခဲ့ပြီးနောက်ပိုင်း ယခုအိမ်ကို ကန်ဒေါ်လာ ၁ ဒသမ ၆၉ သန်း ဈေးခေါ်ကာ အရောင်းဈေးကွက်တင်ခဲ့ခြင်း ဖြစ်သည်။

နေအိမ်အတွင်း ထင်းသုံးမီးလင်းဖိုပါသော မိသားစုနားနေခန်း၊ စားသောက်ဖွယ်ရာများ ထားရှိသည့်အခန်းပါသော မီးဖိုဆောင်တို့ ပါရှိသည်။

ထရမ့်၏ ပထမရာထူးသက်တမ်းတွင် ဂါစီယာ တာဝန်ထမ်းဆောင်ခဲ့သည့်ကာလမှာ တိုတောင်းသည်။

၂၀၁၇ ခုနှစ်အတွင်း Minority Business Development Agency ၏ ခေတ္တညွှန်ကြားရေးမှူးအဖြစ် ခန့်အပ်ခံခဲ့ရသည်။

ယင်းနောက် ကူးသန်းရောင်းဝယ်ရေးဝန်ကြီး Wilbur Ross ၏ လက်အောက်တွင် ခေတ္တ လက်ထောက် ညွှန်ကြားရေးမှူးအဖြစ် ၂၀၁၈ ခုနှစ်အထိ တာဝန်ထမ်းဆောင်ခဲ့သည်။

သို့သော် နောက်ကြောင်းရာဇဝင် စစ်ဆေးရာတွင် အငြင်းပွားမှုများ ပေါ်ပေါက်ပြီးနောက် ဂါစီယာ အပါအဝင် ၄ ဦးမှာ ရာထူးမှ ထုတ်ပယ်ခံခဲ့ရကြောင်း ဝါရှင်တန်ပို့စ် သတင်းစာကြီးက ဖော်ပြသည်။

(ဒုသမ္မတ ဂျေဒီဗန့်စ်နှင့် ဇနီးဖြစ်သူ Usha တို့သည် ယခုအိမ်ကို ဖေဖော်ဝါရီလအတွင်း ကန်ဒေါ်လာ ၁ ဒသမ ၆၉ သန်းဈေးခေါ်ကာ စတင်ဈေးကွက်တင်ခဲ့ခြင်း ဖြစ်သည်။ ဓာတ်ပုံ-Corbis via Getty Images)

ဂါစီယာသည် အစိုးရအလုပ်မှ ထွက်လာခဲ့ပြီးနောက် ကိုဗစ်ကာလအတွင်း Health Supply US ကို ဖခင်ဖြစ်သူနှင့်အတူ ပူးတွဲတည်ထောင်ခဲ့သည်။

အဆိုပါ ကုမ္ပဏီမှ ပြည်ထောင်စုအစိုးရအဖွဲ့အစည်းများထံမှ ကန်ဒေါ်လာ ၁၇၉ သန်းဖိုးရှိ ကန်ထရိုက်များ ရခဲ့ပြီး အဓိကအားဖြင့် COVID-19 ကုစားရေးအကြောင်းရပ်များအတွက် ဖြစ်သည်။

ဂါစီယာတို့ ဇနီးမောင်နှံသည် ဝါရှင်တန်ဒီစီတွင်လည်း ကန်ဒေါ်လာ ၁ ဒသမ ၆၄ သန်းတန် နေအိမ်တစ်လုံး ပိုင်ဆိုင်ထားသေးသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Ex-Trump official outed as the new owner of Vice President JD Vance’s DC-area home

Photo Credit- Corbis via Getty Images, MediaPunch/ BACKGRID