စင်္ကာပူတွင် ချမ်းသာသော အဘိုးတစ်ဦးက အစားအသောက်များ အလဟဿ မဖြစ်စေရန်ဟုဆိုကာ စားသောက်ဆိုင်တစ်ခု၌ စားကြွင်းစားကျန်များ လိုက်လံစားသောက်နေပုံ နာမည်ကြီးနေ

စင်္ကာပူတွင် အဘိုးတစ်ဦးသည် စင်္ကာပူတရုတ်တန်းမှ နာမည်ကျော် စားသောက်ဆိုင်တန်းဖြစ်သော People’s Park Food Centre တွင် စားကြွင်းစားကျန်များ၊ စားသောက်ဝိုင်းများမှ သိမ်းဆည်းလာသည့် ပန်းကန်များ ထားရှိသည့် စားပွဲပေါ်မှ အကြွင်းအကျန်များအား စားသောက်နေပုံကို အနီးဝန်းကျင်တွင်ရှိနေသူများ တွေ့မြင်ခဲ့ကြသည်။

အများက တွေးထင်ကြသည်မှာ အလွန်ဆာလောင်မွတ်သိပ်နေသောကြောင့် ထိုသို့စားသောက်နေခြင်း ဖြစ်သည်ဟု ယူဆကြသည်။

ထိုအဘိုး၏ အမည်မှာ မစ္စတာဝမ်ဟု ခေါ်သည်။

အဘိုးဝမ်က ရှင်းပြသည်မှာ အစားအသောက်ဝယ်ရန် မတတ်နိုင်သောကြောင့် မဟုတ်ဘဲ အစားအသောက်များ အလဟဿ စွန့်ပစ်နေမှုကို ကာကွယ်လိုသောကြောင့်ဖြစ်ကြောင်း ပြောသည်။

“ဒါက… အစားအသောက် ဝယ်ဖို့ ကျွန်တော့်မှာ ပိုက်ဆံမရှိလို့ မဟုတ်ပါဘူး။ အစားအသောက်တွေ စွန့်ပစ်ခံရမှာကို မမြင်လိုတာကြောင့်ပါ။ လူတွေက အစားအသောက်တွေ အများကြီး ချန်ထားခဲ့တာ အမြဲ တွေ့နေရပါတယ်” ဟု အဘိုးဝမ်က Shin Min Daily News သတင်းဌာနသို့ ပြောသည်။

“အစားအသောက်တွေက ပူနွေးနေတုန်းပါ။ ဒါက ဖြုန်းတီးမှုပါ။ ဒါကြောင့် ကျွန်တော်ဒါတွေကို စားနေတာပါ”

စားသောက်ဆိုင်တန်းမှ ဈေးသည်တစ်ဦးက ပြောသည်မှာ ထိုသို့ စားသောက်နေသည်မှာ အဘိုးဝမ်တစ်ဦးတည်း မဟုတ်ကြောင်း၊ သက်ကြီးပိုင်း ၃ ဦးမှ ၄ ဦးအထိ စားကြွင်းစားကျန်များ နေ့စဉ်လာရောက် စားသောက်လေ့ရှိသည်ကို တွေ့ရကြောင်း ပြောသည်။

စင်္ကာပူတွင် စွန့်ပစ်ပစ္စည်းများ ဆန့်ကျင်သည့်အဖွဲ့ Freegan ကို တည်ထောင်သူ Daniel Tay က ပြောသည်မှာ အဘိုးဝမ်၏ လုပ်ဆောင်ချက်မှာ ရည်ရွယ်ချက်ကောင်းမွန်သော်လည်း အန္တရာယ်များကြောင်း ပြောသည်။

ချန်ရစ်ခဲ့သည့် အစားအစာများကို စားသောက်ခြင်းမှာ ကျန်းမာရေးနှင့် မညီညွှတ်သည့်အပြင် မသန့်ပြန့်မှုများ ရှိနိုင်ကြောင်း၊ အစားအသောက် အဆိပ်သင့်နိုင်သည့် အန္တရာယ်ရှိကြောင်းလည်း Daniel Tay က ပြောသည်။

စားသောက်နေသူများထံ တိုက်ရိုက်သွားရောက်ကာ မတို့ထိရသေးသည့် အစားအစာများကို တိုက်ရိုက် တောင်းဆိုခြင်းမှာ ပိုမိုအန္တရာယ်ကင်းကြောင်း Daniel က အကြံပြုသည်။

သက်ကြီးပိုင်းတို့မှာ ခက်ခဲစွာ ဖြတ်သန်းခဲ့ရသည့် ဘဝအတွေ့အကြုံများကြောင့် အစားအသောက်များ အလဟဿ ဖြစ်နေခြင်းကို မတွေ့လိုကြချေ။

၂၀၂၂ ခုနှစ် အချက်အလက်များအရ စင်္ကာပူတွင် နှစ်စဉ် အစားအသောက် တန်ချိန် ၈၀၀,၀၀၀ ခန့် စွန့်ပစ်နေကြပြီး ယင်းအနက် ၁၈ ရာခိုင်နှုန်းသာ ပြန်လည်မျှဝေမှု ရှိသည်ဟု သိရသည်။

ပိုလျှံနေသော အစားအသောက်များကို Food Bank Singapore ကဲ့သို့ အဖွဲ့အစည်းမျိုးမှတဆင့် ပြန်လည်မျှဝေခြင်းများ ရှိသည်။

အစားအသောက်များ အလဟဿ မဖြစ်စေလိုသူ အဘိုးဝမ်၏ လုပ်ဆောင်ချက်မှာ ချီးကျူးထိုက်သော်လည်း ပိုမိုဘေးကင်းသော နည်းလမ်းသုံးသင့်ကြောင်း ကျွမ်းကျင်ပညာရှင်တို့က သုံးသပ်ကြသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Elderly S’pore man eats leftovers to prevent food wastage