မန္တလေးမြို့၏ ၂ဝ၁၇-၂၀၁၈ ခုနှစ် မြေအရောင်းအဝယ်အတွက် မြေတန်ဖိုးနှုန်းထားစံနှုန်းကို လျှော့ချ ပြင်ဆင်သတ်မှတ်ပေးရန် မရှိကြောင်း စီမံကိန်းနှင့် ဘဏ္ဍာရေးဝန်ကြီး ဦးမြတ်သူက ယခုလ ၅ ရက်တွင် ပြောသည်။
ကျင်းပလျက်ရှိသည့် မန္တလေးတိုင်းဒေသကြီးလွှတ်တော် အဠမပုံမှန် အစည်းအဝေး (ပထမနေ့) တွင် ချမ်းမြသာစည်မြို့နယ် မဲဆန္ဒနယ် အမှတ် (၁) လွှတ်တော်ကိုယ်စားလှယ် ဦးတင်အောင်၏ မန္တလေးမြို့ ၂ဝ၁၇-၂၀၁၈ မြေအရောင်းအဝယ်အတွက် တန်ဖိုးနှုန်းထား သတ်မှတ်ချက်များကို ယခုထက် ပိုမိုလျှော့ချ ပြင်ဆင်ပေးရန် အစီအစဉ် ရှိမရှိ မေးခွန်းကို ဝန်ကြီးက ယခုလို ပြန်လည်ဖြေကြားခဲ့ခြင်းဖြစ်သည်။
တိုင်းဒေသကြီးအစိုးရအဖွဲ့အနေဖြင့် အိမ်ခြံမြေ အသင်းများ၏ တင်ပြချက်များအရ ယခင်နှစ်စံနှုန်းများထက် ၂ဝ ရာခိုင်နှုန်း လျှော့ချသတ်မှတ်ပေးထားကြောင်း၊ ဘဏ္ဍာနှစ်ကုန်ရန် လေးလသာကျန်ရှိနေသောကြောင့် မြေတန်ဖိုး နှုန်းထား စံနှုန်းသတ်မှတ်ချက်များကို ပြင်ဆင်ရန် အချိန်မလုံလောက်ကြောင်း ဝန်ကြီးက ပြောသည်။
''တကယ်လို့ ပြင်ဆင်သတ်မှတ်မယ်ဆိုရင် အခုဘဏ္ဍာနှစ်အတွင်း မြေတန်ဖိုးသတ်မှတ်ပြီး အခွန်စည်းကြပ်မှု ခံယူထားသူတွေအတွက်လည်း မညီမျှမှုတွေ ရှိနေနိုင်ပြီး နစ်နာမှုတွေ ဖြစ်ပေါ်လာနိုင်ပါတယ်''ဟု ဝန်ကြီးက ပြောသည်။
မြေဈေးနှုန်းထား သတ်မှတ်ချက် လျော့နည်းနေသော်လည်း အမှန်တကယ်ပေါက်ဈေးထက် များနေသည့် အပြင် ပြည်ထောင်စုအခွန် ကောက်ခံနှုန်းမြင့်မားနေခြင်းကြောင့် မြေအရောင်းအဝယ် ပြုလုပ်ရာတွင် စာချုပ်စာတမ်းကို တရားဝင်မှတ်ပုံတင်ခြင်း မပြုသဖြင့် အခွန်အခရရှိမှုနှင့် စာချုပ်ရောင်းချရမှု နည်းပါးသွားကြောင်း၊ မြေကွက်အရောင်းအဝယ်အတွက် စာချုပ်မှတ်ပုံတင်မှုသည် ၂ဝ၁၅-၂၀၁၆ တွင် စာချုပ်ပေါင်း ၁,၆ဝ၃ ခု၊ ယမန်နှစ်တွင် ၂,၈၁ဝ၊ ယခုနှစ်အတွင်း ၆၂၁ ခုသာ ရှိကြောင်း၊ ယခင်နှစ်များထက် ငါးဆနီးပါးကျဆင်းနေကြောင်း ဦးတင်အောင်က ပြောသည်။
အိမ်ခြံမြေ ကာလတန်ဖိုး စိစစ်သတ်မှတ်ရေးအဖွဲ့ကို ဘဏ္ဍာရေးနှင့် အခွန်ဝန်ကြီးဌာနအမိန့်ဖြင့် သက်ဆိုင်ရာ ဌာနကိုယ်စားလှယ်ခြောက်ဦးဖြင့် ဖွဲ့စည်းခြင်းဖြစ်ပြီး မြို့နယ်များက တင်ပြလာသော စံနှုန်းများကို ပဏာမအတည်ပြုပြီး အဆင့်ဆင့် ညှိနှိုင်းမှုများ ပြုလုပ်၍ အိမ်ခြံမြေ စံနှုန်းထားကို သတ်မှတ်ခြင်းဖြစ်သည်။
Credit: The Myanmar Times
