မွန်ပြည်နယ်ရှိ ကျေးရွာ ၁၀ ရွာတွင် နှစ် ၃၀ မြေငှားဂရန် ပြုလုပ်ပေးမည်ဟုဆို

မွန်ပြည်နယ်အတွင်း မြေယာပြဿနာအနည်းပါးဆုံး ကျေးရွာ ၁၀ရွာတွင် နေထိုင်သူများအတွက် နှစ်သုံးဆယ် မြေငှားဂရန်ပြုလုပ်ပေးမည်ဖြစ်ကြောင်း ပြည်နယ်အထွေထွေအုပ်ချုပ်ရေးမှူးရုံးမှ သတင်းရရှိသည်။

‘‘ပြည်ထဲရေးဌာနက အမည်စာရင်းပေါက်ပြီးတော့ မြို့နယ်တစ်မြို့နယ်မှာ ရွာတစ်ရွာနှုန်းနဲ့ အနှစ် ၃၀ မြေငှားဂရန်လုပ်ပေးသွားမယ်။ ဒီလိုလုပ်ပေးတာဟာ အစိုးရရဲ့ ရက်တစ်ရာစီမံချက်ထဲမှာပါလို့။ အဲဒီကျေးရွာတွေက ပြည်ထဲရေးဝန်ကြီးဌာနရဲ့ မြေစာရင်းအမည်ပေါက်ဖြစ်ပြီးတော့ မြေယာအရှုပ်အရှင်းကင်းတဲ့ကျေးရွာကို ထုတ်ပေးသွားမှာပါ’’ ဟု မွန်ပြည်နယ်အထွေထွေအုပ်ချုပ်ရေးဦးစီးဌာနမှ ညွှန်ကြားရေးမှူး ဦးမြင့်သန်းဝင်းက ပြောသည်။

မြေငှားဂရန်ချပေးရာတွင် ကျေးရွာ ၁၀ ရွာမှ မြေဧရိယာ ၁၄၇ဒသမ၅၅၁ဧကကို ပြုလုပ်ပေးမည်ဖြစ်ပြီး ရက် ငါးဆယ်အတွင်း မြေငှားဂရန်များ အမြန်ထုတ်ပေးနိုင်ရန် သက်ဆိုင်ရာဌာနဆိုင်ရာများနှင့် ပူးပေါင်းဆောင်ရွက်ထားကြောင်း ဦးမြင့်သန်းဝင်းက ဆိုသည်။

မြေငှားဂရန် လျှောက်ထားသူများသည် အသက် (၁၈) ပြည့်ပြီးသည့် နိုင်ငံသားဖြစ်သူ၊ ကျေးရွာအုပ်စုအတွင်း နေထိုင်သူ၊ နိုင်ငံသား စိစစ်ရေးကတ်ပြားရှိသူ၊ လျှောက်ထားသူပါဝင်သည့် အိမ်ထောင်စုစာရင်းပုံစံ (၆၆/၆)ရှိသူ၊ အခြားအရပ်ဒေသမှ ပုံစံ (၁၀) ဖြင့် တရားဝင် ပြောင်းရွှေ့လာပါက ထိုကျေးရွာတွင် အနည်းဆုံး ၁၂ နှစ်နေထိုင်သူဖြစ်ရမည်ဟု စည်းကမ်းများသတ်မှတ်ထားသည်။

မြေဂရန်ပြုလုပ်ပေးမည့် ကျေးရွာများမှာ ကျိုက်ထိုမြို့နယ် သံတံတားကျေးရွာ၊ ဘီးလင်းမြို့နယ် အနိုင်းပွန်ကျေးရွာ၊ သထုံမြို့နယ် ချောင်းဝကျေးရွာ၊ ပေါင်မြို့နယ် ရေးစုကွက်သစ်ကျေးရွာ၊ မော်လမြိုင်မြို့နယ် ကော့ခပိုကျေးရွာ၊ ရေးမြို့နယ် နှင်းစုံကျေးရွာ၊ သံဖြူဇရပ်မြို့နယ် ပဒါငံကျေးရွာ၊ မုဒုံမြို့နယ် အခွန်ကျေးရွာ၊ ကျိုက်မရောမြို့နယ် ပေါ်ကျေးရွာနှင့် ချောင်းဆုံမြို့နယ် မူးရစ်ကြီးကျေးရွာတို့ ဖြစ်သည်။

မွန်ပြည်နယ်ရှိ မြို့နယ် ၁၀ မြို့နယ်တွင် ကျေးရွာပေါင်း ၁,၁၄၇ ရွာ၊ ကျေးရွာအုပ်စု ၃၆၈ စုရှိသည်။

Credit : 7Day Daily