ဒူဘိုင်းတွင် ၁.၈ မိုင် အပန်းဖြေတူးမြောင်း၏ နောက်ဆုံးအဆင့်များကိုကန်ဒေါ်လာ ၁၉၁ သန်းသုံးစွဲကာတည်ဆောက်လျက်ရှိ

အာရပ်စော်ဘွားများပြည်ထောင်စု၊ ဒူဘိုင်းတွင် ၁ ဒသမ ၈ မိုင်ရှည်လျားသော အပန်းဖြေတူးမြောင်းဖောက် လုပ်လျက်ရှိရာ ယခုအခါ စတုတ္ထနှင့် ပဉ္စမအဆင့် များကိုကန်ဒေါ်လာ ၁၉၁ သန်းအကုန်အကျခံ၍ ဒူဘိုင်းလမ်းပန်းနှင့် သယ်ယူပို့ဆောင်ရေးအာဏာပိုင်အဖွဲ့ (RTA) က ဆက်လက်ဆောက်လုပ်လျက်ရှိကြောင်းအရှေ့ အလယ်ပိုင်းအခြေစိုက် အိမ်ခြံမြေ သတင်း ၀က်ဘ်ဆိုက် တစ်ခုတွင် ဖော်ပြသည်။

ကမ္ဘာလှည့်ခရီးသည်များအပန်းဖြေရန်ရည်ရွယ်ကာယင်းတူးမြောင်းဖောက်လုပ်ခဲ့ခြင်း ဖြစ်ပြီးအာရေးဘီးယား ပင်လယ်ကွေ့သို့ ဆက်သွယ်ပေးမည် ဖြစ်သည်။
တူးမြောင်းမှာအလျား ၁ ဒသမ ၈ မိုင်၊ အကျယ်အ၀န်း ၈၀ မီတာ (၂၆၂ ပေ) မှ ၁၂၀ မီတာ (၃၉၃ ပေ)၊ အနက် ၆ မီတာ (၁၉ ပေ) ခန့် ရှိသည်။

တူးမြောင်းဖြတ် တံတားတို့မှာ ၈ မီတာ (၂၆ ပေကျော်) မြင့်မား စွာဆောက်လုပ်ထားသောကြောင့် တူးမြောင်းအတွင်း ၂၄ နာရီပတ်လုံး အန္တရာယ်ကင်းရှင်းစွာ လွတ်လွတ်လပ်လပ် သွားလာနိုင်မည် ဖြစ်သည်။
ယင်းတူးမြောင်းကို လာမည့် စက်တင်ဘာလအတွင်း အပြီးသတ်တည်ဆောက်နိုင်ရန် ရည်မှန်းထားသည်။
စတုတ္ထဆင့်အတွက် ကုန်ကျစရိတ်မှာကန်ဒေါ်လာ ၈၄ သန်းဖြစ်ပြီးတူးမြောင်းကမ်း တစ်ဘက်တစ်ချက်တွင် လူနေအိမ်ရာများ တည်ဆောက်ခြင်းလည်း ပါဝင်သည်။

ပဉ္စမအဆင့်မှာကန်ဒေါ်လာ ၁၀၈ သန်းကုန်ကျ မည်ဖြစ်ပြီးအာရေးဗီးယန်းပင်လယ်ကွေ့တွင် အဆုံးသတ် မည် ဖြစ်သည်။ RTA မှ အမှုဆောင်ဒါရိုက်တာဘုတ်အဖွဲ့ ဥက္ကဌဖြစ်သူ မက်တာအယ်လ်တယာ ကပြောကြားရာတွင် တူးမြောင်းဖောက် လုပ်မှုလုပ်ငန်း များဆက်လက် အကောင်အထည်ဖော် နေပြီးတံတားဆောက်လုပ်မှု များမှာ ၉၂ ရာခိုင်နှုန်းခန့် ပြီးစီးလျက် ရှိပြီဖြစ်ကြောင်း ပြော ကြားသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)