ပြည်ပ အိမ်ခြံမြေ သတင်း | Posted by ရွှေစင်ဝင်း
တရုတ်ပြည်တွင် ပညာရည်အမြင့်ဆုံး food delivery သမားဟု နာမည်ကြီးနေသော အမျိုးသားတစ်ဦးရှိသည်။
၎င်းသည် ကမ္ဘာတလွှားရှိ ဂုဏ်ရှိန်ကြီးသော တက္ကသိုလ်များမှ ဘွဲ့များရရှိထားရာ အောက်စ်ဖို့ဒ်တက္ကသိုလ်လည်း အပါအဝင်ဖြစ်သည်။
၎င်း၏အမည်မှာ တင်းယွမ်ကျောင်းဖြစ်ပြီး အသက် ၃၉ နှစ်အရွယ်ဖြစ်သည်။
တင်းယွမ်ကျောင်း၏ ဖြစ်ရပ်နှင့် စပ်လျဉ်းပြီး အလုပ်အကိုင်ရှားပါးသော အခြေအနေတွင် အတန်းပညာ၏ တန်ဖိုးကျဆင်းလာမှုအပေါ် လူမှုကွန်ရက်သုံးစွဲသူတို့က အမျိုးမျိုးအဖုံဖုံ မှတ်ချက်ပေးလျက်ရှိကြောင်း 163.com သတင်းဝက်ဘ်ဆိုက်က ဖော်ပြသည်။
တင်းယွမ်ကျောင်းသည် တရုတ်ပြည်အရှေ့တောင်ပိုင်း ဖူကျန်းပြည်နယ်ဇာတိဖြစ်ပြီး gaokao ဟုခေါ်သော တရုတ်ပြည်၏ တက္ကသိုလ်ဝင်ခွင့် စာမေးပွဲကို ၂၀၀၄ ခုနှစ်တွင် ဖြေဆိုခဲ့သည်။
စာမေးပွဲတွင် အမှတ် ၇၅၀ ပေးသည့်အနက် အမှတ် ၇၀၀ နီးပါးရကာ အထင်ကရတက္ကသိုလ်ကြီးဖြစ်သော Tsinghua တက္ကသိုလ်သို့ ဝင်ခွင့်ရခဲ့သည်။
ထိုတက္ကသိုလ်မှ ဓာတုဗေဒဖြင့် ဘွဲ့ရခဲ့ပြီးနောက် ဒိတ်ဒိတ်ကြဲတက္ကသိုလ်ကြီးဖြစ်သော ပီကင်းတက္ကသိုလ်သို့ ဆက်လက်တက်ရောက်ခဲ့ကာ energy engineering ဖြင့် မဟာဘွဲ့ရခဲ့ပြန်သည်။
ယင်းနောက် တင်းယွမ်ကျောင်းသည် စင်္ကာပူမှ ထိပ်သီးတက္ကသိုလ်ကြီဖြစ်သော Nanyang နည်းပညာတက္ကသိုလ်မှ ဇီဝဗေဒဖြင့် PhD ဘွဲ့ရခဲ့သည်။
ထို့အပြင် ဗြိတိန်ရှိ အောက်စ်ဖို့ဒ်တက္ကသိုလ်မှလည်း Biodiversity ဖြင့်လည်း မဟာဘွဲ့ရခဲ့သေးသည်။
(တင်းယွမ်ကျောင်းသည် စင်္ကာပူရှိ Nanyang နည်းပညာတက္ကသိုလ်မှ ဇီဝဗေဒ PhD ဘွဲ့ရခဲ့ပြီး အောက်စ်ဖို့တက္ကသိုလ်မှလည်း biodiversity ဖြင့် မဟာဘွဲ့ရထားသည်။ ဓာတ်ပုံ-Douyin)
Food delivery သမားဖြစ်မလာမီက တင်းယွမ်ကျောင်းသည် စင်္ကာပူ အမျိုးသားတက္ကသိုလ် (NUS) တွင် ပါရဂူဘွဲ့လွန်သုတေသန ပြုလုပ်ခဲ့ပြီး ပြီးခဲ့သောနှစ် မတ်လက ပြီးဆုံးခဲ့သည်။
တင်းယွမ်ကျောင်းသည် အလုပ်ပေါင်းများစွာ လျှောက်ထားခဲ့ပြီး အင်တာဗျူးပေါင်း ၁၀ ခုကျော် ဖြေခဲ့သော်လည်း သင့်တော်သည့်အလုပ် ရှာမတွေ့ခဲ့ချေ။ သို့နှင့် နောက်ဆုံးတွင် တင်းယွမ်ကျောင်းက စင်္ကာပူတွင် food delivery သမားတစ်ဦးအဖြစ် လုပ်ကိုင်ခဲ့ခြင်း ဖြစ်သည်။
တစ်ရက်လျှင် ၁၀ နာရီခန့် အလုပ်လုပ်ရပြီး ရက်သတ္တပတ်လျှင် စင်္ကာပူဒေါ်လာ ၇၀၀ (ကန်ဒေါ်လာ ၅၅၀) ခန့် ဝင်ငွေရသည်ဟု ဆိုသည်။
“ဒါက တည်ငြိမ်မှုရှိတဲ့ အလုပ်တစ်ခုပါ။ ဒီဝင်ငွေနဲ့ မိသားစုကို ကျွန်တော်ထောက်ပံ့နိုင်ပါတယ်။ ကြိုးကြိုးစားစားလုပ်ရင် ထိုက်သင့်အောင် နေလို့ရပါတယ်။ ဒီအလုပ်က မဆိုးပါဘူး” ဟု တင်းယွမ်ကျောင်းက လူမှုကွန်ရက်တွင် မျှဝေပြောပြသည်။
သူ၏ မိသားစုအကြောင်းကိုမူ မသိရချေ။
(▲ တင်းယွမ်ကျောင်းက delivery အလုပ်ကို သဘောကျသည်။ ကျန်းမာရေးဝါသနာပါသည့်မိမိအတွက် သင့်တော်ကြောင်း ၎င်းကပြောသည်။ ဓာတ်ပုံ-Douyin)
တင်းယွမ်ကျောင်းက ကျောင်းသားများကို ဝိုင်းကျူရှင် စာပြသည့်အလုပ် မလုပ်ခြင်းမှာ မိမိအနေဖြင့် ကျောင်းသားကိုယ်တိုင်ရှာရသည်ကို အလွန်ရှက်သောကြောင့်ဖြစ်ကြောင်း ပြောသည်။
စင်္ကာပူတွင် food delivery သမားအဖြစ် လုပ်ကိုင်ပြီး လအနည်းငယ်အကြာတွင် တရုတ်ပြည်သို့ ပြန်လာခဲ့သည်။
တရုတ်ပြည်တွင်လည်း တင်းယွမ်ကျောင်းသည် ထိပ်သီး ဈေးဝယ် platform တစ်ခုဖြစ်သော Meituan အတွက် food delivery သမားတစ်ဦးအဖြစ် ပေကျင်းမြို့တွင် လုပ်ကိုင်နေသည်။
သူ၏ ဖြစ်ရပ်အပေါ် ပြည်မကြီးလူမှုကွန်ရက်တွင် အမျိုးမျိုး သုံးသပ်ဆွေးနွေးမှုများ ပေါ်ပေါက်နေသည်။
“ဒါဆိုရင် ပညာတွေ သင်နေရတဲ့ ရည်ရွယ်ချက်က ဘာလဲ” ဟု လူမှုကွန်ရက်သုံးစွဲသူတစ်ဦးက မှတ်ချက်ပြုသည်။
“သူက ကျောင်းတွေ အများကြီးတက်၊ စာတွေ အများကြီးသင်ခဲ့ပြီး နောက်ဆုံးမှာ food delivery သမားဘဝနဲ့ အဆုံးသတ်ရတယ်” ဟု အခြားတစ်ဦးက မှတ်ချက်ပေးသည်။
(▲ တင်းယွမ်ကျောင်းကဲ့သို့ ပညာအရည်အချင်းအလွန်မြင့်မားသူပင် အလုပ်ရရန် ခက်ခဲနေသည်ဆိုလျှင် ပညာသင်ယူနေရခြင်းမှာ ထိုက်တန်ပါ၏လောဟု လူမှုကွန်ရက်သုံးစွဲသူများစွာက မေးခွန်းထုတ်နေကြသည်။ ဓာတ်ပုံ-Shutterstock)
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: China delivery rider graduated from top schools like Oxford inspires others to stay positive
