နာဇီတို့ရန်မှ လွတ်မြောက်ရန်အတွက် လွန်ခဲ့သော နှစ်ပေါင်း ၅၀ ခန့်က မြေမြှုပ်သိုဝှက်ထားခဲ့သော ဒေါ်လာ သန်း ၁၀၀ ကျော် တန်ကြေးရှိ ရှားပါးရွှေဒင်္ဂါးပြားများ တူးဖော်တွေ့ရှိ၊ လာမည့် မေလ ၂၀ ရက်တွင် လေလံတင် ရောင်းချမည်ဟုဆို

နာဇီတို့၏ ရန်မှ လွတ်မြောက်ရန်အတွက် မြေမြှုပ်သိုဝှက်သွားခဲ့သော ရှားပါးရွှေဒင်္ဂါးပေါင်း ၁၅၀၀၀ ကျော်မှာ ရာစုနှစ် တစ်ဝက်နီးပါးရှိလာချိန်တွင် ပြန်လည်ထွက်ပေါ်လာခဲ့သည်။

ဒေါ်လာ သန်း ၁၀၀ ကျော်တန်ကြေးရှိသော ရွှေဒင်္ဂါးများကို တူးဖော်တွေ့ရှိသူတို့က Traveller Collection ဟု အမည်ပေးထားသည်။

((စီးကရက်ဘူးများ၊ အလူမီနီယံဘူးများတွင် ထည့်သွင်း မြေမြှုပ်ခဲ့))

ယခု ရွှေဒင်္ဂါးပြားများကို မူလ စုဆောင်းသူတို့ စတင်စုဆောင်းခဲ့သည်မှာ ၁၉၂၉ ခုနှစ် Wall Street ပြိုလဲမှု ဖြစ်ပွားချိန်တွင် စတင်ခဲ့ခြင်း ဖြစ်သည်။

ဥရောပမှ ဒင်္ဂါးပြားများ စုဆောင်းမှု ဝါသနာကြီးသူ စီးပွားရေးလုပ်ငန်းရှင်နှင့် ၎င်း၏ဇနီးသည် ဥရောပတလွှားနှင့် အမေရိကတို့တွင် ၁၀ စုနှစ် တစ်ခုကြာ ခရီးထွက်ခဲ့ကြသည်။

ထိုခရီးစဉ်အတွင်း အရှားပါးဆုံးနှင့် သမိုင်းတန်ဖိုးအကြီးဆုံး ဒင်္ဂါးပြားများကို ဝယ်ယူစုဆောင်းခဲ့ကြသည်။

သို့သော် နာဇီတို့က နိုင်ငံများကို ကျူးကျော်မှုများ ပြုလုပ်လာပြီး ဒုတိယကမ္ဘာစစ်ကြီး၏ စစ်ရိပ်စစ်ငွေ့များ သန်းလာချိန်တွင် ဒင်္ဂါးပြားများ စုဆောင်းထားသော လုပ်ငန်းရှင်က အရေးကြီးသည့် ဆုံးဖြတ်ချက်တစ်ခု ချမှတ်ခဲ့ရသည်။

နာဇီတို့လက်တွင် ရှားပါးဒင်္ဂါးများ ဆုံးရှုံးမသွားစေရန်အတွက် စီးကရက်ဘူးများ၊ အလူမီနီယံဘူးများထဲတွင် ထည့်သွင်းပြီး မြေမြှုပ်သိုဝှက်ထားလိုက်သည်။

ထိုသို့ မြေမြှုပ်ထားသည့်နေရာကို ဇနီးဖြစ်သူမှတပါး အခြားမည်သူမှ မသိခဲ့။

အဆိုပါ ဇနီးမောင်နှံ မည်သည့်နေရာတွင် ဇာတ်မြှုပ်နေထိုင် အဆုံးသတ်ခဲ့သည်ကို မည်သူမှ မသိကြချေ။

((ဒေါ်လာ သန်း ၁၀၀ ကျော်တန်ကြေးရှိ ဒင်္ဂါးများ ပြန်လည်ပေါ်ထွက်လာခြင်း))

ဆယ်စုနှစ် ၅ ခုကျော်အကြာတွင် ဒင်္ဂါးများ မြှုပ်နှံခဲ့သည့် ဇနီးမောင်နှံ၏ မျိုးဆက်တို့က အဆိုပါ ရွှေဒင်္ဂါးများကို ပြန်လည်တူးဖော်နိုင်ခဲ့ရာ တစ်ကမ္ဘာလုံး အုတ်အုတ်ကြက်ကြက် အာရုံစိုက်နေသော သတင်းဖြစ်လာသည်။

နယူးဇီလန်အခြေစိုက် လေလံကုမ္ပဏီတစ်ခုဖြစ်သော Numismatica Ars Classica (NAC) က လေလံတင်ရောင်းချပေးရန် စီစဉ်နေသည်။

ပထမအသုတ်အနေဖြင့် ဒင်္ဂါးပြားအချို့ကို ၂၀၂၅ ခုနှစ်၊ မေလ ၂၀ ရက်တွင် လေလံတင် ရောင်းချရန် စီစဉ်ထားသည်။

NAC ၏ ဒါရိုက်တာဖြစ်သူ Artoro Russo ၏ ပြောကြားချက်အရ ပထမအသုတ် လေလံတင်မည့် ဒင်္ဂါးများသည် တန်ဖိုးအရှိဆုံး ဒင်္ဂါးများဖြစ်ကြောင်း၊ မိမိတို့ ကုမ္ပဏီသက်တမ်းတလျှောက် လေလံတင်ဖူးသမျှတွင် တန်ဖိုးအကြီးဆုံးဖြစ်ကြောင်း ပြောသည်။

ဒင်္ဂါးစုဆောင်းသူဝါသနာအိုးတို့အတွက် လက်လွတ်မခံသင့်သည့် လေလံပွဲကြီးဖြစ်သည်။

အလွန်ရှားပါးသော ဒင်္ဂါးများဖြစ်ပြီး အချို့သောဒင်္ဂါးများဆိုလျှင် ဒင်္ဂါးစုဆောင်းသူတို့၏ သမိုင်းတွင် မှတ်တမ်းမှတ်ရာပင် မရှိသေးချေ။

(▲ Tehran နှင့် Isfahan တို့တွင် ၁၈ ရာစုနှောင်းပိုင်းနှင့် ၁၉ ရာစုအစောပိုင်းတွင် ထုတ်လုပ်ခဲ့သော ၅၀ Doman ဒင်္ဂါးပြားတစ်ခုကို တွေ့ရပုံ။ ဓာတ်ပုံ-Flint Culture)

((အထင်ကရ ရွှေဒင်္ဂါးများ))

ယခုတူးဖော်တွေ့ရှိသော ရွှေဒင်္ဂါးများအနက် အထင်ကရအရှိဆုံးမှာ Habsburg အင်ပါယာ (၁၆၂၉) တွင် ထုတ်လုပ်ခဲ့သော Ferdinand III ၏ ရုပ်ပုံသွန်းလုပ်ထားသော ရွှေဒင်္ဂါးပြား ၁၀၀ ဖြစ်သည်။

(မှတ်ချက်။ Habsburg အင်ပါယာမှာ သြစထရီးယား၊ ဟန်ဂေရီ၊ ချက်သမ္မတနိုင်ငံ၊ စလိုဗက်ကီးယား၊ စလိုဗေးနီးယား၊ ခရိုအေးရှား၊ ပိုလန်၏ အချို့သော ဒေသများနှင့် ရိုမေးနီးယားနိုင်ငံတို့၏ နယ်နိမိတ်များ ပါဝင်ခဲ့သော အင်ပါယာကြီးဖြစ်သည်)

Ferdinand III ဒင်္ဂါးတို့၏ အလေးချိန်မှာ ၃၄၈ ဒသမ ၅ ဂရမ်ခန့် ရှိပြီး တန်ကြေး ကန်ဒေါ်လာ ၁ ဒသမ ၃၅ သန်းခန့်ရှိသည်ဟု ခန့်မှန်းထားသည်။

(▲ ရှာဖွေတွေ့ရှိခဲ့သော ဒင်္ဂါးများအနက် Habsburg အင်ပါယာမှ Ferdinand III ရွှေဒင်္ဂါးပြား ၁၀၀ လည်း ပါဝင်ပြီး ၁၆၂၉ ခုနှစ်တွင် ထုတ်လုပ်ခဲ့ခြင်း ဖြစ်သည်။ ဓာတ်ပုံ-Flint Culture)

ယခုတူးဖော်တွေ့ရှိသော ရွှေဒင်္ဂါးပြား ၁၅၀၀၀ ကျော်ကို အချိန် ၃ နှစ်ယူကာ တစ်သုတ်ချင်း လေလံတင်သွားရန် စီစဉ်ထားရာ နိုင်ငံတကာရှိ သမိုင်းပညာရှင်များနှင့် ဒင်္ဂါးစုဆောင်းသူတို့ စိတ်ဝင်စားကြမည်ဟု ခန့်မှန်းထားသည်။

(▲ ၁၇၇၇ ခုနှစ်က ထုတ်လုပ်ခဲ့သော George III ပုံ ရိုက်နှိပ်ထားသည့် ဒင်္ဂါးများမှာ ကန်ဒေါ်လာ ၃၄၀,၀၀၀ တန်ကြေးရှိသည်ဟု ခန့်မှန်းထားသည်။ ဓာတ်ပုံ-Flint Culture)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: $160 Million Gold Treasure Found After 50 Years Hidden Underground Photo Credit- Flint Culture