နတ်သမီးများ ပြန်ခေါ်မှ ရုပ်ရှင်နယ်သို့ ပြန်လာမည်ဟု ကြုံးဝါးခဲ့သော်လည်း ငွေလိုနေသဖြင့် ရုပ်ရှင်နယ်သို့ ခြေပြန်ချလာသူ ဂျင်မ်ကာရေးက နှစ်ပေါင်း ၃၀ ပိုင်ဆိုင်ခဲ့သော လော့စ်အိန်ဂျလိစံအိမ်ကို အကြိမ်ကြိမ် ဈေးလျှော့ရောင်းချရာ ဝယ်လက်ရှာတွေ့

ဟောလိဝုဒ်ကြယ်ပွင့် ဂျင်မ်ကာရေးသည် ၂၀၂၂ ခုနှစ်အတွင်း Sonic 2 ကို ရုံတင်ချိန်က ရုပ်ရှင်လောကမှ အနားယူပြီဖြစ်ကြောင်း တရားဝင်ကြေညာခဲ့သည်။

ထိုအချိန်ကမူ ရွှေမင်ဖြင့် ရေးသားထားသောဇာတ်ညွှန်းကို နတ်သမီးတို့က ယူလာပေးပြီး ဤဇာတ်ကားကို လူသားတို့ မဖြစ်မနေကြည့်ရှုသင့်သည်ဟု ပြောဆိုမှသာလျှင် ရုပ်ရှင်လောကသို့ ပြန်လာမည်ဟု ကြုံးဝါးပြောဆိုခဲ့သည်။

ကြုံးဝါးပြောဆိုခဲ့ပြီး ၂ နှစ်အကြာ ပြီးခဲ့သော ဒီဇင်ဘာ ၁၂ ရက်ကမူ ငွေလိုနေသည်ဟုဆိုကာ ရုပ်ရှင်လောကသို့ ပြန်ဝင်လာသည်။

ထိုသို့ပြောဆိုအပြီး ၁ နှစ်အကြာ ၂၀၂၃ ခုနှစ်အတွင်း နှစ်ပေါင်း ၃၀ နေထိုင်နေသောစံအိမ်ကို ရောင်းချရန် စီစဉ်ခဲ့ရသည်။

အိမ်ရောင်းထွက်လိုသောကြောင့် အကြိမ်ကြိမ် ဈေးလျှော့ပေးခဲ့သော်လည်း ရောင်းမထွက်ခဲ့ဘဲ ၅ ကြိမ်တိုင် ဈေးလျှော့ပေးခဲ့ပြီးနောက်မှ ဝယ်လက်ရှာတွေ့သွားခြင်း ဖြစ်သည်။

ဂျင်မ်ကာရေးသည် လော့စ်အိန်ဂျလိစံအိမ်ကို မူလခေါ်ဈေးအောက် ဒေါ်လာ ၁၀ သန်းအထိ ၅ ကြိမ်တိုင် ဈေးလျှော့ပေးခဲ့ပြီးမှ ဝယ်လက်ပေါ်ပေါက်လာခြင်း ဖြစ်သည်။

လော့စ်အိန်ဂျလိမြို့၊ Brentwood အရပ်တွင် တည်ရှိပြီး စတုရန်းပေ ၁၀၉၅၄ ကျယ်ဝန်းသောစံအိမ်မှာ ယခု ရက်သတ္တပတ်အတွင်း အရောင်းအဝယ်ဖြစ်သွားသည်။

၂၀၂၃ ခုနှစ်အစောပိုင်းတွင် ပထမဆုံး အရောင်းဈေးကွက်တင်ခဲ့ချိန်က ခေါ်ဈေးမှာ ကန်ဒေါ်လာ ၂၈ ဒသမ ၉ သန်းဖြစ်သည်။

၅ ကြိမ်တိုင်ဈေးလျှော့ပေးခဲ့သည့် နောက်ဆုံးခေါ်ဈေးမှာ ကန်ဒေါ်လာ ၁၉ ဒသမ ၇၅ သန်း ဖြစ်သည်။

အိပ်ခန်း ၅ ခန်းပါဝင်သော ယခုစံအိမ်ကို ဂျင်မ်ကာရေးက ၁၉၉၄ ခုနှစ်တွင် ဝယ်ယူခဲ့သည်။

ထိုနှစ်အတွင်းတွင်ပင် ဂျင်မ်ကာရေး၏ ဟောလိဝုဒ်၏ ပေါက်ကားများဖြစ်သော Ace Ventura: Pet Detective, Dumb and Dumber နှင့် The Mask ရုပ်ရှင်ဇာတ်ကားများတွင် ပါဝင်သရုပ်ဆောင်ခဲ့သည်။

ခြံဝန်းအကျယ် ၂ ဧကရှိပြီး ဧည့်ဂေဟာအိမ်၊ အာ့ထ်ဒက်ကို ဗိသုကာဟန် theater ၊ ပြင်သစ်တံခါးများ ဝန်းပတ်ထားသော စက်ဝိုင်းပုံ နေစာလှုံခန်းနှင့် treetop yoga လေ့ကျင့်ရာနေရာတို့ ပါဝင်သည်။

၁၉၅၁ ခုနှစ်တွင် ဆောက်လုပ်ခဲ့ခြင်းဖြစ်ပြီး ယာတောအိမ်အသွင် စံအိမ်ဖြစ်ကာ ထုတ်တန်းဖော် မျက်နှာကြက်များ၊ မီးလင်းဖို ၆ ခု၊ အုတ်ခဲဖော် အုတ်နံရံများနှင့် သစ်မာသား ကြမ်းခင်းတို့ ရှိသည်။

စံအိမ်နောက်ဘက်တွင် ကျယ်ဝန်းသော နားနေ နေရာမှ အုတ်လှေကားတို့က ရေကူးကန်ဆီသို့ ဦးတည်သွားပြီး ရေကူးကန်တွင် ရေတံခွန်တွဲဖက် ပါဝင်သည်။

လူသွားလမ်းလေးများမှာ ပန်းဥယျာဉ်များနှင့် သစ်ပင်ပန်းမန်များ စိမ်းစိုသော နေရာများဆီသို့ ခေါ်ဆောင်သွားပြီး တင်းနစ်ကွင်းတစ်ခုလည်းရှိသည်။

အရောင်းဈေးကွက်တင်ပေးသည်မှာ Sotheby’s International Realty အိမ်ခြံမြေကုမ္ပဏီမှ အကျိုးဆောင်များဖြစ်သော Janelle Friedman နှင့် Graham J.Larson တို့ ဖြစ်သည်။

ဂျင်မ်ကာရေး၏ စံအိမ်သည် အရောင်းဈေးကွက်တွင် တစ်နှစ်ကျော် ရှိနေခဲ့ပြီးနောက် ယခုနှစ် သြဂုတ်လတွင် ဈေးကွက်မှ ပြန်ရုတ်ခဲ့သည်။

ထိုအချိန်က ကန်ဒေါ်လာ ၂၁ ဒသမ ၅ သန်း ဈေးခေါ်ခဲ့ခြင်း ဖြစ်သည်။

ယင်းနောက် စက်တင်ဘာလတွင် ကန်ဒေါ်လာ ၁၉ ဒသမ ၇၅ သန်း ဈေးခေါ်ကာ အရောင်းဈေးကွက်ပြန်တင်ခဲ့သည်။

(ခြံဝန်းအကျယ် ၂ ဧကရှိပြီး စံအိမ်တွင် အိပ်ခန်း ၅ ခန်းပါသည်။ ဓာတ်ပုံ-Google Maps)

(ဆက်စပ်သတင်းများ) The Mask ရုပ်ရှင်ကားဖြင့် ကမ္ဘာကျော်ခဲ့သူ ဂျင်မ်ကာရေးက လော့စ်အိန်ဂျလိစံအိမ် ရောင်းမထွက်သေး သောကြောင့် ပဉ္စမအကြိမ် ဈေးလျှော့ပေးလာ၊ မူလခေါ်ဈေးအောက် ကန်ဒေါ်လာ ၉ သန်းအထိ ဈေးလျှော့ပေး

https://www.imyanmarhouse.com/news/read/1124936

ဂျင်မ်ကာရေးက လော့စ်အိန်ဂျလိစံအိမ်ကို အဆက်မပြတ် ဈေးလျှော့ပေးနေသော်လည်း ရောင်းမထွက် သောကြောင့် တတိယအကြိမ် ဈေးလျှော့ပေးလာပြန်

https://www.imyanmarhouse.com/news/read/1112311

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Jim Carrey Finds a Buyer for the L.A. Home He’s Owned for 30 Years (mansionglobal) Photo Credit-Google Maps