အိန္ဒိယဉာဏ်ကြီးရှင် ကလေးငယ် ၃ ဦးက လျှပ်စစ်မီးမလိုဘဲ ဆားဖြင့် အအေးဓာတ်ပေးနိုင်သည့် ရေခဲသေတ္တာကို တီထွင်၊ လျှပ်စစ်မီးမရှိသော ကျေးလက်ဆေးရုံများတွင် အသုံးပြုရန် အလုံး ၂၀၀ စမ်းသပ်ထုတ်လုပ်မည်ဟုဆို

အိန္ဒိယဉာဏ်ကြီးရှင် ကလေးငယ် ၃ ဦးက လျှပ်စစ်မီးမလိုဘဲ ဆားဖြင့် အအေးဓာတ်ပေးနိုင်သည့် ရေခဲသေတ္တာကို တီထွင်၊ လျှပ်စစ်မီးမရှိသော ကျေးလက်ဆေးရုံများတွင် အသုံးပြုရန် အလုံး ၂၀၀ စမ်းသပ်ထုတ်လုပ်မည်ဟုဆို

အိန္ဒိယနိုင်ငံမှ ဆယ်ကျော်သက် ကလေးငယ် ၃ ဦးသည် လျှပ်စစ်မီး မလိုဘဲ ဆားဖြင့် မိမိဘာသာ အအေးဓာတ်ပေးနိုင်သည့် ရေခဲသေတ္တာငယ်တစ်မျိုးကို ဒီဇိုင်းရေးဆွဲ တီထွင်ထုတ်လုပ်ခဲ့ကြသည်။

၎င်းတို့က လျှပ်စစ်မီး မရှိသော ကျေးလက်ဒေသများတွင် အအေးခံ သိမ်းဆည်းရန် လိုအပ်သော ဆေးဝါးပစ္စည်းများ သယ်ယူပို့ဆောင်ရေးအတွက် အဆိုပါရေခဲသေတ္တာကို ဆေးရုံများသို့ ပို့ဆောင်စမ်းသပ်ခဲ့ကြသည်။

ဆယ်ကျော်သက် ကလေးငယ် ၃ ဦး၏ အမည်မှာ ဒရု ချောက်ဒရီ (Dhruv Chaudhry) ၊ မီသရန်း လာသနီယာ (Mithran Lathania) နှင့် မရီဒူး ဂျိန်း (Mridul Jain) တို့ဖြစ်ပြီး အိန္ဒိယနိုင်ငံ မဒရာ ပရာဒက်ရှ်ပြည်နယ်၏ အကြီးမားဆုံးမြို့ကြီးဖြစ်သော အင်ဒိုမြို့ (Indore) တွင် နေထိုင်ကြသည်။

၎င်းတို့အားလုံး၏ မိဘများမှာ ဆေးပညာနယ်ပယ်တွင် လုပ်ကိုင်နေကြသူများ ဖြစ်ကြသည်။

အိန္ဒိယတွင် လျှပ်စစ်မီး မရှိသော ကျေးလက်ဒေသများသို့ COVID-19 ကာကွယ်ဆေးများ သယ်ဆောင်ရန် အခက်အခဲများ ဖြစ်ပေါ်နေသည့် သတင်းကြားရချိန်တွင် ချောက်ဒရီတို့ ကလေးငယ် ၃ ဦးက ဆားဖြင့် အအေးဓာတ်ပေးနိုင်သော ရေခဲသေတ္တာကို တီထွင်ရန် ဆုံးဖြတ်ခဲ့ကြသည်။

ဆယ်ကျော်သက် ကလေးငယ် ၃ ဦးက ၎င်းတို့ တီထွင်ခဲ့သော ရေခဲသေတ္တာကို Thermavault ဟု အမည်ပေးထားသည်။

၎င်းတို့သည် ဆားရေခဲသေတ္တာတီထွင်ခဲ့မှုအတွက် 2025 Earth Prize ဆုကို ယခုဧပြီလ အစောပိုင်းက ရရှိခဲ့ကြသည်။

ဆုငွေအဖြစ် ကန်ဒေါ်လာ ၁၂၅၀၀ ရရှိခဲ့ရာ ကလေးငယ် ၃ ဦးက ဆုငွေများဖြင့် ဆားရေခဲသေတ္တာ အလုံး ၂၀၀ ထုတ်လုပ်ကာ ဆေးရုံပေါင်း ၁၂၀ ကို ထောက်ပံ့ပေးရန် စီစဉ်ထားကြသည်။

((အအေးဓာတ်ထုတ်လွှတ်နိုင်သော ဆားအမျိုးအစား ရှာဖွေခြင်း))

အချို့သော ဆားအမျိုးအစားများသည် ရေတွင် ပျော်ဝင်ချိန်၌ အအေးဓာတ်ထုတ်လွှတ်ကြသည်။

ရေတွင် ပျော်ဝင်ချိန်တွင် အက်တမ် (သို့မဟုတ်) အိုင်းယွန်းပြိုကွဲမှုဖြစ်စဉ် ဖြစ်ပေါ်သည်။

ထို့ကြောင့် အဆိုပါပျော်ဝင်ဆားတို့၏ အနီးဝန်းကျင်ရှိ ရေမှာ အေးစက်လာသည်။

ချောက်ဒရီ၊ လာသနီယာနှင့် ဂျိန်းတို့သည် အင်တာနက်တွင် ရှာဖွေလေ့လာကြရာ အလုပ်ဖြစ်နိုင်သော ဆားအမျိုးအစား ၁၅၀ စာရင်းကို ရရှိလာသည်။

ယင်းတို့အနက်မှ ပိုမိုထိရောက်နိုင်သည့် ဆားအမျိုးအစား ၂၀ ခန့်ကို ရွေးထုတ်လိုက်သည်။

သို့သော် လက်တွေ့စမ်းသပ်ကြည့်ရာတွင် ထိုအမျိုးအစား ၂၀ လုံးမှာ လုံလောက်သည့် အအေးဓာတ် ထုတ်လွှတ်မှုကို မတွေ့ရသောကြောင့် ချောက်ဒရီတို့ ၃ ဦး စိတ်ပျက်သွားကြသည်။

နောက်ဆုံးတွင် ၎င်းတို့၏ ဆရာဖြစ်သူက ဆားအမျိုးအစား ၂ ခုကို စမ်းသပ်ကြည့်ရန် အကြံပေးခဲ့သည်။

ထို ၂ မျိုးမှာ Barium Hydroxide Octahydrate နှင့် အမိုနီယမ် ကလိုရိုက် (Ammonium Chloride) တို့ ဖြစ်ကြသည်။

(မှတ်ချက်။ Barium Hydroxide octahydrate [ BA (OH)2 8H2O ] သည် ဖန်ချက်လုပ်ငန်း၊ အာကာသယာဉ်၊ ရေကြောင်းလုပ်ငန်း၊ စက်မှုလုပ်ငန်းများတွင် သုံးသည့် ချောဆီများ ထုတ်လုပ်ရာတွင် အသုံးပြုသည်။ အမိုနီယမ် ကလိုရိုက် (NH4Cl) မှာ မြန်မာအခေါ် ဇဝက်သာဖြစ်ပြီး ဓာတုပစ္စည်းတစ်ခုအနေဖြင့်သာမက ဆေးဝါးအဖြစ်လည်း အသုံးပြုသည်။)

အမိုနီယမ် ကလိုရိုက်သည် ၂ ဒီဂရီမှ ၆ ဒီဂရီ ဆဲစီးယပ်အထိ အအေးဓာတ်ရစေသည်ကို စမ်းသပ်တွေ့ရှိရာ အဆိုပါ အအေးဓာတ်မှာ ကာကွယ်ဆေးအများစု သိုလှောင်ထားရှိရန် အကောင်းဆုံးအခြေအနေဖြစ်သည်။

ထို့အပြင် Barium Hydroxide octahydrate ကို ထပ်မံပေါင်းစပ်ပေးလိုက်ခြင်းအားဖြင့် အအေးဓာတ် သုညဒီဂရီ ဆဲစီးယပ်အထိ ရရှိလာရာ အချို့သော ကာကွယ်ဆေးများနှင့် အစားထိုးကုသမည့် ကိုယ်ခန္ဓာအစိတ်အပိုင်းများ သယ်ဆောင်ရန် သင့်တော်သည့် အအေးဓာတ် ရရှိလာစေသည်။

နောက်တစ်လခန့်အကြာတွင် ဆယ်ကျော်သက် ၃ ဦးသည် နမူနာ ရေခဲသေတ္တာတစ်လုံး စတင်ထုတ်လုပ်ခဲ့ကြပြီး ဒေသတွင်းရှိ ဆေးရုံများတွင် စမ်းသပ်ခဲ့ကြသည်။

(▲ ကလေးငယ် ၃ ဦး တီထွင်ခဲ့သော Tharmavault နမူနာ ရေခဲသေတ္တာကို တွေ့ရပုံ။ ဓာတ်ပုံ- Dhruv Chaudhry/ Mithran Lathania/ Mridul Jain)

၎င်းတို့၏ ရေခဲသေတ္တာမှာ အပူကာပြား ထည့်သွင်းထားသော ပလတ်စတစ်ပုံး ဖြစ်ပြီး အတွင်းပိုင်းတွင် ကြေးနီပြားဖြင့် အကန့်ငယ်တစ်ခု ပြုလုပ်ထားသည်။

အတွင်းအံထဲတွင် ကာကွယ်ဆေးများ (သို့မဟုတ်) ကိုယ်အင်္ဂါ အစိတ်အပိုင်းများ အေးခဲထားရှိနိုင်မည် ဖြစ်သည်။

ဖော်ပြပါ ဆား ၂ မျိုး ပျော်ဝင်နေသော ရေကို အပြင်ဘက် ပလတ်စတစ်ပုံး နံရံနှင့် အတွင်းဘက် ကြေးနီနံရံတို့ကြား လောင်းထည့်ထားခြင်း ဖြစ်သည်။

လျှပ်စစ်မီးမရှိသော ကျေးလက်ဒေသများသို့ ကာကွယ်ဆေး သယ်ဆောင်ရန်အတွက် ယခင်ကတည်းက အခြားအမျိုးအစား အအေးပုံးများကို အသုံးပြုခဲ့ကြပြီး ဖြစ်သည်။

သို့သော် အဆိုပါ အအေးပုံးများမှာ သာမန် ရေခဲထုပ်များဖြင့် ဖုံးအုပ်ကာ သယ်ဆောင်ခြင်းမျိုး ဖြစ်သည်။

ကလေးငယ် ၃ ဦးတီထွင်လိုုက်သော အမိုနီယမ် ကလိုရိုက်ပျော်ရည် ရေခဲသေတ္တာ၏ အားသာချက်မှာ ထပ်ဖန်တလဲလဲ ပြန်လည်အသုံးပြုနိုင်ခြင်း ဖြစ်သည်။

ဆားရည်ကို သွန်ယူလိုက်ပြီး ဆူပွက်သည်အထိ ပြန်လည်ကျိုချက်လိုက်ပါက အမိုနီယမ် ကလိုရိုက်ကို အခဲအနေဖြင့် ပြန်လည်ရရှိမည်ဖြစ်သည်။

ထို့နောက် ရေသစ်တွင် ထပ်မံ ပျော်ဝင်စေကာ အအေးဓာတ် ပြန်လည်ထုတ်လွှတ်စေပြန်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: 3 teens invented a salt-powered refrigerator that doesn't need electricity. They're building 200 of them for hospitals to use.