စင်္ကာပူတွင် လာမည့် သြဂုတ်လ၌ ဝင်ငွေနည်းပါးသော အသက် ၂၁ နှစ်အထက် အရွယ်ရောက်ပြီးသူများကို ဒေါ်လာ ၈၅၀ ထောက်ပံ့ရန်စီစဉ်

စင်္ကာပူတွင် အရွယ်ရောက်ပြီးသူပေါင်း ၁ ဒသမ ၅ သန်းကျော်မှာ GST Voucher scheme ဖြင့် ဒေါ်လာ ၈၅၀ ထောက်ပံ့ငွေ ရရှိမည်ဖြစ်ပြီး သက်ကြီးရွယ်အို ၆၉၀,၀၀၀ ခန့်မှာ ဆေးဖိုးဝါးခ ထောက်ပံ့ငွေ (MediSave) ဒေါ်လာ ၄၅၀ ရရှိမည်ဖြစ်ကြောင်း စထရိတ်တိုင်းမ် သတင်းစာက ဖော်ပြသည်။

၂၀၂၅ ခုနှစ်တွင် အသက် ၂၁ နှင့်အထက် ရှိသူများမှာ ဒေါ်လာ ၈၅၀ ထောက်ပံ့ကြေး ရရှိမည် ဖြစ်သည်။

သို့သော် တစ်နှစ်တာဝင်ငွေ ဒေါ်လာ ၃၉,၀၀၀ သာရှိပြီး အိမ် ၁ လုံးသာ ပိုင်ဆိုင်ထားသူဖြစ်ရမည် ဖြစ်သည်။ ထို့အပြင် အဆိုပါအိမ်မှာ အငှားချထားမည်ဆိုပါက တစ်နှစ်တာဝင်ငွေ ဒေါ်လာ ၂၁,၀၀၀ ခန့်သာရသော အိမ်မျိုးဖြစ်ရမည် ဖြစ်သည်။

သတ်မှတ်ထားသော အသက်အရွယ်နှင့် ဝင်ငွေတို့ ကိုက်ညီသော်လည်း အိမ်အငှားချမှု တစ်နှစ်တာဝင်ငွေ တွက်ချက်မှုတွင် ဒေါ်လာ ၂၁,၀၀၀ အထက်ဖြစ်နေပြီး ဒေါ်လာ ၃၁,၀၀၀ ထက် မပိုသော အိမ်မျိုးဖြစ်ပါက ထောက်ပံ့ကြေး ဒေါ်လာ ၄၅၀ ရမည် ဖြစ်သည်။

အိမ် ၁ လုံးထက် ပိုမိုပိုင်ဆိုင်ထားသူများမှာမူ ထောက်ပံ့ငွေ ရရှိမည် မဟုတ်ချေ။

သတ်မှတ်ချက်များနှင့် အကျုံးဝင်သူများသည် ၎င်းတို့၏ မှတ်ပုံတင်နံပါတ်ကို ဘဏ်အကောင့်မှတဆင့် PayNow app နှင့် ချိတ်ဆက်ထားသည်ဆိုပါက PayNow အကောင့်သို့ သြဂုတ်လ ၆ ရက်တွင် ငွေလွှဲပေးပို့မည် ဖြစ်ကြောင်း စင်္ကာပူ ဘဏ္ဍာရေးဝန်ကြီးဌာန (MOF) က ဇူလိုင်လ ၇ ရက်တွင် ထုတ်ပြန်သော press release တွင် ဖော်ပြထားသည်။

Giro app ဖြင့် ချိတ်ဆက်ထားသူများမှာမူ သြဂုတ်လ ၁၅ ရက်တွင် ငွေလွှဲလက်ခံရရှိမည်ဖြစ်ကာ GovCash app ဖြင့် ချိတ်ဆက်သူများမှာ သြဂုတ်လ ၂၂ ရက်တွင် လက်ခံရရှိမည် ဖြစ်သည်။

အကောင့်များသို့ ငွေလွှဲပေးပို့ပြီးပါက ဖုန်းမက်ဆေ့ဖြင့်လည်း အသိပေးအကြောင်းကြားမည်ဟု ဆိုသည်။

စင်္ကာပူ ဖုန်းနံပါတ်မရှိသူများကိုမူ ၎င်းတို့၏ မှတ်ပုံတင်တွင် ဖော်ပြထားသော လိပ်စာသို့ အကြောင်းကြားစာ ပေးပို့မည် ဖြစ်သည်။

စင်္ကာပူအစိုးရသည် GST Voucher scheme ကို ၂၀၁၂ ခုနှစ်တွင် စတင်ခဲ့ခြင်းဖြစ်ပြီး ဝင်ငွေနည်းပါးသူများ၊ အလယ်လတ်တန်း ဝင်ငွေရှိသူများအား ထောက်ပံ့ကူညီသည့် အစီအစဉ် ဖြစ်သည်။ စင်္ကာပူနိုင်ငံသားများ ဝင်ငွေကောင်းလာနေသောကြောင့် ယခင်က တစ်နှစ်တာဝင်ငွေ ဒေါ်လာ ၃၄၀၀၀ ရှိသူများကို ထောက်ပံ့ခဲ့ရာမှ ယခုနှစ်တွင် ဒေါ်လာ ၃၉၀၀၀ သို့ တိုးမြှင့်သတ်မှတ်ထားကြောင်း ဘဏ္ဍာရေးဝန်ကြီးဌာန၏ ထုတ်ပြန်ချက်တွင် ဖော်ပြသည်။

ဆေးဖိုးထောက်ပံ့ငွေ (MediSave) ပမာဏမှာ သက်ဆိုင်ရာပုဂ္ဂိုလ်၏ အသက်အရွယ်နှင့် အိမ်ခြံမြေတစ်နှစ်တာ အငှားချတန်ဖိုးတို့အပေါ်တွင် အခြေခံသည်။

အသက် ၈၅ နှစ်အထက်ရှိပြီး တစ်နှစ်အိမ်ငှားတန်ဖိုး ဒေါ်လာ ၂၁၀၀၀ သာရှိသည့် အိမ် ၁ လုံးသာ ပိုင်ဆိုင်ထားသူများကို ဒေါ်လာ ၄၅၀ အများဆုံး ထောက်ပံ့မည် ဖြစ်သည်။

ယခုနှစ်တွင် GSTV နှင့် MediSave အစီအစဉ်များအတွက် ဒေါ်လာ ၁ ဒသမ ၅ ဘီလီယံ ထောက်ပံ့သွားမည်ဖြစ်ကြောင်း စင်္ကာပူဘဏ္ဍာရေးဝန်ကြီးဌာန၏ ထုတ်ပြန်ချက်တွင် ဖော်ပြသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Eligible S’poreans to get up to $850 in GSTV cash, up to $450 in MediSave top-ups in August