လီယိုနာဒို ဒီကာပရီယိုက အသက် ၅၀ ပြည့်ပွဲကို ကမ္ဘာကျော် ကြယ်ပွင့်များစွာနှင့်အတူ လော့စ်အိန်ဂျလိ စံအိမ်ကြီးတွင် ခြိမ့်ခြိမ့်သဲ ကျင်းပခဲ့ရာ အိမ်နီးချင်းများနှင့် ပြဿနာတက်၊ မုတ်ဆိတ်ဖြူနေပြီဖြစ်သူ ဒီကာပရီယိုက မွေးနေ့အပြီးတွင် အသက် ၂၆ နှစ်အရွယ် ချစ်သူမိန်းကလေးနှင့် ခရီးထွက်ခဲ့

လီယိုနာဒို ဒီကာပရီယိုသည် အသက် ၅၀ နှစ်ပြည့် မွေးနေ့ကို ကမ္ဘာကျော် Walmart ကုန်တိုက်အုပ်စုကြီး၏ အမွေဆက်ခံသူ အမျိုးသမီးပိုင်သော ခမ်းနားကြီးကျယ်လှသည့် လော့စ်အိန်ဂျလိစံအိမ်ကြီးတွင် ကျင်းပခဲ့သည်။

ဒီကာပရီယို၏ မွေးနေ့ပါတီပွဲသို့ ဒိတ်ဒိတ်ကြဲ ကြယ်ပွင့်များ တက်ရောက်ခဲ့ရာ ပဲရစ်ဟီလ်တန်၊ ကေတီပယ်ရီ တို့မှသည် ဘရက်ပစ်၊ အယ်လ်ပါချီနိုတို့အထိ ပါဝင်သည်။

ပါတီပွဲကို Walmart တည်ထောင်သူ၏ တူမ တော်စပ်သူ Sybil Robson Orr နှင့် ခင်ပွန်းဖြစ်သူ Mattew Orr တို့ ပိုင်ဆိုင်သော ကျယ်ပြောလှသည့် ခြံဝန်းကြီးအတွင်းရှိ စံအိမ် ၂ လုံးတွင် နေရာခွဲကာ ကျင်းပခဲ့သည်။

Page Six သတင်းဌာန၏ ဖော်ပြချက်အရ မွေးနေ့ပါတီပွဲကို ညစာစားပွဲဖြင့် စတင်ခဲ့ပြီး ထိုပွဲသို့ ဒီကာပရီယိုနှင့် အရင်းနှီးဆုံး အတွင်းစည်းမှ မိတ်ဆွေများ တက်ရောက်ခဲ့သည်ဟု ဆိုသည်။

ယင်းနောက် ပါတီပွဲကို ခြံဝန်းကြီးအတွင်းရှိ အခြားစံအိမ်တစ်လုံးသို့ ပြောင်းရွှေ့ခဲ့ပြီး ထိုစံအိမ်တွင်မူ ကမ္ဘာကျော် ကြယ်ပွင့်များစွာ ပါဝင်ဆင်နွှဲခဲ့ကြပြီး ညသန်းခေါင်ကျော် မိုးလင်းလုနီးပါး ကခုန်ခဲ့ကြသည်။

မွေးနေ့ပွဲလာ ဧည့်ပရိသတ်များ အလွန်ပျော်ရွှင်ခဲ့ကြရသော်လည်း ထိုဒေသရှိ အိမ်နီးချင်းများမှာမူ ပါတီပွဲညတွင် ခြေချင်းလိမ်နေသော ဓာတ်ပုံဆရာများ၊ လုံခြုံရေးများ၊ ပါတီပွဲကျင်းပရာအိမ်သို့ ဥဒဟိုဝင်ထွက်ကာ ကမ္ဘာကျော် ကြယ်ပွင့်များကို အကြိုအပို့လုပ်နေသော SUV ကားကြီးများကြောင့် များစွာ စိတ်အနှောင့်အယှက်ဖြစ်ခဲ့ရသည်။

Page Six သတင်းဌာနက ရရှိခဲ့သော ဗွီဒီယိုဖိုင်တစ်ခုတွင် ဒေါသထွက်နေသော အိမ်နီးချင်းများနှင့် မွေးနေ့ပွဲ ကျင်းပရာအိမ်မှ လုံခြုံရေး၊ အခြားဝန်ထမ်းများအကြား စကားများနေသည်ကို တွေ့ရသည်။

လီယိုနာဒို ဒီကာပရီယို၏ Hollywood Hills စံအိမ်မှာ မွေးနေ့ပွဲကျင်းပရာ စံအိမ်ကြီးအနီးတွင် တည်ရှိသည်။

မွေးနေ့ပွဲကျင်းပသည့် စံအိမ်ကြီးသည် The Crown ဟုခေါ်သည့် အငူတစ်ခုပေါ်တွင်ရှိသည်။

ထိုနေရာတွင် စံအိမ် ၃ လုံးသာရှိရာ ၂ လုံးမှာ Orrs မိသားစုက ပိုင်ဆိုင်ထားသည်။

(လီယိုနာဒို ဒီကာပရီယိုက အသက် ၅၀ ပြည့်မွေးနေ့ပွဲကို လော့စ်အိန်ဂျလိရှိ စံအိမ်ကြီးတစ်လုံးတွင် ကျင်းပခဲ့သည်။ ဓာတ်ပုံ-Jeff Kravitz/ FilmMagic)

(မွေးနေ့ပါတီပွဲသို့ Cara Delevingne ၊ ဘရက်ပစ်နှင့် ကေတီပယ်ရီတို့ အပါအဝင် ဒိတ်ဒိတ်ကြဲ အကျော်အမော်များစွာ တက်ရောက်ခဲ့သည်။ ဓာတ်ပုံ-Instagram, Getty Images)

Sybil Robson Orr သည် Walmart ကုန်တိုက်အုပ်စုကြီးကို တည်ထောင်သူ ဆမ်ဝေါလ်တန်၏ တူမ ဖြစ်ပြီး ၎င်းကိုယ်တိုင်လည်း Robson Orr Entertainment ကို တည်ထောင်ထားသည့် ရုပ်ရှင်ထုတ်လုပ်သူတစ်ဦး ဖြစ်သည်။

Sybil တို့ ဇနီးမောင်နှံသည် The Crown တွင်ရှိသော စံအိမ်ကြီး ၃ လုံးအနက် ၂ လုံးကို ပိုင်ဆိုင်ထားသည်မှာ ကာလကြာမြင့်ခဲ့ပြီ ဖြစ်သည်။

အဆိုပါစံအိမ်ကြီးများသည် ချောက်ကမ်းပါး၊ လော့စ်အိန်ဂျလိနှင့် ပင်လယ်၏ ရှုမျှော်ခင်းတို့ကို အပြောကျယ်စွာ ရှုမြင်ခံစားနိုင်သည့်မြင်ကွင်းများ ပိုင်ဆိုင်ထားသည်။

သတင်းများအရ Sybil တို့ ဇနီးမောင်နှံသည် မြေထဲပင်လယ်ဗိသုကာဟန်ဖြင့် ဆောက်လုပ်ထားသော စံအိမ်ကို ၂၀၁၀ ပြည့်နှစ်အတွင်း ကန်ဒေါ်လာ ၁၉ ဒသမ ၅ သန်းဖြင့် ဝယ်ယူခဲ့ခြင်းဖြစ်ကြောင်း ဖော်ပြသည်။

စံအိမ်အကျယ် ၉၆၉၁ စတုရန်းပေရှိပြီး ရုရှားသူဌေးကြီး၏ အမွေခံဖြစ်သူ Daria Zhukova ထံမှ ဝယ်ယူခဲ့ခြင်း ဖြစ်သည်။

ထို့နောက် ၂၀၁၂ ခုနှစ်တွင် ကပ်လျက်ရှိသော စံအိမ်ကို ကန်ဒေါ်လာ ၁၇ သန်းဖြင့် အိမ်ခြံမြေလုပ်ငန်းရှင်ကြီး ဂရန့် ကာဒွန်းထံမှ ဝယ်ယူခဲ့သည်။

ထိုစံအိမ်မှာ စတုရန်းပေ ၇၀၄၃ ကျယ်ဝန်းပြီး ခြံအကျယ် ၀ ဒသမ ၆၇ ဧကရှိကာ တချိန်က ကမ္ဘာကျော်အဆိုတော် လီယိုနယ် ရစ်ချီ ပိုင်ဆိုင်ခဲ့ဖူးသည်။

(လီယိုနာဒို ဒီကာပရီယို အသက် ၅၀ ပြည့် မွေးနေ့ပွဲ ဆင်နွှဲခဲ့သော လော့စ်အိန်ဂျလိစံအိမ်ကြီး။ ဓာတ်ပုံ-Google Maps)

(The Crown အငူရှိ စံအိမ်ကြီး ၂ လုံးကို Sybil တို့ ဇနီးမောင်နှံက ဝယ်ယူရာတွင် ကန်ဒေါ်လာ သန်း ၃၀ ခန့် သုံးစွဲခဲ့ရသည်။ ဓာတ်ပုံ-LACMA)

((၂၆ နှစ်အရွယ် ချစ်သူမိန်းကလေးနှင့် ခရီးထွက်ခဲ့ခြင်း))

ဒီကာပရီယိုသည် မွေးနေ့ပွဲ ခြိမ့်ခြိမ့်သဲ ကျင်းပပြီးနောက် အသက် ၂၆ နှစ်သာ ရှိသေးသော ချစ်သူမိန်းကလေး နှင့်အတူ မက္ကဆီကိုနိုင်ငံ၊ Cabo San Lucas မြို့သို့ ခရီးထွက်ခဲ့သည်။

ဓာတ်ပုံများတွင် တွေ့မြင်ရမှုအရ ဒီကာပရီယိုမှာ မုတ်ဆိတ်များ ဖြူနေပြီဖြစ်နေသည်ကို တွေ့ရသည်။

ဒီကာပရီယို၏ ချစ်သူမိန်းကလေး Vittoria Ceretti သည် မော်ဒယ်တစ်ဦးဖြစ်ပြီး အင်စတာဂရမ်တွင် follower ၁ ဒသမ ၈ သန်းရှိသည်။

(လီယိုနာဒို ဒီကာပရီယိုသည် အသက် ၅၀ ပြည့်မွေးနေ့ပွဲအပြီးတွင် မက္ကဆီကိုနိုင်ငံသို့ ခရီးထွက်ခဲ့ရာ ဓာတ်ပုံတွင် တွေ့ရမှုအရ မုတ်ဆိတ်ဖြူနေပြီဖြစ်သည်ကို တွေ့ရသည်။)

(Vittoria က မက္ကဆီကိုတွင် အလည်အပတ်သွားနေသည့် ဓာတ်ပုံများကို လူမှုကွန်ရက်တွင် တင်ခဲ့ရာ ပုံထဲတွင် ဝဲဘက်၌ လီယိုနာဒို ဒီကာပရီယို၏ လက်တစ်ဖက်ကို တွေ့ရမည် ဖြစ်သည်။)

ဒီကာပရီယိုနှင့် Vittoria တို့ မက္ကဆီကိုသို့ အလည်အပတ်သွားသော ခရီးစဉ်တွင် ဒီကာပရီယို၏ မိခင်ကြီး Irmelin Indenbirken လည်း လိုက်ပါခဲ့သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Leonardo DiCaprio Hosts Star-Studded 50th Birthday Party Inside Walmart Heiress’ Lavish L.A. Estate (and Sparks Fury From Neighbors) Photo Credit- Jeff Kravitz/ FilmMagic, Instagram, Getty Images, Google Maps, LACMA)