The Rich Villa

ဒဂုံမြို့နယ်ရှိရောင်းရန်အိမ်ခြံမြေများ

ဒဂုံမြို့နယ်

ဒဂုံမြို့နယ်သည် ရန်ကုန်မြို့၏ အထင်ကရပေါင်းများစွာနှင့် ရာဇဝင်သမိုင်းကြောင်းအများဆုံးရှိသည့် မြို့နယ် တစ်ခုဖြစ်သည် ။ ရန်ကုန်အစ ဒဂုံကဟုပင်ခေါ်တွင်ရလောက်သည်အထိ သမိုင်းတွင်သည့် မြို့နယ်တစ်ခု ဖြစ်သည် ။ ရပ်ကွက်ပေါင်း (၅) ခုဖြင့်တည်ဆောက်ထားသော ဒဂုံမြို့နယ်သည် အကျယ်အဝန်း ၁၂ ကီလိုမီတာရှိပြီး မြောက်ဘက်တွင် ဗဟန်းမြို့နယ် ၊ အနောက်ဘက်တွင် အလုံမြို့နယ် ၊ အရှေ့ဘက်တွင် မင်္ဂလာတောင်ညွှန့်မြို့နယ် ၊ တောင်ဘက်တွင် လမ်းမတော်မြို့နယ် ၊ လသာမြို့နယ်နှင့် ပန်းပဲတန်းမြို့နယ်တို့ တည်ရှိသည် ။ ရန်ကုန်မြို့၏ အထင်ရှားဆုံးဖြစ်သော ရွှေတိဂုံစေတီတော် ၊မဟာဝိဇယစေတီတော် ၊ အမျိုးသားပြတိုက် ၊ အမျိုးသားပြဇာတ်ရုံနှင့် ရန်ကုန်တိုင်းဒေသကြီး အမျိုးသားလွှတ်တော် အဆောက်အဦး တို့သည် ဒဂုံမြို့နယ်တွင်တည်ရှိသည် ။ မြန်မာပြည်၏ ထပ်တန်းနာမည်ကြီး အထက်တန်းကျောင်းများဖြစ်သည့် အ.ထ.က(၁) ၊ အ.ထ.က(၂) ဒဂုံကျောင်းများလည်းတည်ရှိသည် ။ မြို့နယ်တွင်း နာမည်ကြီး တော်ဝင်ဈေးဝယ်စင်တာကြီးလည်းရှိပြီး သီတဂူဆရာတော်ဖွင့်လှစ်ထားသည့် သီတဂူအပြည်ပြည်ဆိုင်ရာ ဗုဒ္ဓဘာသာသင်တန်းကျောင်းလည်း ဒဂုံမြို့နယ်တွင်တည်ရှိသည် ။ ဒဂုံမြို့နယ်သည် စည်ကားထွန်းကားသော အထင်ကရနေရာကောင်းများကြောင့် သံရုံးများ ၊ ဟိုတယ်များ နှင့် သံတမန်ဝန်ထမ်းအိမ်ရာများစွာလည်းတည် ရှိသည် ။ အဆင့်မြင့်ကွန်ဒိုများလည်းတည်ရှိပြီး လူသိများ သက်တမ်းရင့် သမ္မတရုပ်ရှင်ရုံတည်ရှိသည့် မြို့နယ် တစ်ခုလည်းဖြစ်သည် ။ အချုပ်အားဖြင့်ဆိုသော် ဒဂုံမြို့နယ်သည် ရန်ကုန်၏သမိုင်းကြောင်းအစမြို့နယ်တစ်ခု ဖြစ်ခဲ့ပြီး ဟိုရှေးယခင် ရွှေတိဂုံစေတီတော်အနီးတည်ရှိခဲ့သည့် ရွာငယ်လေးဖြစ်ခဲ့ပေမယ့်လည်း ယခုအခါတွင် ရန်ကုန်မြို့၏ ထင်ရှားကျော်ကြားသော အချက်အချာပေါင်းများစွာဖြင့် ပြည့်နက်သည့်မြို့နယ်တစ်ခုဖြစ်သည် ။