စင်္ကာပူအစိုးရက နိုင်ငံပိုင် မြေကွက်ကို မလေးရှားဘုရင်၏ သားတော်ပိုင်ဆိုင်သော မြေကွက် (စင်္ကာပူ ရုက္ခဗေဒဥယျာဉ်အနီးရှိ) နှင့် နှစ်ဦးသဘောတူ လဲလှယ်ရန် စီစဉ်

စင်္ကာပူအစိုးရသည် စင်္ကာပူမှ Holland လမ်းရှိ အစိုးရပိုင်မြေကွက်ကို ထိုလမ်းပေါ်တွင်ပင် တည်ရှိသော မြေကွက်တစ်ခုနှင့် လဲလှယ်ရန် သဘောတူညီမှု ရရှိထားကြောင်း စင်္ကာပူ မြို့ပြ ပြန်လည်ဖွံ့ဖြိုးရေး အာဏာပိုင်အဖွဲ့ (URA) နှင့် စင်္ကာပူ မြေယာအာဏာပိုင်အဖွဲ့ (SLA) တို့က ဇွန်လ ၁၀ ရက်တွင် ထုတ်ပြန်သည်။

စင်္ကာပူအစိုးရနှင့် မြေကွက်လဲလှယ်မည့်သူမှာ မလေးရှားဘုရင် အီဘရာဟင် အစ္စကန်ဒါ၏ သားကြီးဖြစ်သူ Tunku Ismail Sultan Ibrahim ဖြစ်သည်။

Tunku Ismail သည် Johor ပြည်နယ်၏ Sultan ဖြစ်လာမည့်သူဖြစ်သည်။

Tunku Ismail သည် Holland လမ်းပေါ်တွင် ၂၁ ဒသမ ၁ ဟက်တာရှိ မြေကွက်ကို ပိုင်ဆိုင်ထားသည်။

၎င်းက အဆိုပါမြေနေရာတွင် ဆောက်လုပ်ရေးစီမံကိန်းများ လုပ်ဆောင်ရန် ကြံရွယ်နေခြင်း ဖြစ်သည်။

စင်္ကာပူမှ ယင်းမြေကွက်ကြီးကို Johor ပြည်နယ်မှ တော်ဝင်မိသားစုက မျိုးရိုးစဉ်ဆက် ပိုင်ဆိုင်ခဲ့ကြသည်။

Tunku Ismail ပိုင်ဆိုင်သော မြေကွက်ကြီးမှာ ယူနက်စကိုက ကမ္ဘာ့အမွေအနှစ်အဖြစ် သတ်မှတ်ခြင်းခံထားရသော စင်္ကာပူရုက္ခဗေဒဥယျာဉ်နှင့် ကပ်လျက်တည်ရှိရာ စင်္ကာပူဥပဒေအရ အထပ်မြင့်များ ဆောက်လုပ်ခွင့်မပေးသောကြောင့် ယခုကဲ့သို့ မြေကွက်လဲလှယ်လိုက်လျှင် ရုက္ခဗေဒဥယျာဉ်နှင့် ဝေးကွာသောမြေနေရာကို ရမည်ဖြစ်ရာ Tunku Ismail အဖို့ ဆောက်လုပ်ရေးစီမံကိန်းများ လုပ်ဆောင်နိုင်လာမည်လည်း ဖြစ်သည်။

၁၆၆ နှစ်သက်တမ်းရှိပြီဖြစ်သော စင်္ကာပူရုက္ခဗေဒဥယျာဉ်သည် စင်္ကာပူတွင် ပထမဆုံး ကမ္ဘာ့အမွေအနှစ် စာရင်းဝင်ခဲ့သည့်နေရာဖြစ်ပြီး ၂၀၁၅ ခုနှစ်က သတ်မှတ်ခံခဲ့ရခြင်း ဖြစ်သည်။

CAN သတင်းဌာနက ဆက်သွယ်မေးမြန်းရာတွင် SLA နှင့် URA တို့က ပူးတွဲတုန့်ပြန် ဖြေကြားသည်မှာ “Johor ပြည်နယ်ရဲ့ Sultan အဖြစ် အရိုက်အရာ ဆက်ခံမယ့် ပုဂ္ဂိုလ်က သူပိုင်ဆိုင်တဲ့ မြေပေါ်မှာ ဆောက်လုပ်ရေး စီမံကိန်းတွေ လုပ်ဆောင်လိုတာကြောင့် အခုလို မြေကွက်လဲလှယ်ဖို့ လိုအပ်လာတာ ဖြစ်ပါတယ်” ဟု ဆိုသည်။

“ခွင့်ပြုချက် ပါမစ်အတွက် အစိုးရကို ချဉ်းကပ်တဲ့အခါမှာ ဘယ်လိုဆောက်လုပ်မှုမျိုးမဆို ယူနက်စကိုရဲ့ ကမ္ဘာ့အမွေအနှစ်စာရင်းဝင် စင်္ကာပူ ရုက္ခဗေဒဥယျာဉ်နဲ့ ဝေးကွာတဲ့ နေရာမှာ လုပ်ဆောင်တာကို အားပေးကြောင်း ဖြေကြားပါတယ်”

ယခုကဲ့သို့ မြေကွက်လဲလှယ်မှုမှာ စင်္ကာပူအစိုးရနှင့် ပုဂ္ဂလိကပိုင်ဆိုင်သူတို့အကြား သဘောတူ ဆောင်ရွက်မှုဖြစ်ပြီး မလေးရှားအစိုးရနှင့် Johor ပြည်နယ်အုပ်ချုပ်ရေးအဖွဲ့များ၏ ပါဝင်ပတ်သက်မှု မရှိကြောင်းလည်း ၎င်းတို့၏ ထုတ်ပြန်ချက်တွင် ဖော်ပြသည်။

ယခု ၂၀၂၅ ခုနှစ်အတွင်း မြေကွက်လဲလှယ်မှု အပြီးသတ်ဆောင်ရွက်ကြဖွယ်ရှိသည်ဟု ခန့်မှန်းရသည်။

မြေကွက်လဲလှယ်မှု အစီအစဉ်အရ Tunku Ismail သည် ၎င်းပိုင်ဆိုင်သော ၁၃ ဟက်တာ အကျယ်မြေကွက် (ရုက္ခဗေဒဥယျာဉ်နှင့် ကပ်လျက်တည်ရှိ) ကို စင်္ကာပူအစိုးရသို့ လွှဲပြောင်းပေးမည် ဖြစ်သည်။

အလဲအလှယ်အားဖြင့် စင်္ကာပူအစိုးရက ၈ ဒသမ ၅ ဟက်တာကျယ်သော မြေကွက်ကို Tunku Ismail အား ပေးအပ်မည် ဖြစ်သည်။

စင်္ကာပူအစိုးရပေးမည့် မြေကွက်မှာ Tunku Ismail ပိုင်သောမြေကွက်ကြီး၏ အနောက်ဘက်တွင် တည်ရှိသည်။

“လဲလှယ်မယ့် မြေကွက်တွေဟာ တန်ကြေး အတူတူလောက်ရှိပါတယ်” ဟု စင်္ကာပူအာဏာပိုင်တို့က ပြောသည်။

မြေကွက်များမှာ အကျယ်အဝန်း မတူညီဘဲလျက် အဘယ်ကြောင့် တန်ဖိုးတူရသနည်းဟု သတင်းမီဒီယာတို့က မေးမြန်းရာတွင် URA and SLA တို့က ဖြေကြားသည်မှာ Tunku Ismail ပိုင်သော မြေကွက်မှာ ရုက္ခဗေဒဥယျာဉ်နှင့် နီးသောကြောင့် အထပ်နိမ့်များသာ ဆောက်လုပ်ခွင့်ရှိကြောင်း၊ အစိုးရကပိုင်သော ၈ ဒသမ ၅ ဟက်တာ မြေကွက်မှာမူ ရုက္ခဗေဒဥယျာဉ်နှင့် ဝေးသောကြောင့် အထပ်မြင့်များ ဆောက်လုပ်နိုင်သဖြင့် တန်ဖိုး ပိုမိုမြင့်မားကြောင်း ဖြေကြားသည်။

လက်ရှိအားဖြင့် ရုက္ခဗေဒဥယျာဉ်အနီးတွင် အမြင့်ဆုံး ၄ ထပ်အထိသာ ဆောက်လုပ်ခွင့်ပေးထားသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Singapore Swaps Prime Land With Malaysia Billionaire King’s Son (channelnewsasia)