ပြည်ပ အိမ်ခြံမြေ သတင်း | Posted by ရွှေစင်ဝင်း
ထိုင်းနိုင်ငံတွင် လူသေအလောင်းထည့်သော ခေါင်းတလားကြီးတစ်ခုမှာ ကားပေါ်မှတဆင့် လမ်းမအလယ်သို့ ပြုတ်ကျသွားခဲ့ပုံ ဗွီဒီယိုဖိုင်မှာ TikTok လူမှုကွန်ရက်တွင် ဂယက်ရိုက်ခဲ့သည်။
အမျိုးသမီးတစ်ဦးက အဆိုပါကားနံပါတ်ကို ထီထိုးခဲ့ရာ ထီပေါက်သွားသည်။
TikTok ဗွီဒီယိုဖိုင်တစ်ခုတွင် တွေ့မြင်ရမှုအရ အခေါင်းတစ်ခုမှာ ကားတစ်စီးပေါ်မှ ပြုတ်ကျသွားပြီး လမ်းမအလယ်တွင် ကျကျန်ခဲ့ပုံကို တွေ့ရသည်။
ကားပေါ်မှ အခေါင်းပြုတ်ကျခဲ့ပုံကို အနီးကားတစ်စင်းထဲတွင် ထိုင်နေသော အမျိုးသမီးတစ်ဦးက ဗွီဒီယို ရိုက်ကူးထားခဲ့ပြီး Irinrumtoey အမည်ရှိ အကောင့်ဖြင့် TikTok တွင် တင်ခဲ့ခြင်း ဖြစ်သည်။
ကားပေါ်မှ အခေါင်းကြီး ပြုတ်ကျလာသည်ကို တွေ့လိုက်ရချိန်တွင် နှလုံးရပ်မတတ် ထိတ်လန့်သွားခဲ့ရကြောင်း ၎င်းက ပြောသည်။
အခေါင်းမှာ အသစ်စက်စက်ဖြစ်ဟန်ရပြီး သွားရောက်ပို့ဆောင်ခြင်း ဖြစ်နိုင်သည်။
ကားပေါ်မှ ပြုတ်ကျသွားပြီးနောက် ကားသမားက ကားကို လမ်းဘေးတွင် ရပ်လိုက်ကာ အခေါင်းကို ပြန်လည်ဆွဲယူသွားခဲ့သည်။
အဆိုပါဗွီဒီယိုကို ပြသပြီးနောက် Irinrumtoey က ပြောပြသည်မှာ မိမိသည် အခေါင်းတင်သည့် ကား၏ ကားနံပါတ်ဖြစ်သော ၄၈၇၈ နံပါတ်ကို အသုံးပြုပြီး ထီထိုးခဲ့ရာ ကံထူးခဲ့ကြောင်း ပြောသည်။
၎င်းကံထူးခဲ့သော ၂ လုံးတိုက် ထီဂဏန်းမှာ ၈၇ ဖြစ်ကြောင်း KhaoSod သတင်းဌာနက ဖော်ပြသည်။
(မှတ်ချက်။ Irinrumtoey ကံစမ်းခဲ့သည်မှာ တရားမဝင် ၂ လုံးထီ မဟုတ်ဘဲ ထိုင်းအစိုးရက တရားဝင်ဖွင့်လှစ်သော ထီဖြစ်ပြီး ထီဆုများစွာအနက်မှ ၂ လုံးတူလျှင် ဆုငွေရသော ထီဆု ကံထူးခြင်း ဖြစ်သည်)
အခေါင်းပြုတ်ကျသည့် ဗွီဒီယိုမှာ လူမှုကွန်ရက်တွင် ဂယက်ရိုက်ပျံ့နှံ့ခဲ့သည်ဖြစ်ရာ အဆိုပါဗွီဒီယိုဖိုင်ကို ကြည့်ရှုရသူများစွာက ၎င်းတို့လည်း ကားနံပါတ်ကို ထီထိုးခဲ့ရာ ထီပေါက်ကြောင်း မှတ်ချက်လာပေးကြသည်။
ထီပေါက်စဉ် ကြေညာပြီးနောက်ပိုင်းမှ ယခုဗွီဒီယိုဖိုင်ကို ကြည့်ရသောကြောင့် ထီမပေါက်ခဲ့ကြောင်း စိတ်ပျက်လက်ပျက် မှတ်ချက်ပြုသူများလည်း များစွာရှိနေသည်။
“ပြုတ်ကျလာတဲ့ အခေါင်းတစ်လုံးက ကျွန်မကို ကံကြမ္မာကောင်းတွေ သယ်ဆောင်ပေးလာလိမ့်မယ်လို့ တခါမှ မမျှော်လင့်ခဲ့မိဘူး။ တခါတလေမှာ ကံကြမ္မာရဲ့ အလုပ်လုပ်ပုံက ဆန်းကြယ်လွန်းပါတယ်” ဟု Irinrumtoey က ပြောသည်။
အဆိုပါဗွီဒီယိုမှာ ကြည့်ရှုသူပမာဏ ဆက်လက်မြင့်တက်လျက်ရှိနေပြီး ထီကံစမ်းသူများစွာက မိမိတို့လည်း ထူးခြားသည့်ဖြစ်ရပ်များကို မျက်စိရှင်ရှင်ထားကာ စူးစမ်းသွားရန် စိတ်ကူးနေကြသည်။
ထိုင်းအစိုးရ ထီရုံး (GLO) က မေလ ၁၆ ရက်တွင် ထီဖွင့်ခဲ့ရာ ပထမဆုမှာ 251309 ဖြစ်သည်။ အခြားဆုများအနေဖြင့် ရှေ့ဂဏန်း ၃ လုံးတိုက်အဖြစ် 109 နှင့် 231 ၊ နောက်ဂဏန်း ၃ လုံးတိုက်အဖြစ် 965 နှင့် 631 ၊ နောက် ၂ လုံးတိုက်အဖြစ် 87 တို့ ထွက်ရှိခဲ့သည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Viral coffin crash spurs lottery frenzy as number brings big wins (video)
