ငွေရေးကြေးရေးဆိုင်ရာအဖွဲ့အစည်း ဥပဒေအကြောင်းကို ဥပဒေဗဟုသုတအနေဖြင့် ရေးသားဖော်ပြပေးလိုက်ပါသည်။

ငွေရေးကြေးရေးဆိုင်ရာ ကိစ္စရပ်များအား စနစ်တကျစီမံခန့်ခွဲစေရန် ရည်ရွယ်၍ ငွေရေးကြေးရေး အဖွဲ့ အစည်းဥပဒေနှင့် ဗဟိုဘဏ်ဥပဒေသို့ ထွက်ရှိထားပါသည်။ နိုင်ငံခြား ငွေရေးကြေးရေးအဖွဲ့အစည်း၊ ဘဏ်ခွဲ တစ်ခုခုမှ နိုင်ငံအတွင်း ငွေရေးကြေးရေးဆိုင်ရာ ဝန်ဆောင်မှု လုပ်ငန်းများ ဆောင်ရွက်လိုပါက ငွေရေးကြေးရေး အဖွဲ့အစည်းများဥပဒေ ပုဒ်မ - ၁၄ အရ လုပ်ငန်းလုပ်ကိုင်ခွင့် လိုင်စင်လျှောက်ထားရန်လိုပါသည်။ လုပ်ငန်း လိုင်စင်ရရှိပြီး တစ်နှစ်အတွင်း ခွင့်ပြုသည့် ငွေရေးကြေးရေး လုပ်ငန်းများအား စတင်အကောင်အထည် ဖော်ဆောင်ရွက်ရမည် ဖြစ်ပါသည်။

ထို့သို့ လုပ်ဆောင်ပါက မတည်ရင်းနှီးငွေရင်း အပြည့်အဝကို ဗဟိုဘဏ်ထံ အတိအကျ ဖော်ပြပေးရမည် ဖြစ်ပြီး မတည်ရင်းနှီးငွေ၏ ( ၀.၁% ) နှင့် ညီမျှသော လိုင်စင်ကြေးကို ထမ်းဆောင်ပေးရမည် ဖြစ်ပါသည်။ ထို့ပြင် ဒေသနှင့် လုပ်ငန်းအမျိုးအစား ပေါ်မှုတည်ပြီး မတည်ရင်းနှီးငွေကို ဗဟိုဘဏ်မှ သတ်မှတ်ပေးနိုင်ပါသည်။

မတည်ရင်းနှီးငွေရင်းအား သတ်မှတ်ကာလအတွင်း ထည့်ဝင်ရန် ပျက်ကွက်ခြင်း၊ တည်ဆဲဥပဒေများကို ဖောက်ဖျက်ခြင်း၊ မိမိဆန္ဒဖြင့် စာရင်းရှင်းလင်းဖျက်သိမ်းကာ လူမွဲအဖြစ်ခံယူခြင်း၊ မူလတရားဝင်ခွင့်ပြုချက်များအတိုင်း ဆောင်ရွက်ရန် ပျက်ကွက်ခြင်းတို့ ဖြစ်ပေါ်ပါက ဗဟိုဘဏ်မှ လုပ်ငန်းလုပ်ကိုင်ခွင် လိုင်စင်အား ပြန်လည် ရုပ်သိမ်းမည်ဖြစ်ပါသည်။ မတည်ရင်းနှီးငွေ (၁၅%) ထက်ပိုသော ငွေအား တစ်ကြိမ်ထဲဖြစ်စေ၊ တစ်ကြိမ်တစ်ခါ ထက်ပို၍ဖြစ်စေ၊ လွှဲပြောင်းခြင်းပြုလျှင် ဗဟိုဘဏ်၏ ကြိုတင်ခွင့်ပြုချက်ရယူရမည်ဖြစ်ပါသည်။ ရုံးတည်နေရာ ပြောင်းလဲခြင်း၊ ကိုယ်စားလှယ်ရုံး၊ ရုံးခွဲများ ထားရှိမှုပြုခြင်း၊ ပိတ်ခြင်းများ ဆောင်ရွက်လျှင်လဲ ဗဟိုဘဏ်၏ ကြိုတင် ခွင့်ပြုချက်လိုပါသည်။

ငွေရေးကြေးရေးအဖွဲ့အစည်း လိုင်စင်ရရှိသူသည် ငွေချေးယူခြင်း (သို့) ငွေကြေးရှာဖွေစုစည်းခြင်း၊ အာမ ခံဖြင့်ဖြစ်စေ၊ အာမခံမဲ့ဖြင့်ဖြစ်စေ၊ ချေးငွေထုတ်ပေးခြင်း၊ ကြိုတင်ငွေထုတ်ပေးခြင်း၊ ငွေလွှဲလက်မှတ်များ၊ ငွေပေး ကတိစာချုပ်များ၊ ငွေပေးအမိန့်လက်မှတ်များ၊ ဒီဘင်ချာများ၊ ပိုင်ဆိုင်ခွင့် စာရွက်စာတမ်းများ ကြွေးမြီဆိုင်ရာ ငွေချေးသက်သေခံ လက်မှတ်များကို ထုတ်ပေးခြင်း၊ လက်ခံခြင်း၊ လျှော့နှုန်းဖြင့် လဲလှယ်ခြင်း၊ ဝယ်ခြင်း၊ ရောင်းခြင်း ကောက်ခံခြင်း ရောင်းဝယ်ဖောက်ကားခြင်း၊ ခရီးသွားလက်မှတ်များ ထုတ်ပေးခြင်းလုပ်ငန်းတို့ ဆောင်ရွက်ခွင့် ရှိပါသည်။

ဗဟိုဘဏ်သည် ငွေရေးကြေးရေးဆိုင်ရာ လုပ်ငန်းလိုင်စင် ထုတ်ပေးသည့်အခါတိုင်း (သို့) ထုတ်ပယ်သည့် အခါတိုင်း သတင်းစာတွင် ထုတ်ပြန်ကြေညာမည်ဖြစ်ပါသည်။ ငွေရေးကြေးရေး အဖွဲ့အစည်းများသည့် အဖွဲ့ အစည်း၏ စီမံရေးရာ၊ လုပ်ငန်းရေးရာ အခြေအနေ၊ ငွေကြေး လွယ်ကူမှု၊ ငွေရေးကြေးရေး အခြေအနေခိုင်မာမှု၊ အကျိုးအမြတ်ရရှိမှုတို့အား ဗဟိုဘဏ်က သတ်မှတ်ပုံစံများအတိုင်း အချိန်ကာလအလိုက် အစီရင်ခံစာများ တင်ပြ ပေးရပါသည်။

ငွေရေးကြေးရေး အဖွဲ့အစည်းများသည့် ချေးငွေ ထုတ်ပေးခြင်း၊ အပ်ငွေများ လက်ခံသည့်အခါတွင်လဲ ဗဟိုဘဏ်က သတ်မှတ်သည့် စည်းကမ်းချက်များနှင့် ညီညွှတ်အောင် ဆောင်ရွက်ရမည်ဖြစ်ကြောင်း ဥပဒေဗဟုသုတအနေဖြင့် ရေးသား ဖော်ပြပေးလိုက်ပါသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

iMyanmarHouse.com ၏ ဥပ​ဒေအကြံ​ပေး ပညာရှင်​အဖွဲ့ မှ အထူးရေးသားဖော်ပြသည်။

Credit: iMyanmarHouse.com