ပြည်ပ အိမ်ခြံမြေ သတင်း | Posted by စည်သူအောင်
တရုတ်ပြည်တွင် လူငယ်တို့သည် ကျောင်းစာလေ့လာရန်အတွက် Disneyland တွင် တစ်နှစ်စာ Membership လက်မှတ်ဝယ်ယူကာ ကစားကွင်းထဲတွင် ကျောင်းစာလေ့လာမှု အလွန်ခေတ်စားလာနေသည်။
အခက်အခဲဆုံးအရာကို ပျော်စရာ အကောင်းဆုံးနေရာတွင် လုပ်ဆောင်ရမည်ဟူသော ဆောင်ပုဒ်ကို လက်ကိုင်ထားကာ ယခုကဲ့သို့ လုပ်ဆောင်လာခြင်း ဖြစ်သည်။
ပြီးခဲ့သောနှစ် မတ်လကတည်းက စတင်ခေတ်စားလာနေခြင်း ဖြစ်သည်။
တရုတ်လူငယ်များစွာက ရှန်ဟိုင်းနှင့် ဟောင်ကောင်တို့ရှိ Disneyland ကစားကွင်းများတွင် ကျောင်းစာလေ့လာကြပုံများကို လူမှုကွန်ရက်တွင် မျှဝေရာမှ ပျံ့နှံ့ခေတ်စားလာခြင်း ဖြစ်သည်။
ဟောင်ကောင်မှ တက္ကသိုလ်ကျောင်းသူတစ်ဦးက ကျောင်းစာလေ့လာရန် ကစားကွင်းကို ရွေးချယ်ရသည့် အကြောင်းရင်းအား Haibao News သတင်းဌာနသို့ ပြောပြသည်။
ကစားကွင်းထဲတွင် ပျံ့လွင့်နေသော ဂီတသံတို့ကြောင့် ကျောင်းစာ၏ ဖိအားများကို လျော့ကျစေကြောင်း ၎င်းက ပြောသည်။
၎င်းက Disneyland တစ်နှစ်တာဝင်ခွင့် Platinum လက်မှတ်ကို ဝယ်ယူခဲ့ရာတွင် ဟောင်ကောင်ဒေါ်လာ ၄၉၉၈ (ကန်ဒေါ်လာ ၆၄၀ ပေးခဲ့ရသည်။)
ပိုမိုဈေးသက်သာသော တစ်နှစ်တာဝင်ခွင့် လက်မှတ်မှာ ဟောင်ကောင် Disneyland တွင် ဟောင်ကောင် ဒေါ်လာ ၁၅၆၈ (ကန်ဒေါ်လာ ၂၀၀)၊ ရှန်ဟိုင်းတွင် ယွမ် ၁၃၉၉ ဖြစ်ပြီး ရုံးရက်များတွင် ဝင်ခွင့်ရှိသည်။
(လူငယ်များသည် ရှန်ဟိုင်းနှင့် ဟောင်ကောင် Disneyland တို့၌ ကျောင်းစာလေ့လာကြပုံကို လူမှုကွန်ရက်၌ မျှဝေကြသည်။ ဓာတ်ပုံ-RedNote)
Disneyland တွင် တစ်နေ့တာ ဝင်ခွင့်လက်မှတ်မှာ ယွမ်ငွေ ရာနှင့်ချီ၍ ပေးရမည်ဖြစ်ရာ ကစားကွင်းတွင် ပုံမှန်သွား၍ ကျောင်းစာလေ့လာရန် စီစဉ်ထားပါက တစ်နှစ်တာဝင်ခွင့်လက်မှတ်မှာ ပို၍ တန်ကြောင်း လူငယ်တို့က ပြောသည်။
ပေကျင်းမြို့ရှိ လူငယ်များကမူ ကျောင်းစာလေ့လာရန်နေရာအဖြစ် Universal Studio ကို ရွေးချယ်ကြသည်။
အဆိုပါ ကစားကွင်း ပန်းဥယျာဉ်များသည် မြို့စွန် ဆင်ခြေဖုံးတွင် တည်ရှိကြရာ ကျောင်းသားများအနေဖြင့် ကျောင်းစာလေ့လာမည့်နေရာသို့ ရောက်ရန် တစ်နာရီ (သို့မဟုတ်) ၂ နာရီခရီး သွားလာကြရမည် ဖြစ်သည်။
သို့သော် ကစားကွင်းများကပေးစွမ်းသည့် စိတ်ခံစားမှုတန်ဖိုးကြောင့် အချိန်ကြာရှည်သွားလာရခြင်းမှာ တန်သည်ဟု လူငယ်များက ယူဆကြသည်။
ရှန်ဟိုင်းမြို့မှ ဘွဲ့လွန်ကျောင်းသူတစ်ဦးက Disneyland မှ အကောင်းဆုံးစွဲဆောင်မှုတစ်ခုကို ထောက်ပြသည်မှာ ညစဉ်မီးရှုးမီးပန်းများ တွေ့ရခြင်းဖြစ်ကြောင်း ပြောသည်။
မိမိ၏ပညာရေးခရီးမှာ မည်သို့ရလဒ်ရှိလာမည်နှင့်စပ်လျဉ်းပြီး မရေရာမှုများရှိနေရာ အဆိုပါ မီးရှူးမီးပန်းတို့မှာ မိမိအား မျှော်လင့်ချက်များ မွေးဖွားပေးကြောင်း ၎င်းက ပြောသည်။
“ကျွန်မတို့အားလုံးမှာ တောက်ပတဲ့ အနာဂတ်ရှိကြပါတယ်”
အခြားတက္ကသိုလ်ကျောင်းသားတစ်ဦးကလည်း Daily People သတင်းဌာနသို့ ပြောသည်မှာ Disneyland သည် မိမိ၏ စာလေ့လာသည့်အခန်းနှင့် အားကစားလေ့ကျင့်ခန်းမတစ်ခုသဖွယ် ဖြစ်လာကြောင်း ပြောသည်။
ကစားကွင်းကဲ့သို့ ဝန်းကျင်မျိုးတွင် စူးနစ်အာရုံစိုက်ရသည့်စာများ လေ့လာရန် ထိရောက်မှုရှိမည်မဟုတ်ကြောင်း ကျောင်းသားလူငယ်တို့က သိရှိကြသည်။
ကစားကွင်းတွင် ၎င်းတို့အဓိကလေ့လာသည်မှာ ရိုးစင်းလွယ်ကူသောစာများ၊ လေ့လာပြီးသားကို ပြန်လည်လေ့လာခြင်းမျိုးနှင့် အင်္ဂလိပ်ဝေါဟာရများ လေ့လာခြင်းကဲ့သို့အရာမျိုးသာ ပြုလုပ်ကြသည်။
(လူစုလူဝေးနည်းပါးသော ညစာစားခန်းများနှင့် နားနေခန်းများကဲ့သို့ နေရာမျိုးတွင် ကျောင်းစာလေ့လာရန် အချို့က အကြံပြုသည်။ ဓာတ်ပုံ- JOHANNES EISELE/AFP)
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: China youth buy annual passes to study at Disneyland, allowing for breaks, fun rides to relax Photo Credit- JOHANNES EISELE/AFP, RedNote
