ရေငတ် တစ္ဆေကို ရေသန့်ဘူးတွေ ဆက်ကပ်ရတဲ့ ဟိမဝန္တာ တောင်တန်းကြီးပေါ်က ထူးဆန်းသော နတ်ကွန်း

ဟိမဝန္တာ တောင်တန်းကြီးပေါ်ရှိ တောင်ကိုရစ်ပတ်ကာ မြွေလိမ်မြွေကောက် ဖောက်လုပ်ထားသော တောင်ကြားလမ်းတစ်ခုတွင် ပလတ်စတစ် ရေသန့်ဘူးများ တောင်ပုံရာပုံဖြစ်နေသည့် နတ်ကွန်းငယ်လေးတစ်ခု ရှိနေသည်။

ရုတ်တရက်ကြည့်လျှင် ဘူးခွံများ ပြန့်ကျဲနေသော အမှိုက်ပုံကြီးတစ်ခုဟု ယူဆဖွယ်ရာရှိသည်။

သို့သော် အမှိုက်ပုံမဟုတ်ချေ။

ဗုဒ္ဓဘာသာ ကျောင်းသင်္ခမ်းများ ပြန့်ကျဲတည်ရှိနေသော လက်ဒေါက် (Ladakh) တောင်ပေါ်ဒေသမှ ရေငတ်တစ္ဆေကို ပူဇော်ပသထားခြင်း ဖြစ်သည်။

လက်ဒေါက်ကို ကူးပြောင်းခြင်း ပြောင်းလဲခြင်းတို့ရှိရာမြေ၊ မဆုံးသောအလှတရားတို့၏ မြေဟု ရည်ညွှန်းကြသည်။

ဓာတ်ပုံရှုမျှော်ခင်းရိုက်ရန် အလွန်ကောင်းမွန်သော တောတောင်ရှုခင်းများ၊ ပဉ္စလက်ဆန်သော မိုးကောင်းကင်၏ အလှ၊ မဆုံးနိုင်သော မြွေလိမ်မြွေကောက်လမ်းများ၊ ရိုးသားလှသော အပြုံးများနှင့် တောင်ပေါ်သားများရှိရာ လက်ဒေါက်ကို အချို့က ရှမ်ဘဲလား တည်ရှိသည့်နေရာဟု ဆိုကြပြီး ကောင်းကင်နှင့် မြေကြီးတို့ ဆုံစည်းရာ နေရာဟုလည်း ညွှန်းဆိုကြသည်။

ထိုသို့သော အလှတရားများရှိရာနေရာတွင် ပလတ်စတစ်ရေဘူးများ တပုံတပင်ဖြစ်နေသော နတ်ကွန်းငယ်မှာ အမှိုက်ပုံဖြစ်ကာ ရှုပ်ပွနေသည့်အပြင် တမျိုးတဖုံလည်း ခြောက်ခြားဖွယ်ရာ ဖြစ်နေသည်။

မြွေလိမ်မြွေကောက် တောင်ပေါ်လမ်းဆီသို့ တောင်တက်သမားများနှင့် နိုင်ငံခြားသား ဆိုင်ကယ်သမားများ မကြာခဏရောက်လာတတ်သည်။

ပလတ်စတစ်ရေဘူးများ တပုံကြီးရှိနေသည့် ယခုနေရာကို တွေ့လျှင် ၎င်းတို့မှာ များစွာခြောက်ခြားသွားလေ့ရှိသည်။

အချို့ကလည်း ဓာတ်ပုံများ ရိုက်ယူကြပြီး နိုင်ငံခြားသားတို့သည် ဟိမဝန္တာတောင်ပေါ်သို့ လာရောက် အမှိုက်ဖွနေကြကြောင်း လူမှုကွန်ရက်တွင် ရေးသားဝေဖန်ကြ၏။

လက်ဒေါက်၏မြို့တော် Leh နှင့် ဟိမဝန္တာတောင်ကြောမှ ဟိမာချယ်ပရာဒက်ရှ်ပြည်နယ်မှ မာနာလီ (Manali) တောင်ပေါ်အပန်းဖြေစခန်းမြို့တို့ကို ဆက်သွယ်ပေးထားသည့် ၂၆၆ မိုင် ရှည်လျားသော Leh-Manali အဝေးပြေးလမ်းမကြီးရှိသည်။

မာနာလီမှ Leh သို့ လာမည်ဆိုလျှင် လမ်းတွင် ဂငယ်ကွေ့ ၂၀ ခုရှိသော နေရာကို ဖြတ်သန်းပြီးလျှင် ပင်လယ်ရေမျက်နှာပြင်အထက် အမြင့်ပေ ၁၆၀၀၀ တွင်ရှိသော Nakeela တောင်ကြားလမ်းသို့ ရောက်သည်။

ဂငယ်ကွေ့ရှိရာနေရာများတွင် လမ်းဘေးဝဲယာ သတိထားကြည့်မည်ဆိုလျှင် ရေဘူးများ တောင်ပုံရာပုံ ရှိနေကာ အခါအားလျော်စွာ ဘီစကွတ်မုန့်ထုပ်များ တွေ့ရနိုင်သော နတ်ကွန်းငယ်တစ်ခုကို တွေ့မည် ဖြစ်သည်။

အဆိုပါ ရေနှင့် ဘီစကွတ်တို့သည် ဂငယ်ကွေ့များရှိရာတွင် ခြောက်လှန့်နေသည့် တစ္ဆေတစ်ကောင် စားသောက်ရန် ထားရှိပေးခြင်းဖြစ်သည်ဟု ဆိုသည်။

((နတ်ကွန်းပေါ်ပေါက်လာပုံ))

လွန်ခဲ့သော နှစ်အတန်ကြာက ကုန်ကားမောင်းသူတစ်ဦးနှင့် စပယ်ယာတစ်ဦးတို့သည် Leh မြို့ဆီသို့ ဦးတည် ထွက်ခွာလာခဲ့ကြသည်။

ဂငယ်ကွေ့များရှိရာသို့ ရောက်ရှိချိန်တွင် နှင်းများ ထူထပ်စွာကျနေကာ ကားပျက်သွားသည်။

ရာသီဥတု ဆိုးရွားနေသောကြောင့် တောင်ကြားလမ်းကို ပိတ်လိုက်ရာ အခြားကားများလည်း ရောက်ရှိလာခြင်း မရှိ။

ကားဆရာလည်း နာရီပေါင်းများစွာ ကားပြင်ရန် ကြိုးစားသော်လည်း မအောင်မြင်သောကြောင့် အနီးဆုံးရွာကို လမ်းလျှောက်သွားကာ အကူအညီတောင်းရန် ဆုံးဖြတ်ခဲ့သည်။

စပယ်ယာမှာမူ ကားကို စောင့်ရှောက်ရင်း ကျန်ရစ်သည်။

ထိုနောက်ပိုင်း နှင်းမုန်တိုင်းများဖြင့် ရာသီဥတု ပိုမိုဆိုးရွားလာသောကြောင့် ကားဆရာမှာ ကားရှိရာသို့ ရက်အနည်းငယ်ကြာသည်အထိ ပြန်မသွားနိုင်ခဲ့။ ကားရှိရာသို့ ပြန်ရောက်ချိန်တွင် စပယ်ယာမှာ အအေးဒဏ်အပြင် အစာရေစာပြတ်ကာ သေဆုံးနေပြီ ဖြစ်သည်။

ရာသီဥတု ပြန်လည်ကောင်းမွန်သွားသောအခါ တောင်ကြားလမ်းကို ပြန်လည်ဖွင့်လှစ်လိုက်ချိန်တွင် ဂငယ်ကွေ့များ ရှိသောနေရာ၌ အစာနှင့် ရေလိုက်တောင်းနေသော တစ္တေတစ်ကောင်ကို တွေ့လာရသည်။

ထိုသတင်းမှာ တောမီးပမာ ပျံ့နှံ့သွားပြီးနောက်ပိုင်း ဒေသခံတို့က သေဆုံးသွားသော စပယ်ယာ၏ အမည်ဖြင့် နတ်ကွန်းငယ်တစ်ခု ထိုနေရာတွင် ဆောက်လုပ်ခဲ့ပြီး စားစရာနှင့် ရေသန့်ဘူးများ အခါအားလျော်စွာ လာရောက် ထားရှိကြသည်။

(Manali-Leh အဝေးပြေးလမ်းမပေါ်မှ နတ်ကွန်း)

(GoMissing ခရီးသွားသတင်းဌာနမှ ဆိုင်ကယ်သမားများကို နတ်ကွန်းနေရာတွင် တွေ့ရပုံ)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Ghost of Gata Loops & other mysteries of Leh & Ladakh (gomissing)