ပြည်ပ အိမ်ခြံမြေ သတင်း | Posted by ရွှေစင်ဝင်း
အမေရိကန်ပြည်၊ နယူးယောက်မြို့တွင် ၁၅ ပိဿာကျော် (၁၅ ဒသမ ၃ ပိဿာ) အလေးချိန်ရှိသည့် အင်္ဂါဂြိုဟ်မှ ဥက္ကာခဲတစ်ခုကို လေလံပွဲ၌ ကန်ဒေါ်လာ ၅ သန်းကျော်ဖြင့် ရောင်းထွက်သွားသည်။
အဆိုပါ ဥက္ကာခဲကို တွေ့ရှိခဲ့သည့်နေရာမှာ နိုင်ဂျာနိုင်ငံပိုင်နက်အတွင်းရှိ ဆာဟာရ သဲကန္တာရအတွင်း တွေ့ရှိခဲ့ခြင်းဖြစ်ရာ နိုင်ဂျာအစိုးရက ထိုဥက္ကာခဲ မည်သို့မည်ပုံ နယူးယောက်သို့ ရောက်ရှိသွားသည်ကို စုံစမ်းစစ်ဆေးမှုများ ပြုလုပ်လျက်ရှိနေသည်။
လေလံတင်ပေးသည့် ကုမ္ပဏီမှာ Sotheby’s ဖြစ်သည်။
ဥက္ကာခဲ ရှာဖွေတွေ့ရှိပုံနှင့် မည်သို့မည်ပုံ သယ်ယူရောင်းချခဲ့ကြသည်ကို တရားဝင်စစ်ဆေးမှုများ ပြုလုပ်နေကြောင်း နိုင်ဂျာအစိုးရက ပြောသည်။
((ဥက္ကာခဲ ဘယ်လိုတွေ့ခဲ့လဲ))
Sotheby’s ၏ ပြောကြားချက်အရ အင်္ဂါဂြိုဟ်ကို ကြီးမားသည့် ဂြိုဟ်သိမ်တစ်ခုက ဝင်တိုက်မိရာ အင်္ဂါဂြိုဟ်မှ အပိုင်းအစများက မိုင်ပေါင်း သန်း ၁၄၀ အထိ လွင့်မြောကာ ကမ္ဘာမြေသို့ ရောက်ရှိလာခြင်းဖြစ်ပြီး နယူးယောက်တွင် ရောင်းချခဲ့သည့် ဥက္ကာခဲကို NWA 16788 ဟု အမည်ပေးထားကြောင်း ပြောသည်။
၂၀၂၃ ခုနှစ်၊ နိုဝင်ဘာလအတွင်း နိုင်ဂျာနိုင်ငံ အနောက်မြောက်ပိုင်း ဆာဟာရသဲကန္တာရအတွင်း ဥက္ကာခဲမုဆိုးတို့က တွေ့ရှိခဲ့ခြင်းဖြစ်ကြောင်း Sotheby’s က ပြောသည်။
ရောင်းချသူနှင့် ဝယ်ယူသွားသူ မည်သူဖြစ်သည်ကိုမူ ထုတ်ပြန်ကြေညာခြင်း မရှိချေ။
1.jpg)
(၂၀၂၅ ခုနှစ်၊ ဇူလိုင်လ ၈ ရက်က လေလံမတင်မီတွင် အင်္ဂါဂြိုဟ်မှ ဥက္ကာခဲကို ပြသထားပုံ။ ဓာတ်ပုံ-Selcuk Acar/Anadolu via Getty Images)
နိုင်ဂျာကဲ့သို့ ဆာဟာရ သဲကန္တာရနိုင်ငံများတွင် ဥက္ကာခဲရှာဖွေသူများ များပြားလာနေသည်။
ဥက္ကာခဲများသည် ကမ္ဘာပေါ်တွင် မည်သည့်နေရာ၌ မဆို ကျရောက်နိုင်သော်လည်း ဆာဟာရသဲကန္တာရတွင် အဓိက ရှာဖွေတွေ့ရှိနေခြင်းမှာ ဥက္ကာခဲတို့ ကြာရှည်တည်ရှိနေရန် ကိုက်ညီသည့် ရာသီဥတု အခြေအနေကြောင့် ဖြစ်သည်။
ဥက္ကာခဲမုဆိုးတို့ ရှာဖွေတွေ့ရှိသော ဥက္ကာခဲများကို ဝါသနာအရစုဆောင်းသူများနှင့် သိပ္ပံပညာရှင်တို့က ဝယ်ယူလေ့ရှိသည်။
Heritage ဂျာနယ်၏ ဖော်ပြချက်အရ ယခုဥက္ကာခဲမှာ နိုင်ငံတကာ အရောင်းအဝယ်သမားတစ်ဦးထံမှတဆင့် အီတလီရှိ ပုဂ္ဂလိက ပြခန်းတစ်ခုသို့ ရောက်ရှိခဲ့သည်ဟု ဆိုသည်။
ဖလောရင့်စ်တက္ကသိုလ်မှ သိပ္ပံပညာရှင်တို့က ယခုဥက္ကာခဲ၏ ဖွဲ့စည်းပုံကို လေ့လာခဲ့ကြပြီး ကမ္ဘာမြေသို့ ကျဆင်းမလာမီက မည်သည့်နေရာမှ လာခဲ့သည်ကို လေ့လာခဲ့ကြသည်ဟု ဆိုသည်။
ရောမမြို့တွင်လည်း ခေတ္တပြသခဲ့သေးပြီး ယင်းနောက်တွင်မှ နယူးယောက်သို့ ရောက်ကာ လေလံတင်ရောင်းချခဲ့ခြင်းဖြစ်သည်။
ယခု ဥက္ကာခဲသည် အင်္ဂါဂြိုဟ်မှ ဥက္ကာခဲများအနက် အကြီးမားဆုံးလည်းဖြစ်သည်။
သို့သော် နာဆာ၏ ဖော်ပြချက်အရမူ နမီးဘီးယားနိုင်ငံသို့ ကျရောက်ခဲ့ဖူးသော ဥက္ကာခဲမှာ တန်ချိန် ၁၀၀ ကျော် အလေးချိန်ရှိသည်ဟု ဆိုသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Niger wants answers after largest piece of Mars sold at auction for more than $5 million
