ရန်ကုန်မြို့တွင်းရှိ အဆောက်အအုံများ ငလျင်ဒဏ်ခံနိုင်ရည် ထုတ်ပြန်မည်

ရန်ကုန်ရှိ မြို့နယ်ငါးခုမှ အဆောက်အအုံများ၏ ငလျင်ဒဏ်ခံနိုင်မှုအခြေအနေကို စိစစ်အကဲဖြတ်နေပြီဖြစ်ကြောင်း မြို့တော်စည်ပင်သာယာရေးကော်မတီ အင်ဂျင်နီယာဌာနအဆောက်အအုံက ဌာနစုမှူး ဒေါ်နှင်းအိဝင်းက ယခုလ ၁၄ ရက်တွင် ပြုလုပ်သော ငလျင်ဆိုင်ရာ ဆွေးနွေးပွဲ၌ ပြောသည်။

''အရည်အသွေးစိစစ်ဖို့ စာရင်းကောက်တာတော့ ပြီးသွားပါပြီ။ အသေးစိတ်
တိုင်းတာတွက်ချက်ဖို့အတွက် ကျန်နေသေးလို့ မထုတ်ပြန်သေးတာ ဖြစ်ပါတယ်''ဟု သူက ပြောသည်။

ကျောက်တံတား၊ ပန်းဘဲတန်း၊ လသာ၊ လမ်းမတော်နှင့် ပုဇွန်တောင်မြို့နယ်တို့တွင် အဆောက်အအုံ အရည်အသွေး စိစစ်အကဲဖြတ်ခြင်းလုပ်ငန်းကို လုပ်ကိုင်လျက်ရှိပြီး အသေးစိတ်အခြေအနေများ တွက်ချက်ပြီးပါက အများပြည်သူသိစေရန် ကြေညာမည်ဟု သူက ဆိုသည်။

အဆောက်အအုံများ၏ ငလျင်ဒဏ်ခံနိုင်မှုအရည်အသွေးကို အရောင်သုံးမျိုးဖြစ်သော အနီ၊ အဝါနှင့် အစိမ်းတို့ဖြင့် ခွဲခြားသတ်မှတ်ဖော်ပြမည်ဖြစ်သည်။

အနီရောင်အဖြစ် သတ်မှတ်ခြင်းခံထားရသော အဆောက်အအုံများမှာ အန္တရာယ်ရှိသည့် အဆောက်အအုံများဖြစ်ပြီး အမြန်ဆုံးပြုပြင်ရန် လိုအပ်သည်ဟု ဆိုသည်။ သို့သော် ချက်ချင်းပြိုကျနိုင်သဖြင့် နေထိုင်ရန်မသင့်ဟု ဆိုလိုခြင်းမဟုတ်ကြောင်း ဒေါ်နှင်းအိဝင်းက ဆိုသည်။

အဝါရောင်အဖြစ် သတ်မှတ်ခြင်းခံရသော အဆောက်အအုံများမှာ အန္တရာယ် အသင့်အတင့်ရှိသော်လည်း လူနေထိုင်ရန် ရသေးသော အဆောက်အအုံဖြစ်ပြီး အစိမ်းရောင်အဖြစ် သတ်မှတ်ထားသော အဆောက်အအုံများမှာ အန္တရာယ် ကင်းသော အဆောက်အအုံအဖြစ် မှတ်ယူနိုင်ကြောင်း ၄င်းက ဆိုသည်။

''အန္တရာယ်မရှိဘူးဆိုပေမဲ့ ဘယ်လို ငလျင်ပဲလှုပ်လှုပ် လုံးဝမပြိုဘူးလို့ ဆိုလိုတာတော့ မဟုတ်ပါဘူး။ သာမန်ပြင်းအားတွေကို အခြားအဆောက်အအုံတွေထက် ပိုခံနိုင်ရည်ရှိတယ်လို့ ပြောချင်တာပါ''ဟု ဒေါ်နှင်းအိဝင်းက ဆိုသည်။

ရန်ကုန်မြို့တော်စည်ပင်က ကောက်ယူထားသော စစ်တမ်းများကို မြန်မာနိုင်ငံ ငလျင်ကော်မတီမှ တာဝန်ရှိသူများနှင့် ပြန်လည်သုံးသပ်ဆွေးနွေးပြီးမှသာ အများပြည်သူထံ ချပြသွားမည်ဖြစ်ကြောင်းလည်း သိရသည်။

ယခုလုပ်ဆောင်နေသော စိစစ်အကဲဖြတ်ခြင်းလုပ်ငန်းမှာ မျက်မြင်အခြေအနေကိုကြည့်၍ အကဲဖြတ်ခြင်းဖြစ်ပြီး ပိုမိုတိကျသော ရလဒ်များကို သိရှိနိုင်ရန် ပို၍အသေးစိတ်သော လေ့လာမှုများကို ပြုလုပ်ရဦးမည်ဖြစ်ကြောင်းလည်း ၄င်းက ဆိုသည်။

အဆောက်အအုံတည်ဆောက်ခြင်း အရည်အသွေးစံနှုန်းများနှင့်စပ်လျဉ်း၍ ဥပဒေနှင့် စည်းမျဉ်းစည်ကမ်းများမှာ အဆောက်အအုံသစ်များအတွက်သာရှိနေပြီး ဆောက်လုပ်ပြီးသား အဆောက်အအုံများအတွက်မူ မရှိပေ။

ရန်ကုန်တိုင်းအတွင်းတွင် အဆောက်အအုံအသစ်များထက် အဆောက်အအုံဟောင်းများမှာ ပိုမိုများပြားနေကြောင်း စစ်တမ်းများအရ သိရသည်။

ထို့ကြောင့် အဆောက်အအုံဟောင်းများ စနစ်တကျထိန်းသိမ်းပြုပြင်နိုင်ရေးအတွက် ကမ္ဘာ့ဘဏ်မှ နည်းပညာအကူအညီဖြင့် ငလျင်ကော်မတီအပါအဝင် အခြားပြင်ပအဖွဲ့အစည်းများ၏ လေ့လာတွေ့ရှိချက်များကို ပေါင်းစပ်ကာ ပြုပြင်ထိန်းသိမ်ခြင်း လုပ်ငန်းများကို လုပ်ဆောင်သွားမည်ဖြစ်ကြောင်းလည်း ဒေါ်နှင်းအိဝင်းက ဆိုသည်။

ယခုစစ်တမ်းကောက်ယူနေသော မြို့နယ်ငါးခုမှာ လူနေသိပ်သည်းမှု အလွန်များခြင်း၊ အထပ်မြင့် အဆောက်အအုံများပြားခြင်း၊ ငလျင်ကြီးကြီးမားမား လှုပ်ခတ်လာပါက ဘေးဒဏ်ခံရနိုင်ခြေ အများဆုံးနေရာများဖြစ်ခြင်းတို့ကြောင့် ဦးစားပေး စစ်တမ်းကောက်ယူခြင်းဖြစ်သည်။

အဆိုပါစစ်တမ်းကောက်ယူမှုကို လွန်ခဲ့သော နှစ်နှစ်ကျော်ခန့်က စတင်ကောက်ယူခဲ့ခြင်းဖြစ်ပြီး နောင်တွင် ထိုငါးမြို့နယ်အပြင် ငလျင်လှုပ်ပါက ထိခိုက်နိုင်ခြေများသော အခြားမြို့နယ်များတွင် စိစစ်အကဲဖြတ်မှုများကို ဆက်လက်လုပ်ဆောင်သွားမည် ဖြစ်ကြောင်းလည်း သိရသည်။

Credit: The Myanmar Times