အင်္ဂလန်နိုင်ငံ၊ လန်ဒန်တွင် ပြည်ပ၀ယ်လက်များက အမှန်တကယ်နေထိုင်ခြင်းမရှိဘဲ ရင်းနှီးမြှုပ်နှံရန်အတွက် ၀ယ်ယူမှုများကြောင့် အိမ်ခြံမြေဈေးများ မြင့်တက်မှုဖြစ်လာစေလျက်ရှိရာ နိုင်ငံခြားသားပိုင်ဆိုင်မှုများကို စုံစမ်းစစ်ဆေးမှုများ ပြုလုပ်သွားမည်ဖြစ်ကြောင်း လန်ဒန်မြို့တော်ဝန် ဆဒစ်ခန်က ထုတ်ဖော်ပြောကြားလိုက်သည်ဟု လန်ဒန်အခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
“လန်ဒန်အိမ်ခြံမြေဈေးကွက်မှာ နိုင်ငံခြားငွေတွေလည်ပတ်နေတာနဲ့ပတ်သက်ပြီး ကျွန်တော်တို့ ကောင်းကောင်းသိထားဖို့ လိုနေပါတယ်။ ဒီအပေါ်မှာ အခြေခံပြီး လန်ဒန်သားတွေ အိမ်ရှာတဲ့နေရာမှာ အကူအညီပေးနိုင်ဖို့အတွက် ဘာတွေလုပ်နိုင်သလဲဆိုတာ ကျွန်တော်တို့ ဆုံးဖြတ်နိုင်မှာ ဖြစ်ပါတယ်” ဟု လန်ဒန်မြို့တော်ဝန်က ပြောကြားသည်။
လန်ဒန်၏ အိမ်ခြံမြေဈေးနှုန်းများသည် လွန်ခဲ့သော ၁၂ လတာ ကာလအတွင်း ၁၂ ရာခိုင်နှုန်းကျော် မြင့်တက်လာခဲ့သည်။
မြို့တော်ဝန်ရုံးသည် လန်ဒန်ရှိ အိမ်ခြံမြေတို့အပေါ် အခွန်ကောက်ခံခြင်းနှင့် စပ်လျဉ်း၍ အခွင့်အာဏာမရှိချေ။
လန်ဒန်တွင် ပြည်ပရင်းနှီးမြှုပ်နှံမှုတို့၏ အကျိုးသက်ရောက်မှုနှင့် ကမ္ဘာတစ်ဝန်းရှိ မြို့ကြီးများအနေဖြင့် အဆိုပါပြဿနာမျိုးကို မည်သို့ ကိုင်တွယ်ဖြေရှင်းကြသနည်းဆိုသည်ကို လေ့လာသွားမည်ဟု မြို့တော်ဝန် ဆဒစ်ခန်က ဆိုသည်။
“ကျွန်တော်တို့ဟာ ကမ္ဘာတစ်ဝန်းက ရင်းနှီးမြှုပ်နှံမှုတွေကို ကြိုဆိုလျက်ရှိကြပါတယ်။ ဒီတော့ လန်ဒန်က နေအိမ်အများအပြားကို ပြည်ပ ရင်းနှီးမြှုပ်နှံသူတွေကအ၀ယ်တွေ အလုံးအရင်းဝယ်လာဦးမယ်ဆိုတဲ့ အလားအလာတွေအပေါ်မှာ ရတက်မအေးဖြစ်ရမှုတွေနဲ့အတူ လန်ဒန်သားတွေအနေနဲ့ နေအိမ်ဝယ်ယူရေးအတွက် ခက်ခက်ခဲခဲ ရုန်းကန်လာရနိုင်ပါတယ်”ဟု ဆဒစ်ခန်ကဆက်လက်ပြောကြား သည်။
၂၀၁၄ ခုနှစ်အတွင်း လန်ဒန်တွင် ပြည်ပ၀ယ်လက်များက နေထိုင်ရန်ထက် ရင်းနှီးမြှုပ်နှံရေးအတွက်သာ ရည်ရွယ်၍ နေအိမ်ဝယ်ယူမှုများစွာရှိခဲ့ရာ လန်ဒန်တွင် စုစုပေါင်း အရောင်းအ၀ယ်ဖြစ်ခဲ့မှု၏ ၇ ရာခိုင်နှုန်းရှိကြောင်း အိမ်ခြံမြေ၀န်ဆောင်မှုအဖွဲ့ Savills က ထုတ်ပြန်သည်။
နိုင်ငံခြားရင်းနှီးမြှုပ်နှံမှုများတွင် ပွင့်လင်းမြင်သာမှုများ ပိုမိုလိုအပ်ကြောင်း၊ လန်ဒန်အိမ်ခြံမြေဈေးကွက်သို့ တရားမ၀င်ငွေကြေးများ စီးဝင်မလာစေရန် ကြပ်မတ်မှုလိုအပ်ကြောင်း၊ ၀န်ကြီးများအနေဖြင့် လန်ဒန်တွင် နေအိမ်ပိုင်ဆိုင်မှုများကို ပွင့်လင်းမြင်သာမှုရှိအောင် ပြုလုပ်ရန် လိုအပ်ကြောင်း ၊ သို့မှသာလျှင် နေအိမ်များကို မည်သူပိုင်ဆိုင်သည်ဟု အတိအကျသိနိုင်မည်ဖြစ်ကြောင်းလည်း မြို့တော်ဝန် ဆဒစ်ခန်က ပြောကြားသည်။
အကျင့်ပျက်ခြစားမှုတိုက်ဖျက်ရေးအဖွဲ့ကြီးဖြစ်သော Transparency International က ထုတ်ပြန်ခဲ့ရာတွင် ပြည်ပနိုင်ငံများမှ အကျင့်ပျက်ခြစားမှုများဖြင့် ရယူခဲ့သော ငွေများဖြင့် ဗြိတိန်အိမ်ခြံမြေကဏ္ဍတွင် ရင်းနှီးမြှုပ်နှံလာကြမှုမှာ ၂၀၀၄ ခုနှစ်မှ စတင်တွက်ချက်မည်ဆိုလျှင် ပေါင်သန်း ၂၀၀ (ကန်ဒေါ်လာ သန်း ၂၆၀) ခန့် ရှိနေကြောင်း ထုတ်ပြန်ထားသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
