ရန်ကုန်တိုင်းအစိုးရ၏ သုံးနှစ်စာစီမံကိန်းများ ဧပြီတွင် လွှတ်တော်တင်မည်

ရန်ကုန်တိုင်းဒေသကြီး အစိုးရအဖွဲ့အနေနှင့် သုံးနှစ်တာကာလအတွင်း ဆက်လက်ဆောင်ရွက်မည့် စီမံကိန်းများကို တိုင်းဒေသကြီးလွှတ်တော်ထံ ၂၀၁၈ ခုနှစ် ဧပြီလတွင် တင်ပြမည်ဖြစ်ကြောင်း ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက ပြောကြားသည်။

လက်ရှိအစိုးရ ဆက်လက် တာဝန်ထမ်းဆောင်ရန်ကျန်ရှိသည့် သုံးနှစ်တာကာလအတွင်း ဆောင်ရွက်မည့် စီမံကိန်းများကို ပြည်တွင်းလုပ်ငန်းရှင်များ သိရှိစေရန်အတွက် လွှတ်တော်ထံတင်ပြရခြင်းဖြစ်ပြီး စီမံကိန်းများရေးဆွဲရေးနှင့် ပတ်သက်၍လည်း သံတမန်များနှင့် စီးပွားရေးလုပ်ငန်းရှင်များကို ဖိတ်ကြားသွားမည်ဖြစ်ကြောင်း ၎င်းက ပြောဆိုသည်။

“ဒီတင်ပြချက်တွေဟာ အရေးကြီးပါတယ်။ လုပ်ငန်းရှင်တွေအားလုံး သိထားဖို့လိုပါတယ်။ ရန်ကုန်ရဲ့ ရှေ့ဆက်သွားမယ့် ရည်ရွယ်ချက်တွေက ဘာတွေလဲ၊ ဒီနေရာမှာ ဘယ်လိုစီးပွားရေးလုပ်ငန်းတွေကို လုပ်သင့်တယ်၊ ဘယ်လိုအစီအစဉ်တွေ ဆောင်ရွက်ခြင်းသည် ကိုယ့်ရဲ့စီးပွားရေးတွေ ရှင်သန်နိုင်တယ်ဆိုတာကို လေ့လာနိုင်ဖို့ဖြစ်ပါတယ်။ ဒါကြောင့် မြို့ပြစီမံကိန်းအားလုံးကို လွှတ်တော်တင်ဖို့ရှိပါတယ်”ဟု ဦးဖြိုးမင်းသိန်းက ဆက်လက်ပြောဆိုသည်။

ထို့ပြင် စည်ပင်သာယာ နယ်နိမိတ်ပြင်ပရှိ ကိုကိုးကျွန်းအပါအဝင် မြို့နယ် ၁၂ ခုတွင်လည်း စက်မှုဇုန်များ အကောင်အထည်ဖော်ရန် စီစဉ်ထားပြီး လက်ရှိတွင် လေ့လာဆန်းစစ်မှုများ ဆောင်ရွက်လျက်ရှိကြောင်း၊ သုံးနှစ်စာစီမံကိန်းများ တင်ပြပါက ရန်ကုန်အထူးစီးပွားရေးဇုန်နှင့် မြို့သစ်စီမံကိန်းတို့ကိုပါ ထည့်သွင်းတင်ပြမည်ဖြစ်ကြောင်း တိုင်းဒေသကြီးအစိုးရ အဖွဲ့ထံမှ သိရသည်။

“ လုပ်ငန်းရှင်တွေကို စနစ်အမျိုးမျိုးနဲ့ကျပ်ပြီး ပိုက်ဆံတောင်းတဲ့စနစ်မျိုးကို ကျွန်တော်တို့က ပုံဖော်နေတာ မဟုတ်ပါဘူး။ ဒီစနစ်မျိုးက အတိတ်မှာကျန်ခဲ့ပြီလို့ ပြောပါရစေ။ လုပ်ငန်းတွေကို အလွယ်တကူ ဆောင်ရွက်လို့ရနိုင်တဲ့ စနစ်မျိုးကို အကောင်အထည်ဖော်ဖို့ ကြိုးစားနေပါတယ်။ ဥပဒေ၊ လုပ်ထုံးလုပ်နည်းတွေကို ပြင်ဆင်နိုင်ဖို့အတွက် ကြိုးပမ်းဆောင်ရွက်နေပါတယ်”ဟု ရန်ကုန်တိုင်းဝန်ကြီးချုပ်က ဆိုသည်။

Credit: The Voice