တရုတ်ပြည်တွင် အသက် ၉၂ နှစ်အရွယ် အဘွားအိုမှာ နေ့စဉ် ဒိုက် အကြိမ် ၂၀၀၊ ထိုင်ထ အကြိမ် ၁၀၀ ကို သက်သောင့်သက်သာ လုပ်ဆောင်နိုင်မှု ပြည်မကြီး လူမှုကွန်ရက်တွင် နာမည်ကြီးနေ

တရုတ်ပြည်တွင် အသက် ၉၂ နှစ်အရွယ် အဘွားအိုမှာ နေ့စဉ် ဒိုက်ထိုးမှု အကြိမ်ရေ ၂၀၀၊ ထိုင်ထ အကြိမ် ၁၀၀ လုပ်ဆောင်လျက်ရှိမှုအပေါ် ပြည်မကြီး လူမှုကွန်ရက်သုံးစွဲသူများအကြား များစွာအံ့အားသင့်နေကြသည်။

Jianghua TV ရုပ်သံဌာနက တရုတ်ပြည်အလယ်ပိုင်း ဟူနန်ပြည်နယ်မှ ကျန်ဝှါးယောင် (Jianghua Yao) ကိုယ်ပိုင်အုပ်ချုပ်ခွင့်ရ ခရိုင်တွင် ဇွန်လဆန်းပိုင်းက ကျင်းပခဲ့သည့် ယောင်တိုင်းရင်းသား ဆေးပညာပွဲတော်၌ အသက်ရှည်ကျန်းမာစွာ နေထိုင်နိုင်မည့်အချက်များကို မျှဝေပြောကြားခဲ့ရာမှတဆင့် သူ၏အကြောင်း လူသိများလာခြင်း ဖြစ်သည်။

(အဘွားအို၏ အသက် ထက်ဝက်ခန့်သာရှိသူတို့သည် အဘွား၏ ကျန်းမာရေးကို ကြည့်ကာ မိမိကိုယ်ကို အရှက်ရနိုင်သည်။ ဓာတ်ပုံ-Douyin)

“ဒိုက်ထိုးတဲ့အခါမှာ အဘွားရဲ့ နည်းစနစ်က စံနှုန်းကျချင်မှ ကျပါလိမ့်မယ်။ ဒါပေမယ့် အဘွား နေ့တိုင်း အကြိမ် ၂၀၀ ဒိုက်ထိုးပါတယ်” ဟု မျိုးရိုးအမည် လီဟုခေါ်သော အဘွားက ပြောသည်။

လီအဘွားက ပြောသည်မှာ လေ့ကျင့်ခန်းကို နေအိမ်တွင်သာ လုပ်ဆောင်ခြင်း၊ အပြင်တွင် မကြာခဏမိုးရွာတတ်သောကြောင့်ဖြစ်ကြောင်း ဆိုသည်။

လီအဘွား၏ နေအိမ်သို့ သတင်းထောက်များ ရောက်ရှိခဲ့ချိန်တွင် ၎င်းက ထိုင်ထ အကြိမ် ၁၀၀ နှင့် ဒိုက်ထိုးခြင်း အကြိမ် ၂၀၀ လုပ်ဆောင်ပြခဲ့သည်။

ထို့အပြင် ခါးကွင်းလှည့်ခြင်းကိုလည်း ကျွမ်းကျင်စွာ လုပ်ပြခဲ့သည်။

ညနေတိုင်း ခြေထောက်ကို ရေနွေးစိမ်လေ့ရှိကြောင်း လီအဘွားက ပြောသည်။

“အဘွားက ခြေထောက်တွေ မကြာခဏ ကြွက်တက်တတ်တယ်။ ဒါပေမယ့် ခြေထောက်ရေစိမ်တာတွေ လုပ်ခဲ့ပြီးနောက်ပိုင်း ထပ်မဖြစ်တော့ပါဘူး” ဟု ဆိုသည်။

လေ့ကျင့်ခန်းလုပ်ခြင်းကြောင့် ကျန်းမာရေးအတွက် အမှန်တကယ်ပင် အကျိုးရှိလာကြောင်း လီအဘွားက ပြောသည်။

(အသက်အရွယ်အိုမင်းနေပြီဖြစ်သော်လည်း မည်မျှ ပေါ့ပါးဖျတ်လတ်ကြောင်း လီအဘွားက ပြသခဲ့သည်။ ဓာတ်ပုံ-Douyin)

“အဘွားရဲ့ ဆံပင်တွေဖြူကုန်တာ တော်တော်ကြာခဲ့ပါပြီ။ ဒါပေမယ့် မကြာသေးမီက ဆံပင်တွေ ပြန်နက်လာတယ်”

သူသည် ဟူနန်ပြည်နယ်၊ ချန်ရှားမြို့မှ ၁၉၅၉ ခုနှစ်တွင် ဘွဲ့ရခဲ့ပြီးနောက် မူကြိုဆရာမအဖြစ် ဆယ်စုနှစ်များစွာ လုပ်ကိုင်ခဲ့သည်။

သတင်းများတွင် လီအဘွား၏ မိသားစုနှင့် ပတ်သက်သည့်အချက်အလက်များကိုမူ ထုတ်ဖော်ပြောပြထားခြင်း မရှိချေ။

လူမှုကွန်ရက်သုံးစွဲသူတို့က လီအဘွား၏ ကျန်းမာဖျတ်လတ်မှုကို အံ့အားသင့်လျက်ရှိကြသည်။

“မယုံနိုင်စရာပဲ။ ကျွန်တော်ဆို ဒိုက်တစ်ခါထိုးရင် ၁၀ ကြိမ်အောက်ပဲ လုပ်နိုင်တယ်” ဟု တစ်ဦးက မှတ်ချက်ပြုသည်။

“ဘုရားရေ…တကယ်လုပ်နိုင်တာပဲ..သူ့အသက်က ၉၂ နှစ်တောင်ရှိပြီကို…ကျွန်တော့်အသက် ၂၉ နှစ်မှာတောင် အဲ့လောက်လုပ်နိုင်မှာ မဟုတ်ဘူး” ဟု အခြားတစ်ဦးက ဆိုသည်။

(ကျန်းမာရေးအတွက် လေ့ကျင့်မှုများတွင် ခါးကွင်းလှည့်ခြင်းလည်း ပါဝင်ကြောင်း လီအဘွားက ပြောသည်။ ဓာတ်ပုံ-Douyin)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Chinese grandma, 92, wows public by easily completing 200 push-ups, 100 sit-ups daily Photo Credit-Douyin