ဇွန်လတွင် နေပြည်တော်၌ကျင်းပမည့် ကျောက်မျက်ပြပွဲတွင် ကျောက်စိမ်း ကျောက်မျက်အတွဲပေါင်း ရှစ်ထောင်နီးပါး ပြသရောင်းချရန် လျာထားကြောင်း
မြန်မာနိုင်ငံ ကျောက်မျက်ရတနာလုပ်ငန်းရှင်များ အသင်းထံမှ သိရသည်။
ပြပွဲတွင် ပြသရောင်းချလိုသည့် လုပ်ငန်းရှင်များအနေနှင့် ကျောက်စိမ်း အတွဲစာရင်း လျှောက်လွှာများကို မေလ ၄ ရက်နေ့ နောက်ဆုံးထားပြီးတင်ရမည်ဖြစ်ကာ အတွဲများစစ်ဆေးလက်ခံခြင်း၊ အခြေခံရောင်းဈေး သတ်မှတ်ခြင်းများကို မေလလယ်မှစတင်၍ ဆောင်ရွက်ပေးမည်ဖြစ်ကြောင်း ယင်းအသင်း၏ တာဝန်ရှိ
သူတစ်ဦးက ပြောကြားသည်။
“မေလ ၄ ရက်နေ့မှာ ကျောက်စိမ်း၊ ကျောက်မျက်၊ ပုလဲအတွဲစာရင်းက
အတည်ထွက်မယ်။ အခုကုမ္ပဏီတွေက စာရင်းတင်တုန်းဆိုတော့
လျာထားချက်ပဲ ပြောနိုင်သေးတယ်။ နိုင်ငံခြားသား ကုန်သည်တွေ ပေးသွင်းရမယ့် အာမခံ စပေါ်ငွေတွေ၊ ပြပွဲဝင်ကြေးတွေက လုပ်ငန်းရှင်နဲ့ အစိုးရနဲ့ညှိပြီးမှ ထွက်လာမှာပါ”ဟု ၎င်းက ဆိုသည်။
နှစ်စဉ်ကျင်းပသည့် ကျောက်မျက်ပြပွဲတွင် ကျောက်စိမ်းအရိုင်းတုံးများသာ အများဆုံးရောင်းချရပြီး တရုတ်ကုန်သည်များက အများဆုံးဝယ်ယူကြကြောင်း၊ အချောထည်များမှာ ပြသရောင်းချသော်လည်း ဝယ်ယူသူနည်းပါးကြောင်း မြန်မာနိုင်ငံ ကျောက်မျက်ရတနာလုပ်ငန်းရှင်များ အသင်းထံမှ သိရသည်။
နိုင်ငံခြားကုန်သည်များဆီမှ စပေါ်ငွေ ကြိုကောက်ခံနေသော်လည်း အရောင်းအဝယ်ပျက်ခြင်းများ ဖြစ်ပေါ်သောကြောင့် ယခုပြပွဲတွင် စပေါ်ငွေများ တိုးမြှင့်ကောက်ခံသင့်ကြောင်း၊ ၂၀၁၇ ခုနှစ် ဇူလိုင်လတွင် ကျင်းပသည့် ကျောက်မျက်ပြပွဲတွင် စပေါ်ငွေ လျှော့ခဲ့ခြင်းကြောင့် အရောင်းအဝယ် ပျက်ခြင်းဖြစ်ပါက လုပ်ငန်းရှင်များဘက်က နစ်နာမှုများရှိကြောင်း ကျောက်မျက်လုပ်ငန်းရှင် ဦးသောင်းထွန်းက ပြောကြားသည်။
“စပေါ်ငွေ ၁၀ ရာခိုင်နှုန်းတင်ပေမယ့် ဝယ်တဲ့တရုတ်ကုန်သည်တွေက စပေါ်ငွေတန်ဖိုးထက် အဆ ၂၀ မြင့်တဲ့ ပစ္စည်းကို ဝယ်ယူနိုင်တယ်။ ဒါက ဟင်းသီးဟင်းရွက် ရောင်းနေတာမဟုတ်တဲ့အတွက် အရောင်းအဝယ်ပျက်ခဲ့ရင် ကုမ္ပဏီတွေဘက်က အခက်အခဲရှိတယ်။ ဒါကြောင့် နောက်ပွဲတွေမှာလည်း အာမခံစပေါ်ငွေ များများယူထားသင့်တယ်”ဟု ၎င်းက ဆိုသည်။
၂၀၁၇ ခုနှစ် ဒီဇင်ဘာလတွင် နှစ်လည် ကျောက်မျက်ရတနာပြပွဲကျင်းပခဲ့ပြီး ယင်းပြပွဲတွင် ကျောက်စိမ်းအတွဲပေါင်း ငါးထောင်ကျော်ကိုပြသခဲ့ကာ ယူရိုသန်း ၄၃၀ ကျော်ဖိုးရောင်းချနိုင်ခဲ့ကြောင်း ကျောက်စိမ်းလုပ်ငန်းကော်မတီထံမှ သိရသည်။
Credit: The Voice
