အိန္ဒိယနိုင်ငံတွင် ဦးနှောက်စားသည့် အမီးဘား ကူးစက်ခံရသူ ၆၇ ဦးရှိနေပြီး သေဆုံးသူ ၁၈ ဦးအထိ ရှိလာ

အိန္ဒိယနိုင်ငံ၊ ကီရာလာပြည်နယ်တွင် ယခုနှစ်အတွင်း ဦးနှောက်စား အမီးဘား ကူးစက်ခံရသူ ၆၇ ဦးရှိနေပြီး သေဆုံးသူ ၁၈ ဦးအထိ ရှိလာကြောင်း India Today သတင်းဌာနက ဖော်ပြသည်။

ကျန်းမာရေးဝန်ကြီး ဗီနာ ဂျော့ချ် (Veena George) က ရေပြင်များ ဘေးကင်းရေးနှင့် ကြိုတင်ကာကွယ်ရေး အစီအမံများ အဆောတလျင် ဆောင်ရွက်လျက်ရှိနေသည်။

(ဆက်စပ်သတင်း)

အမေရိကန်တွင် အမျိုးသားတစ်ဦးမှာ ဦးနှောက်စားသည့် amoeba နှာခေါင်းမှ ဝင်ကာ သေဆုံး

https://www.imyanmarhouse.com/news/read/1157220

Amoebic meningoencephalitis ဟုခေါ်သော ရှားပါးသည့် ဦးနှောက်စား အမီးဘား ကူးစက်ခံရမှု နောက်ဆုံးဖြစ်ရပ်အနေဖြင့် ကီရာလာပြည်နယ်၏ မြို့တော် သီရူဗာနန်သာပူရမ်မြို့မှ အသက် ၁၇ နှစ်အရွယ် လူငယ်တစ်ဦး ကူးစက်ခံရမှု ဖြစ်သည်။

ထိုလူငယ်ကို ရောဂါရှာဖွေစစ်ဆေးမှု ပြုလုပ်ပြီးနောက်ပိုင်း ကျန်းမာရေးဌာနက Akkulam ကမ္ဘာလှည့်ခရီးသွား ကျေးရွာရှိ ရေကူးကန်ကို ပိတ်သိမ်းလိုက်ပြီး ရေနမူနာ ရယူကာ စမ်းသပ်စစ်ဆေးမှုများ ပြုလုပ်နေသည်။

ထိုလူငယ်သည် ရောဂါကူးစက်မခံရမီတစ်ရက်က ဤရေကန်တွင် သူငယ်ချင်းများနှင့်အတူ ရေကူးခဲ့ကြောင်း အာဏာပိုင်တို့က ပြောသည်။

ကျန်းမာရေးဝန်ကြီးဌာန၏ ဝက်ဘ်ဆိုက်ရှိ Integrated Disease Surveillance Programme တွင် စက်တင်ဘာ ၁၄ ရက်က ဖော်ပြခဲ့သော အချက်အလက်များအရ ကီရာလာပြည်နယ်တွင် ယခုနှစ်အတွင်း amoebic meningoencephalitis ကူးစက်ခံရသူ ၆၇ ဦးရှိခဲ့ပြီး သေဆုံးသူ ၁၈ ဦးရှိပြီဖြစ်ကြောင်း ဖော်ပြထားသည်။

ကီရာလာပြည်နယ် ကျန်းမာရေးဝန်ကြီး ဗီနာ ဂျော့ချ်က amoebic meningoencephalitis ကို ထိန်းချုပ်ရန်အတွက် တင်းကျပ်သည့် စည်းမျဉ်းများ ချမှတ်ရန် အဆောတလျင် လိုအပ်နေပြီဖြစ်ကြောင်း ပြောကြားထားပြီး ရေကူးမည်ဆိုပါက သတိရှိရန် ပြည်သူတို့ကို အကြံပေးထားသည်။

ကျန်းမာရေးဝန်ကြီး ဗီနာက “ကျွန်မတို့အနေနဲ့ amoebic meningoencephalitis ကို ကာကွယ်ဖို့အတွက် ခိုင်မာတဲ့ အကာအကွယ်တစ်ခုခု ဖန်တီးရမှာ ဖြစ်ပါတယ်။ ကျွဲနွားတွေ ရေစိမ်ကြတဲ့ နေရာတွေ အပါအဝင် ရေသေ (ဒါမှမဟုတ်) ညစ်ညမ်းတဲ့ ရေထဲမှာ မျက်နှာမသစ်ကြဖို့၊ ရေမကူးကြဖို့ ကျွန်မတို့ ဂရုစိုက်ကြရမှာ ဖြစ်ပါတယ်။”

ရေတွင်းများကိုလည်း ကလိုရင်းဖြင့် ပိုးသတ်သင့်ကြောင်း၊ water theme park များရှိ ရေကူးကန်များကိုလည်း ကောင်းစွာ ကလိုရင်းခတ်ထားသင့်ကြောင်းလည်း ကျန်းမာရေးဝန်ကြီးက ပြောသည်။

“အိမ်တွေမှာ ရေလှောင်ထားတဲ့နေရာတွေကို သန့်ရှင်းအောင် ထားသင့်တယ်။ ဒီ အမီးဘားက နှာခေါင်းက တဆင့် ဦးနှောက်ထဲကို ဝင်တာဖြစ်ပါတယ်။ ဒါကြောင့် နှာခေါင်းထဲကို ရေမဝင်အောင် ဂရုစိုက်ကြပါ” ဟု ဝန်ကြီးက ပြောသည်။

ပြီးခဲ့သော ရက်သတ္တပတ်အတွင်း ကီရာလာပြည်နယ်တွင် amoebic meningoencephalitis ကြောင့် လူတစ်ဦး သေဆုံးခဲ့ရာ တစ်လတာအတွင်း ၅ ဦး သေဆုံးခဲ့ရပြီ ဖြစ်သည်။

နောက်ဆုံး သေဆုံးခဲ့ရသူမှာ မာလာပူရမ်ခရိုင်၊ Vandoor မြို့မှ ရှိုဘာနာ အမည်ရှိ အသက် ၅၆ နှစ်အရွယ် အမျိုးသမီးကြီးဖြစ်ပြီး Kozhikode Medical College ဆေးရုံတွင် ဆေးကုသမှု ခံယူနေရင်း သေဆုံးသွားခြင်း ဖြစ်သည်။

ရာဟေ့ရှ်အမည်ရှိ အသက် ၄၅ နှစ်အရွယ် အခြားလူနာတစ်ဦးမှာလည်း ဦးနှောက်စား အမီးဘား ကူးစက်ခံရကာ ထိုဆေးရုံတွင်ပင် သေဆုံးသွားခဲ့သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Kerala confirms 67 brain-eating amoeba cases, 18 deaths so far this year (indiatoday)