အမေရိကန်ပြည်တွင် Lowe’s အိမ်ဆောက်ပစ္စည်းဆိုင်အုပ်စုက ပြည်သူများအား နေအိမ်ငယ်လေးပေါင်း အလုံး ၁၀၀ လှူဒါန်း

အမေရိကန်ပြည်တွင် ဟယ်လင် ဟာရီကိန်းမုန်တိုင်းဒဏ်သင့် ပြည်သူများ တောက်ပသော အနာဂတ် ပိုင်ဆိုင်နိုင်စေရန်အတွက် Lowe’s အိမ်ဆောက်ပစ္စည်းဆိုင်အုပ်စုနှင့် ဒေသတွင်း ဆောက်လုပ်ရေးသမားများ ပူးပေါင်းကာ နေအိမ်ငယ်လေးများ လှူဒါန်းလျက်ရှိသည်။

အမေရိကန်ပြည်၊ မြောက်ကာရိုလိုင်းနားပြည်နယ်၏ အနောက်ပိုင်းမှ မြို့များတွင် ဟယ်လင် ဟာရီကိန်း မုန်တိုင်းကြောင့် မိသားစုများစွာ အိမ်ရာမဲ့ဖြစ်ခဲ့ရသည်။

ယခုလအတွင်းတွင်မူ Lowe’s အိမ်ဆောက်ပစ္စည်းဆိုင်အုပ်စုနှင့် အခမဲ့လုပ်အားပေးကြသော ဆောက်လုပ်ရေးသမား ရာပေါင်းများစွာတို့၏ ကျေးဇူးကြောင့် နေအိမ်လိုအပ်နေသော မိသားစုများအတွက် နေအိမ်ငယ်လေးပေါင်းများစွာ လှူဒါန်းနိုင်ခဲ့ပြီး ခရစ္စမတ်ကာလမတိုင်မီ တပ်ဆင်ဆောက်လုပ်ပေးနိုင်ခဲ့သည်။

အိမ်ငယ်လေးများတွင် အပူပေးစနစ်၊ မီးဖိုဆောင်၊ ရေချိုးခန်း၊ full-size bed ၂ ခုတို့အပါအဝင် လိုအပ်ချက်အားလုံး ထည့်သွင်းပေးထားသည်။

ဒေသခံမိသားစုများအနေဖြင့် ယခုအိမ်ငယ်လေးများတွင် နေထိုင်ရင်း ၎င်းတို့အမြဲနေထိုင်မည့် နေအိမ်ကို ဆောက်လုပ်နိုင်မည် ဖြစ်သည်။

နေအိမ်ငယ်လေး တစ်လုံးစီတိုင်းတွင် ရာသီပန်းများ၊ ပရိဘောဂများနှင့် မွမ်းမံအလှဆင်မှုများအားလုံး Lowe’s က ပြုလုပ်ပေးထားသည်။

ကေသီ ဂရေဟမ်သည် Asheville မြို့အနီး တောင်ကုန်းဒေသတွင် နေထိုင်ခဲ့သည်မှာ ၂၄ နှစ်ရှိခဲ့ပြီဖြစ်သည်။

မုန်တိုင်းကြောင့် ရေလွှမ်းမိုးခဲ့မှု ရေပြန်ကျသွားချိန်တွင် နေအိမ်မှာ မှိုများစွဲကာ ကျန်ရစ်ခဲ့ပြီး အပူပေးစနစ်လည်း မရှိတော့။

သူ၏ မွေးမြူရေးတိရ စ္ဆာန်များကိုလည်း ထားရစ်ခဲ့၍ မရသောကြောင့် အခြားနေရာသို့လည်း မရွှေ့ပြောင်းနိုင်သည့် အခြေအနေမျိုး ရင်ဆိုင်ရသည်။

ထိုအခြေအနေတွင် Lowe’s ကလှူဒါန်းသည့် နေအိမ်ငယ်လေးကို တွေ့လိုက်ရချိန်တွင် ကေသီများစွာ ဝမ်းမြောက်သွားမိသည်။

“ဘုရားသခင် ကျေးဇူးတော်နဲ့ အိမ်သစ်ရပြီ။ ကျွန်မရဲ့ အိမ်ငယ်လေး။ အံ့မခန်းပါပဲ။ တကယ်ကို လှပါတယ်။ မယုံနိုင်အောင်ပါပဲ။ ဘယ်လောက်ကျေးဇူးတင်လဲဆိုတာ ပြောမပြတတ်အောင်ပါပဲ။ ဘုရားသခင်က ကျွန်မရဲ့ ဆန္ဒကို ဖြည့်ဆည်းပေးလိုက်တာပါပဲ”

Lowe’s ၏ ဝန်ထမ်းများနှင့် ဒေသတွင်း ဆောက်လုပ်ရေးသမားတို့၏ မနေမနား ကြိုးပမ်းမှုကြောင့် မကြာမီကာလအတွင်း အခြားမိသားစုများစွာအတွက် နေစရာအိမ်ငယ်လေးများ ရလာတော့မည် ဖြစ်သည်။

Lowe’s ၏ Community relations ဒါရိုက်တာ Julie Yenichek နှင့် Charlotte မြို့မှ Kelly McArdle တို့ စကားပြောဖြစ်ရာမှ အိမ်ငယ်လေးပေါင်း တစ်ရာဆောက်လုပ်လှူဒါန်းမည့် အစီအစဉ်ပေါ်ပေါက်လာခဲ့ခြင်း ဖြစ်သည်။

စေတနာ့ဝန်ထမ်း လုပ်အားပေးအဖွဲ့သည် Kelly McArdle ၏ နေအိမ်နောက်ဘက်တွင် နမူနာအိမ်ပုံစံအိမ်တစ်ခု ဆောက်လုပ်ခဲ့ကြပြီးနောက် Charlotte ရှိ ဂိုဒေါင်တစ်ခုသို့ ရွှေ့ပြောင်းခဲ့ကြသည်။

ထိုနေရာတွင် စေတနာဝန်ထမ်း ၄၀၀ ကျော်၏ အကူအညီဖြင့် နေအိမ်ငယ် ၁၆ လုံး ထပ်မံဆောက်လုပ်ပြီးစီးခဲ့သည်။

နေအိမ်ငယ်လေးများမှာ အကျယ်အဝန်း ၈ ပေ× ၁၆ ပေ ရှိသည်။

စေတနာ့ဝန်ထမ်း လုပ်အားပေးသူများကို Greater Charlotte နေအိမ်ဆောက်လုပ်သူများအသင်း (HBAGC) က ကွပ်ကဲမှုပေးခဲ့သည်။

အိမ်ငယ်လေးများ ဆောက်လုပ်ရေးအတွက် အခမဲ့လုပ်အားပေးရန် စာရင်းပေးသူ ၄၀၀ ဦးကျော် ရှိခဲ့ကြောင်း HBAGC ၏ အမှုဆောင်အရာရှိချုပ်ဖြစ်သူ Jennifer Schuster က ပြောသည်။

Lowe’s သည် မြောက်ကာရိုလိုင်းနားပြည်နယ်၏ အနောက်ပိုင်းတခွင်တွင် အိမ်ငယ်လေးပေါင်း ၁၀၀ ဆောက်လုပ်လှူဒါန်းခဲ့သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Lowe’s giving away tiny homes to families hit hard by Helene (yahoo)