ဒေလီမြို့က သရဲခြောက်တဲ့ညောင်ပင်ကြီး

အိန္ဒိယနိုင်ငံ ဒေလီမြို့၏ လမ်းများမှာ ကြက်ပျံမကျ စည်ကားလှသည်။ သို့သော် တစ်ခုသောနေရာတွင်မူ သစ်ရိပ်ဝါးရိပ်တို့ဖြင့် အုပ်ဆိုင်းမှောင်မိုက်သော နေရာတစ်ခုရှိနေပြီး အကာလညအခါများတွင် သဘာဝလွန်ဖြစ်ရပ်ဆန်းများ ပေါ်ပေါက်လေ့ရှိသည်။

ဒေလီမြို့မှ ဒွါရ်ကာ အပိုင်း ၉ ခုခေါ်သော ဒေသတွင် ရထားဘူတာအနီး၌ နတ်ကွန်းတစ်ခု တွေ့ရမည်ဖြစ်သည်။

ဒေသခံများစွာ၏ပြောဆိုမှုအရ ဘူတာကြီးမှာလည်း သရဲခြောက်သည်ဟုဆိုသည်။

ထို့ထက်ဆိုရလျှင် ထိုဒေသဝန်းကျင်မှာ သရဲအလွန်ခြောက်သောဒေသဖြစ်သည်ဟုဆိုလျှင် ပိုမိုပြည့်စုံမည်။

နတ်ကွန်း၏ အပြင်ဘက်တွင် သရဲအလွန်ခြောက်သည်ဟု နာမည်ကြီးနေသော ဗောဓိညောင်ပင်ကြီးရှိနေသည်။

ဗောဒိညောင်သည် ဟိန္ဒူနှင့် ဗုဒ္ဓဘာသာတို့တွင် အထွတ်အမြတ်ထားသော အပင်ဖြစ်သည်။

ဟိန္ဒူတွင် ဗောဓိညောင်သည် ဗိဿနိုး၊ သိဝနှင့် ဗြဟ္မာမင်းတို့၏ ဗိမာန်ဖြစ်သည်ဟု ယုံကြည်ကြပြီး ဗုဒ္ဓဘာသာတွင်လည်း ဂေါတမဗုဒ္ဓသည် ဗောဓိညောင်ကို အမှီပြုကာ ဘုရားဖြစ်ခဲ့ခြင်းဖြစ်သည်။

အိန္ဒိယ ခရီးသွားဘလော့ဂါတစ်ဦးဖြစ်သူ နကူးလ် ချာဘရား ဒီဟာဘီက သရဲခြောက်သော ဗောဓိညောင်ပင်ကြီးကို ဗွီဒီယိုရိုက်ကူးကာ သရဲခြောက်ခံရပုံဖြစ်ရပ်များအကြောင်း ပြောပြခဲ့ကာ အင်စတာဂရမ်တွင် မျှဝေခဲ့ရာ အိန္ဒိယလူမှုကွန်ရက်သုံးစွဲသူတို့အကြား ဂယက်ရိုက်ပျံ့နှံ့နေသည်။

(▲ Dwarka Sector 9 ဘူတာမှာလည်း သရဲခြောက်သည်။ သရဲခြောက်သော အဓိကနေရာမှာမူ ဗောဓိညောင်ပင်ကြီးဖြစ်သည်။ ဓာတ်ပုံ- Source: Wikimedia)

ဗောဓိညောင်နှင့် ပတ်သက်သည့် ယုံတမ်းစကားတစ်ခုရှိသည်။

ဗောဓိညောင်ပင်အောက်တွင် အိပ်လျှင် ညဘက်၌ သရဲမြင်ရသည်ဟုဆိုသည်။ ထိုအချက်မှာ ယခုဗောဓိညောင်ပင်ကြီးတစ်ခုအတွက်သာ မဟုတ်ချေ။

သက်တမ်းရင့် ဗောဓိညောင်ပင် များစွာတွင် သရဲဇာတ်လမ်းကိုယ်စီရှိနေသည်။

((အသတ်ခံရသော ကျောင်းသူလေး))

ဒေသခံတို့၏ ပြောကြားမှုများအရ ဘူတာရုံကြီး သရဲခြောက်ခြင်းမှာ အသတ်ခံရသော ကျောင်းသူလေးတစ်ဦးနှင့် ဆက်နွှယ်နေသည်ဟု ဆိုသည်။

၂၀၀၄ ခုနှစ်အတွင်း ကျောင်းသူလေးတစ်ဦးသည် ဘူတာရုံသို့လာစဉ် ကားတိုက်ခံရကာ သေဆုံးသွားပြီးနောက်ပိုင်း သရဲခြောက်သည့်ဖြစ်ရပ်များ ပေါ်ပေါက်လာခြင်းဖြစ်သည်ဟု ဆိုကြသည်။

ကြုံတွေ့ခဲ့ရသူတစ်ဦး၏ ပြောပြချက်အရမူ ခြောက်လှန့်သောသရဲမှာ ကျောင်းသူလေးမဟုတ်ဘဲ အသက်ကြီးပိုင်း အမျိုးသမီးတစ်ဦးဖြစ်ပြီး အဖြူရောင်ဝတ်စုံ ဝတ်ဆင်ထားသည်ဟု ဆိုသည်။

ထိုအမျိုးသမီးကို ဘူတာအနီး လမ်းအလယ်တွင် တွေ့ရပြီး ရုတ်တရက်ပျောက်ကွယ်သွားသည်ဟု ဆိုသည်။

ထိုနေရာတွင် လမ်းဖောက်စဉ်က ကန်ထရိုက်တာတစ်ဦး ကြုံရသည့်အဖြစ်တစ်ခုလည်း ရှိသည်။

ထိုသူက လမ်းနှင့် မလွတ်သည့် ဗောဓိညောင်ကို ခုတ်လှဲလိုနေသည်။ ၎င်းအမျိုးသားကို အဖြူရောင်ဝတ်စုံဝတ်ဆင်ထားသော အမျိုးသမီးက အိပ်မက်ထဲတွင် လာရောက်ခြောက်လှန့်ခဲ့သည်ဟု ဆိုသည်။

ဆောက်လုပ်ရေးလုပ်သားများလည်း ခြောက်လှန့်ခံရမှုများ ရှိလာနေရာ ဗောဓိပင်ကြီးကို မခုတ်ဘဲထားရန် ဆုံးဖြတ်လိုက်ပြီး ဗောဓိပင်အနီးတွင် နတ်ကွန်းတစ်ခု ဆောက်လုပ်ပေးခဲ့ကြသည်။

(▲ သရဲခြောက်သော ဗောဓိညောင်ပင်ကြီး)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: This Tree In Delhi’s Dwarka Sector 9 Is ‘Haunted’. Beneath Its Concrete Base Lies A Buried...