ရန်ကုန်မြို့ ဧရိယာ အတွင်းရှိ အိမ်ခြံမြေနှင့် တိုက်ခန်းဈေးနှုန်းများ သိန်းရာချီ ကျဆင်းလာသော်လည်း အိမ်အငှားဈေးမှာ ဆက်လက် မြင့်တက်နေဆဲပင် ဖြစ်ကြောင်း ရန်ကုန်မြို့ အခြေစိုက် အိမ်ခြံမြေ အကျိုးတော်ဆောင်များထံမှ သိရသည်။
“အရောင်းအ၀ယ် ဈေးနှုန်းက သိန်းရာချီပြီး၊ ဈေးနှုန်းကျနေပေမယ့် အငှားဈေးကတော့ ခြောက်လ တစ်ကြိမ် တစ်သောင်းခွဲ နှစ်သောင်းလောက် တက်နေတယ်”ဟု တောင်ဒဂုံမြို့နယ် အခြေစိုက် အိမ်ခြံမြေ အကျိုးဆောင် ဒေါ်ချိုက ရှင်းပြသည်။
ရန်ကုန်မြို့ အိမ်ခြံမြေဈေးကွက် အနေဖြင့် ယခု ၂၀၁၅ နှစ်စပိုင်းမှ စတင်ပြီး၊ အရောင်းသာရှိ၍ အ၀ယ်မရှိသည့် အတွက် ဈေးနှုန်းများ ကျဆင်းလာခဲ့ခြင်း ဖြစ်ပြီး၊ ရွေးကောက်ပွဲ ကာလအပြီးတွင် ဈေးကွက်ပျက်မည့် အနေအထားမျိုး ဖြစ်ပေါ်သွားနိုင်သည်ဟု သုံးသပ်ကြသော်လည်း အိမ်ငှား ဈေးနှုန်းများ မြင့်တက်ရခြင်းမှာ ရန်ကုန်မြို့ အနေအထားအရ နေထိုင်သူ တစ်နေ့တခြား များပြားလာပြီး ကိုယ်တိုင် ၀ယ်ယူနေထိုင်သူ မရှိသလောက် ရှားပါးသည့် အတွက်ကြောင့် ဖြစ်သည်ဟု အိမ်ခြံမြေ အကျိုးတော်ဆောင်များနှင့် ပညာရှင်အချို့က မှတ်ချက်ပြု ပြောကြားခဲ့သည်။
“အိမ်ငှားဈေးကတော့ စာချုပ်တစ်ခု ချုပ်တိုင်း ဈေးတက်နေတော့တာပဲ။ မတတ်နိုင်ဘူး ကိုယ်မှ အိမ်ပိုင် ၀ယ်ပြီးတော့ မနေနိုင်တာ သူတို့တောင်းတဲ့ ဈေးကိုပဲ ပေးနေရတော့တာပေါ့။ အခန်း တစ်ခန်းတော့ အပိုင်လေး လိုချင်တယ်။ လက်ရှိပေါက်ဈေးနဲ့တော့ ဘယ်လိုမှ မ၀ယ်နိုင်သေးဘူး။ ဒဂုံလို နေရာမျိုးမှာတောင် သိန်း ၃၀၀၊ ၄၀၀ ဖြစ်နေတာ ဒါတောင် ပြန်ကျသွားလို့ အရင်ကဆိုရင် ၅၀၀၊ ၆၀၀ ရှိတယ်”ဟု တောင်ဒဂုံမြို့နယ်တွင် အိမ်ငှားနေထိုင်သည့် အိမ်ရှင်တစ်ဦးက ပြောသည်။
နိုင်ငံတော် အစိုးရ အနေဖြင့် မြေဈေးနှုန်း မြင့်တက်ခြင်းအပေါ် ထိန်းချုပ်နိုင်ရန် မြေခွန်များ ဈေးနှုန်းမြင့် ကောက်ခံလိုက်သည့် အတွက် အေးစက်သွားသော်လည်း အခြေခံ လူတန်းစားများ အဓိက ကြုံတွေ့နေရသည့် အိမ်ငှားဈေးကွက်မှာမူ နိုင်ငံတော်မှ ၀င်ရောက် ထိန်းချုပ်ပေးခြင်း မရှိသည့်အတွက် အိမ်ငှားနေထိုင်သူများ အနေဖြင့် ဒုက္ခရောက်နေရသည်ဟုလည်း အိမ်ငှားဖြင့် နေထိုင်နေရသူ အများစုက ဆိုသည်။
“နိုင်ငံတော်ကလည်း တန်ဖိုးနည်းအိမ်ရာ တည်ဆောက်မယ် တည်ဆောက်မယ်လို့သာ ပြောနေတာ ဘာမှဖြစ်မလာဘူး။ သိန်း ၂၀၀၊ ၃၀၀ဆိုရင်တော့ ကျွန်တော်တို့လည်း မ၀ယ်နိုင်ဘူး။ တန်ဖိုးနည်း အိမ်ရာလို့လည်း ပြောလို့ရမယ် မထင်ဘူး။ ဘာလို့လည်းဆိုတော့ တန်ဖိုးမှ မနည်းတာကိုး”ဟု ကုမ္ပဏီ ၀န်ထမ်းတစ်ဦးက ဆိုသည်။
Credit: tomorrow
![[ငါးဟင်းကြိုက်သူတွေ သတိပြုစရာ] ထိုင်းတွင် ငါးရိုးစူးသော အမျိုးသမီးတစ်ဦး လည်ပင်းအပြင်ဘက်သို့ ငါးရိုးဖောက်ထွက်လာမှု နာမည်က](https://imh-images-prod.s3.ap-southeast-1.amazonaws.com/pictures/news/dr5b5kh/1152439-0938690001752554889-02.jpg)
